قازاقستاننىڭ ورتالىق كەڭەسى (سوۆەت) كوميتەتىنىڭ جاڭادان بولىپ وتكەن 3-ءشى جالپى جيىلىسى «قازاقستاندا قازاعى كوپ جەرلەردە مەكەمە ىستەرى قازاق تىلىندە ءجۇرسىن, بۇل الدىمەن بولىستاردا باستالسىن» دەپ قاۋلى قىلدى.
بۇل تۋرالى الدىندا جازعانبىز ءھام بۇل تۋرالى 12-ءشى پارتيا جيىلىسىنىڭ قاۋلىسى دا بار.
جانە بۇل تۋرالى ءبىزدىڭ قازاقستاننىڭ سوت ىستەرىن باسقاراتىن عادىليا كوميسسارياتى ءھام قازاقستاننىڭ ىشكى ىستەرىن باسقاراتىن كوميسسارياتى دا گۋبەرنيا-گۋبەرنياعا بۇيرىقتارىن جىبەردى. بۇيرىقتار تىعىز.
جانە قاعازدان گورى يگى عوي دەپ بيىل جازعا ورىنبوردان ءار ەلگە بارا جاتقان قازاق وقۋشىلارىنا, ستۋدەنتتەرىنە قازاقستاننىڭ ىشكى ىستەرىن باسقارۋشى كوميسسارياتىنان قاعازدار الىپ بەرىپ, بۇل ءىستى تاپسىرىپ جىبەردىك.
مۇنداعى ماقسۇت – بۇلار ءار گۋبەرنياعا بارىسىمەن قازاق ءتىلىنىڭ دۇكەنىن اشىپ جىبەرىپ, قايناتىپ قازاق ءتىلىن جۇرگىزىپ جىبەرەر دەگەن ەمەس, ايتەۋىر, ادام بارعان سوڭ گۋبەرنيا-گۋبەرنيالارداعى, ويازدارداعى قازاق ەڭبەكشىل تابىنىڭ شىن ىلگەرى باسۋىن ويلاعان ءھام سول ەڭبەكشىل تاپتىڭ ۇكىمەتىنىڭ شىن كوركەيۋىن, گۇلدەنۋىن ويلاعان قايراتتى ازاماتتار بولسا, تۇرا قالىپ ويلانىپ, بۇل زور تاريحي ىسكە بەلسەنىپ كىرىسەر مە ەكەن دەگەن ەدى.
اقمولا, سەمەي, بوكەي, قوستاناي گۋبەرنياسىنا جىبەرگەن جىگىتتەردەن حابار الىندى. حابارلارى وتە ۋايىمدى. ءبارىنىڭ ايتاتىن سوزدەرى: «ەشبىر جەردە قازاق ءتىلىن ەشكىم ىسكە اسىرۋعا ويلانعان جوق ءھام ويلاناتىن ەمەس» دەيدى.
ءىس قيىن, ءىس ۋايىمدى ەكەنى راس, كوپ اقشا كەرەك ەكەنى راس. بىراق قانداي ءىس بولسا دا ىنتامەن بولماق. سول ىنتا گۋبەرنيالارداعى, ويازدارداعى ءارتۇرلى قىزمەت باسىنداعى جىگىتتەردە بار ما؟...
كەلگەن حابارلارعا قاراعاندا, ونداي ىنتا, قالاي قىلساق تا بولدىرايىق دەگەن شىن كوڭىل جوق.
جوقتى بار قىلادى دەگەن, اۋىر قيىندىقتاردى جەڭەدى دەگەن قىزمەت باسىنداعى جىگىتتەر قۇر ۋايىم ايتاتىن ءتۇرى بار. قۇر «بۇعان قاراجات كەرەك, بۇعان اناۋ كەرەك, بۇعان مىناۋ كەرەك» دەگەن سوزدەردى ايتاتىن تۇرلەرى بار.
جالپى, ىنتا بولىپ, جىگەر-قايرات بولسا, ءوزى-وزىنە سەنگەن كامىل يمان بولسا, ەرجىگىتتىڭ ىستەي المايتىن ءىسى جوق.
قىزىل اسكەر جالپى جۇمىلعان ىنتانىڭ, قايراتتى جىگەردىڭ, ەرلىكتىڭ ارقاسىندا, يماننىڭ ارقاسىندا قاماعان قالىڭ جاۋىن جەڭدى.
قازاق ءتىلىن جۇرگىزۋ ءىسى قيىن بولسا سونداي-اق بولار.
بۇعان جالپى ىنتا, قاجىماس قايرات كەرەك.
كەلەسى جالپى جيىلىستا گۋبەرنيالارداعى, ويازدارداعى قىزمەت باسىنداعى جىگىتتەردەن بۇل ءىس تۋرالى نە قىلعانىنان ايگىلى جاۋاپ الىنباق. گۋبەرنياداعى ءھام ويازداعى حالىقپەن قاتىناسىپ وتىرعان ءىس باستارىنداعى جىگىتتەر بۇل سۇراۋعا لايىقتى جاۋاپتارىن دايارلاي بەرۋلەرى كەرەك.
دايىنداعان ۇلاربەك نۇرعالىم ۇلى,
«ەگەمەن قازاقستان»
