ءىس-شاراعا قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى و.ورازالين, قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى ا.شپەكباەۆ, ورتالىق جانە جەرگىلىكتى اتقارۋشى ورگاندار باسشىلارى, مەملەكەتتىك قىزمەتشىلەر قاتىستى.
گۇلشارا ابدىقالىقوۆا ءوزىنىڭ قۇتتىقتاۋ سوزىندە ەلباسى ن.ءا.نازارباەۆتىڭ مەملەكەتتىك قىزمەتتىڭ ميسسياسى حالىققا ادال قىزمەت ەتۋ جانە ۇلتتىق مۇددەنى ءتيىمدى قورعاۋ دەگەن سوزىنە توقتالدى.
سودان كەيىن مەملەكەتتىك حاتشى بۇل مەيرامنىڭ بيىل تاۋەلسىز قازاقستاننىڭ سيمۆولى – استانانىڭ 20 جىلدىق مەرەيتويىمەن ورايلاس كەلگەنىن اتاپ ءوتتى.
– ءاربىر مەملەكەتتىك قىزمەتشى ەل پرەزيدەنتىنىڭ ستراتەگيالىق باعىتىن جۇيەلى جۇزەگە اسىرۋعا ءوز ۇلەسىن قوسىپ كەلەدى. حالقىمىزدىڭ ەرەن ەڭبەگى مەن جاسامپاز ىستەرىنىڭ ارقاسىندا قازاقستان تابىستى ءارى قۋاتتى جانە بەدەلدى مەملەكەتكە اينالدى, – دەدى مەملەكەتتىك حاتشى.
تاۋەلسىزدىك جىلدارى «قازاقستان – 2050» ستراتەگياسىن, ۇلت جوسپارىن, ەلدىڭ ءۇشىنشى جاڭعىرۋىن تابىستى جۇزەگە اسىرىپ كەلە جاتقان زاماناۋي جانە جوعارى كاسىبي مەملەكەتتىك اپپارات قالىپتاستى.
بۇگىندە مەملەكەتتىك قىزمەت سالاسىندا 98 مىڭعا جۋىق قىزمەتشى ەڭبەك ەتۋدە. كەيىنگى جىلدارى مەملەكەتتىك اپپاراتتىڭ تۇراقتىلىعى قامتاماسىز ەتىلدى. كادر الماسۋ 2015 جىلدان بەرى (2015 جىلعى 11,2 پايىزدان 2017 جىلى 6,2 پايىزعا دەيىن) 2 ەسە ازايدى. سوڭعى ءۇش جىلدا مانساپ مودەلىنىڭ ارقاسىندا جۇمىس بابىندا جوعارىلاعان مەملەكەتتىك قىزمەتشىلەر سانى 4 ەسە كوبەيدى.
ەكونوميكالىق ىنتىماقتاستىق جانە دامۋ ۇيىمى ساراپشىلارىنىڭ باعالاۋى بويىنشا, قازاقستاننىڭ مەملەكەتتىك قىزمەت جۇيەسى جاھاندىق ستاندارتتارعا ساي كەلەدى, ال مەملەكەتتىك اپپاراتتىڭ «قارتايۋى» جانە گەندەرلىك تەڭسىزدىك كورسەتكىشتەرى جونىنەن ىلگەرىلەۋشىلىك بايقالادى.
مەرەكەلىك شارا اياسىندا «قازاقستان رەسپۋبليكاسىنىڭ 2018 جىلعى ۇزدىك مەملەكەتتىك قىزمەتشىسى» كونكۋرسىنىڭ 20 جەڭىمپازى «ۇزدىك مەملەكەتتىك قىزمەتشى» توسبەلگىسىمەن ماراپاتتالدى.
ۇزدىك قىزمەتكەرلەر قاتارىنان ءسوز العان اتىراۋ وبلىستىق اكىمدىگى ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ايدار نۇراليەۆ ءوزىنىڭ جۇرەكجاردى تىلەگىن جەتكىزدى.
– مەملەكەت باسشىسى بىزگە 2050 جىلعا دەيىن الەمنىڭ وزىق 30 مەملەكەتىنىڭ قاتارىنا كىرۋگە كۇش سالۋدى مىندەتتەدى. بۇل مىندەتكە مەملەكەتتىك باسقارۋ تەتىگىنىڭ ءتيىمدى جۇمىسى ارقىلى قول جەتكىزەمىز, – دەدى ا.نۇراليەۆ.
ماراپاتتاۋ راسىمىنەن كەيىن ەلىمىزدەگى تانىمال ارتىستەردىڭ جانە ونەر ۇجىمدارىنىڭ قاتىسۋىمەن مەرەكەلىك كونتسەرت ءوتتى.
سەرىك ابدىبەك,
«ەگەمەن قازاقستان»
