بيىلعى جىلدىڭ 1 قاڭتارىنان باستاپ, قاراعاندى, قوستاناي, باتىس قازاقستان وبلىستارىنداعى ەمحانالار قاعازسىز اۋرۋحانالار قاناتقاقتى جوباسىنا ەندى. ال ءساۋىردىڭ 1-نەن باستاپ بۇل جوباعا تاعى 4 ايماق – تۇركىستان, ماڭعىستاۋ, پاۆلودار, سولتۇستىك قازاقستان وبلىستارى قوسىلدى. بەكىتىلگەن جوسپار بويىنشا استانا مەن الماتى قالالارى جانە قالعان وڭىرلەر 1-ءشى شىلدەدەن باستاپ ناۋقاستاردى قاعاسىز قابىلداۋعا كوشەدى. بۇل قاناتقاقتى جوبانىڭ اياسىندا امبۋلاتوريالىق كارتالار جويىلماق.
بەلگىلى بولعانداي, كەلەسى جىلدان باستاپ تەگىن مەديتسينالىق كومەكتىڭ كەپىلدى كولەمىن كورسەتەتىن بارلىق مەديتسينالىق ۇيىمدار 100 پايىز تەك قانا اقپاراتتىق جۇيەلەردە جۇمىس جۇرگىزبەك. ۆيتسە-ءمينيستردىڭ ايتۋىنشا, قازىردىڭ وزىندە ەلەكتروندى ۇكىمەت پەن مەديتسينالىق اقپا-
راتتىق جۇيەلەر كومەگىمەن دارىگەرگە ونلاين-پورتالدار ارقىلى جازىلۋ, دارىگەردى ۇيگە شاقىرۋ قىزمەتتەرىن پايدالانۋعا بولادى.
سوڭعى كورسەتكىش بويىنشا ەل اۋماعىنداعى مەديتسينا مەكەمەلەرىندەگى دارىگەرلەردىڭ كومپيۋتەرلىك تەحنيكامەن جابدىقتالۋى 85,5 پايىزدى قۇرايدى. جالپى, جۇمىس ورىندارىنىڭ سانى − 97 402 بولسا, ونىڭ ىشىندە − 83 314-ءى اتالعان تەحيكالارمەن جابدىقتالعان. ال اۋداندارداعى ەمحانالاردا 100 پايىز ينتەرنەت ىسكە قوسىلعان بولسا, بۇل كورسەتكىش اۋىلدىق جەرلەردە 46 پايىزدى قۇراپ وتىر.
ۆيتسە-مينيستر و. ابىشەۆ كەلتىرگەن اقپارات بويىنشا ەلەكتروندى ۇكىمەت پورتالىنا تىركەلگەن ناۋقاستار مەن جۇكتى ايەلدەرگە جوسپارلى تەكسەرىلۋ تۋرالى حابارلاما جىبەرۋ قاراستىرىلعان. «ەگەر ەلەكتروندى ۇكىمەتكە تىركەلىپ, e-mail نەمەسە sms تۇرىندەگى قىزمەتتى تاڭداساڭىز جانە ديسپانسەرلىك ناۋقاستار تىزىمىندە بولساڭىز, جۇيە اۆتوماتتى تۇردە جوسپارلى تەكسەرىلۋ تۋرالى حابارلاما جىبەرىپ وتىرادى. بۇل رەتتە جۇكتى ايەلدەردى جوسپارلى تەكسەرۋ جانە جوسپارلى تۇردە ەمدەۋگە جاتقىزۋ تۋرالى حابارلاما دا كەلەدى», − دەپ ءتۇسىندىردى ول. سونىمەن بىرگە ۆيتسە-مينيستر قازىرگى ۋاقىتتا «اۋرۋحاناعا جاتقىزۋ بيۋروسى» پورتالىنىڭ ناۋقاستارعا قولجەتىمدى ەكەنىن ەسكە سالدى. بيۋرو پورتالىندا جسن ارقىلى تەگىن مەديتسينالىق كومەك الۋ ءۇشىن ناۋقاستىڭ قانداي ەمحانادا قارالاتىنىن انىقتاۋعا بولادى. كۋالىكتەگى شتريح-كود ارقىلى ەلەكتروندى جۇيەدەن جولداما نەمەسە جوسپارلى ەمدەۋگە جاتقىزۋ تۋرالى اقپاراتتاردى دا الۋعا مۇمكىندىك بار.
ەركەجان ايتقازى,
«ەگەمەن قازاقستان»
