ارالاس جەكپە-جەك الەمىندەگى بەدەلى زور ۇيىمنىڭ چەمپيوندىق اتاعىن يەلەنىپ وتىرعان دامير يسماعۇلوۆ 1991 جىلدىڭ 3 اقپانىندا ورىنبور وبلىسى پەرۆوماي اۋدانىنىڭ ۋدارنىي اۋىلىندا دۇنيەگە كەلدى. بالا كەزىنەن الا دوپتىڭ سيقىرىنا اربالعان ونىڭ ارمانى مىقتى فۋتبولشى بولۋ ەدى. العاشقى كەزدەرى اياق الىسى جامان بولعان جوق. اۋىل مەن اۋداندا ءوز قاتارىنىڭ الدى بولىپ, كوپشىلىك نازارىنا ىلىكتى. وبلىس قۇراماسىنىڭ ساپىندا رەسەيدىڭ ايماقتىق تۋرنيرلەرىندە ونەر كورسەتتى. الايدا ينستيتۋتتا وقىپ جۇرگەن كەزىندە اياعىنان اۋىر جارقات الىپ, سونىڭ سالدارىنان اسقاق ارمانىمەن قوش ايتىسۋعا تۋرا كەلدى.
سپورتتىڭ سيقىرىنا ءبىر اربالعان ادامنىڭ وسى سالادان الشاقتاپ كەتۋى مۇمكىن ەمەس قوي. جاراقاتىنان ايىققاننان كەيىن دامير ورىنبوردا بار ۇيىرمەلەردىڭ ءبىرازىنىڭ تابالدىرىعىنان اتتادى. اقىرى ونىڭ تاڭداۋى ارالاس جەكپە-جەككە ءتۇستى. جاسى 20-دان اسسا دا, ءوزىنىڭ ەڭبەكقورلىعى مەن تاباندىلىعى, جانكەشتىلىگى مەن جەڭىسكە دەگەن قۇشتارلىعىنىڭ ارقاسىندا بيىك بەلەستەردى بىرتە-بىرتە باعىندىرا باستادى.
2014 جىلى العاش رەت ايقاس الاڭىنا شىققان يسماعۇلوۆ پەرمدىك الەكساندر چەرنىشتى ۇتقانىمەن, كەلەسى كەزدەسۋىندە ماحاچكالالىق رامازان سۋلەبانوۆقا ەسە جىبەردى. ول بۇل ساتسىزدىكتەن ۇلكەن ساباق الدى. جاتتىعۋ زالىندا ايانباي تەر توگىپ, ءار جارىسقا ەرەكشە قۇشتارلىقپەن دايارلاندى. ايقاس الاڭىندا بارىنشا ساۋاتتى قيمىلداپ, باستى قارسىلاستارىن بىرىنەن كەيىن ءبىرىن ىعىستىرا باستادى. باس-اياعى ءتورت جىلدان اسا ۋاقىت ارالىعىندا دامير 17 جەكپە-جەك وتكىزىپ, 15 رەت جەڭىسكە جەتتى. وسى ورايدا, بۇل تەك ءىرى حالىقارالىق دودالاردا تىركەلگەن ناتيجەلەر ەكەنىن ەستەرىڭىزگە سالا كەتەيىك. ودان بولەك, ول ءتۇرلى كوممەرتسيالىق تۋرنيرلەرگە قاتىسىپ, سان مارتە جەڭىس تۇعىرىنا كوتەرىلدى. ماسەلەن, 2016 جىلدىڭ جەلتوقسان ايىندا الاتاۋ باۋرايىندا ەل تاۋەلسىزدىگىنىڭ 25 جىلدىعىنا وراي جەكپە-جەكتەن ءدۇبىرلى جارىس ۇيىمداستىرىلعانى جانكۇيەرلەردىڭ ەسىندە بولار. 70 كيلو سالماقتا سايىسقا تۇسكەن ورىنبوردان كەلگەن قانداسىمىز تەمىرلان ءايسادىلوۆ, ايبەك نۇرسەيىت جانە مۇرات باقتىورازوۆ سەكىلدى سايىپقىراندارعا سان سوقتىرىپ, باس جۇلدەگە تىگىلگەن «تەمىر تۇلپاردى» تىزگىندەدى.
