فوتو: نازگۇل تالعاتقىزى
- بۇگىن مىنە, وقۋشىلاردىڭ ءداستۇرلى تۇردە جازعى دەمالىس ورىندارى اشىلىپ جاتىر. «نۇر وتان» پارتياسى جاڭا الەۋمەتتىك اياسىندا وڭىرىمىزدە ىت سىنىپتارىن اشۋ, مەكتەپ وقۋلارى جانىندا اسحانالار جانە ءۇش تۇعىرلى ءتىل – اعىلشىن ءتىلىن ۇيرەنۋ باعىتتارى بويىنشا جۇيەلى جۇمىس جۇرەتىن بولادى. قازاقستان ءۇشىن ءۇش تۇعىرلى ءتىل – ەلدىڭ باسەكەگە قابىلەتتىلىككە ۇمتىلۋداعى ماڭىزدى قادام. ويتكەنى, بىرنەشە تىلدە ەركىن سويلەي دە, جازا دا بىلەتىن ادام ءوز ەلىندە دە, شەتەلدە دە باسەكەگە قابىلەتتى تۇلعاعا اينالادى. بۇگىنگى دەمالىس لاگەرىندە جاز بويى 400-گە جۋىق وقۋشى 4 اۋىسىمدا ءارى دەمالىپ, ءارى اعىلشىن تىلىندە سويلەۋ داعدىسىن جەتىلدىرەتىن بولادى, - دەيدى «نۇر وتان» پارتياسى باتىس قازاقستان وبلىستىق فيليالىنىڭ ساياسي جۇمىس ءبولىمىنىڭ كونسۋلتانتى ارحات يسلامعالي.
بيىل باتىس قازاقستان وبلىسىندا تۇڭعىش رەت قولعا الىنىپ وتىرعان ءتىل ۇيرەنۋ لاگەرى 4 اۋىسىمنان تۇرادى. مامىر ايىنىڭ 28-ىنەن باستالعان العاشقى اۋىسىم 6 ماۋسىمعا دەيىن سوزىلماق. «دوستىق قۇشاعىندا» دەپ اتالعان بۇل توپتا مۇمكىندىگى شەكتەۋلى 78 بالا دەمالىسپەن بىرگە ءتىل ۇيرەنۋدى دە باستاپ كەتىپتى.
- لاگەردە ادەتتەگى تاربيەشىلەردەن بولەك, اعىلشىن ءتىلىن جەتىك مەڭگەرگەن ۆولونتەرلەر قىزمەت ەتەدى. ولار اعىلشىن تىلىنىڭ ساباقتارىن ويىن تۇرىندە وتكىزەدى, - دەيدى «نۇر وتان» پارتياسى باتىس قازاقستان وبلىستىق فيليالىنىڭ ءباسپاسوز حاتشىسى نازگۇل قوجانباەۆا.
لاگەردە 11-20 ماۋسىم ارالىعىندا وتەتىن ەكىنشى اۋىسىم «جاس ەرۋديتتەر» دەپ اتالادى. وعان جاراتىلىستانۋ-ماتەماتيكا باعىتىنداعى بارلىعى 105 وقۋشى قاتىسادى. ال گۋمانيتارلىق باعىتتا ءبىلىم الىپ جۇرگەن 105 ۇزدىك وقۋشى قاتىساتىن ءۇشىنشى اۋىسىم 25 ماۋسىمنان 1 شىلدەگە دەيىن سوزىلادى. ايتا كەتەتىن جايت, بۇل توپتا رەسەي فەدەراتسياسىندا تۇراتىن قانداستارىمىزدىڭ وتباسىنان 17 وقۋشى دەمالادى. ەڭ سوڭعى, ءتورتىنشى اۋىسىمدا پاتروناتتىق تاربيەدەگى بالالار اتا-اناسىمەن بىرگە – 70 بالا, 25 اتا-انا دەمالادى دەپ كۇتىلۋدە.
قازبەك قۇتتىمۇرات ۇلى
«ەگەمەن قازاقستان»