سونىمەن قاتار بىلتىرعى جىلدىڭ اقپان ايىندا سانكت-پەتەربۋرگتە وتكەن «م-1 Challenge 74» ءتۋرنيرى بارىسىنداعى مىنا ءبىر وقيعا ەستەن كەتەر ەمەس ايتۋلى جارىستا دامير يسماعۇلوۆ فرانتسيانىڭ ساقا سپورتشىسى مورگان ەرونى ءۇشىنشى راۋندتا تەحنيكالىق نوكاۋتپەن ۇتىپ, جەكپە-جەك اياقتالعان بەتتە ءسوز كەزەگى جەڭىمپازعا ءتيدى. ميكروفوندى العان ول: «وسى مۇمكىندىكتى پايدالانا وتىرىپ, «م-1» ۇيىمىنىڭ باسشىلارىنا ءوز ءوتىنىشىمدى بىلدىرگىم كەلەدى. رەيتينگتىك باسەكەلەرگە ابدەن «تويدىم». كوپ راحمەت. ەندى چەمپيوندىق ءتاج ءۇشىن تالاسقىم كەلەدى. ماعان سونداي مۇمكىندىك بەرىڭىزدەر. بۇل ءساتتى بۇكىل ورىنبور حالقى تاعاتسىزدانا كۇتىپ وتىر. مەنىڭ بۇكىل رەسەي جانە كۇللى قازاقستاندا دا جانكۇيەرلەرىمنىڭ قاتارى قالىڭ. ولار دا مەنىڭ جارقىن جەڭىسىمدى كورۋگە ەرەكشە قۇشتارلانۋدا», دەپ اقتارىلا سويلەگەن ەدى.
ءسوز كەزەگى قايتا جۇرگىزۋشىگە تيگەندە ول: «قولىمنان ميكروفوندى تارتىپ العانىڭىزعا قاراعاندا, كوزدەگەن ماقساتىڭىزعا قول جەتكىزۋ ءۇشىن ەشتەڭەدەن تايسالمايتىن باتىل ادام سەكىلدىسىز...» دەپ اڭگىمەنى ازىلمەن باستاعانى سول ەدى, قازاقتىڭ ۇلى بىردەن: «بۇگىن مەن ءسىزدىڭ قولىڭىزدان ميكروفوندى تارتىپ السام, ەرتەڭگى كۇنى چەمپيوننىڭ بەلىندەگى التىن بەلبەۋدى ج ۇلىپ اكەتەمىن. وعان ەش كۇماندارىڭىز بولماسىن», دەپ باتىل سويلەدى.
دامير جىگىت ەكەن. سوزىندە تۇردى. سول جىلدىڭ مامىر ايىندا ورىنبوردا ۇيىمداستىرىلعان تۋرنيردە قازاقتىڭ ۇلىنا ءتان قايسارلىق تانىتقان يسماعۇلوۆ سانكت-پەتەبۋرگتەن كەلگەن ماكسيم ءديۆنيچتى بەسىنشى راۋندتا تەحنيكالىق نوكاۋتپەن ۇتىپ, 70 كيلو سالماق دارەجەسى بويىنشا «م-1» ۇيىمىنىڭ چەمپيوندىق بەلبەۋىن يەلەندى. ودان كەيىن دامير تاعى ەكى جەكپە-جەك وتكىزىپ, ەكەۋىندە دە جەڭىسكە جەتتى. بۇل باسەكەلەردە ول برازيليالىق روجەريو كاررانكا مەن گرۋزيالىق راۋل تاتاراۋليدەن باسىم ءتۇستى.
مىنە, سول دامير باۋىرىمىز ءوز اتاعىن ءۇشىنشى مارتە قورعاۋ ءۇشىن 15 ماۋسىمدا قايتا ايقاس الاڭىنا شىعادى. جاتتىعۋ جۇمىستارىنىڭ سوڭعى كەزەڭىن ول الماتى قالاسىنا كەلىپ, الاتاۋ باۋرايىندا وتكىزدى. ال قارسىلاسى جايىندا ايتار بولساق, 34 جاستاعى ارتەم دامكوۆسكيدىڭ دە جەكپە-جەك ونەرىندە جيعان تاجىريبەسى زور. ول مۋاي-تاي, قويان-قولتىق ايقاس جانە پانكراتيوننان وتكەن كوپتەگەن حالىقارالىق جارىستاردا توپ جارعان. وسىدان سەگىز جىل بۇرىن ارتەم بۇل كۇندەرى جارقىن جۇلدىزعا اينالىپ, UFC-دە كۇش سىناسىپ جۇرگەن چەشەنستاندىق مايربەك تايسۋموۆتى تىزە بۇكتىردى. وسى جەڭىسىنىڭ ارقاسىندا ول «م-1» ۇيىمىنىڭ التىن بەلبەۋىن يەلەنگەن ەدى. الايدا كوپ ۇزاماي بەلارۋس سپورتشىسى سول اتاعىنان ايىرىلىپ قالدى. وسى كۇنگە دەيىن دامكوۆسكي بارلىعى 32 كەزدەسۋ وتكىزىپ, 22 مارتە جەڭىسكە جەتتى.
عالىم سۇلەيمەن,
«ەگەمەن قازاقستان»
الماتى
