26 مامىر كۇنى اتىراۋدا بۇكىلالەمدىك بوكس سەرياسىنىڭ (WSB) VIII ماۋسىمىنىڭ جارتىلاي فينالدىق ويىنى ءوتتى.
ويىن سوڭىندا اۋكتسيون وتكىزىلىپ, "Astana Arlans" كومانداسى سپورتشىلارىنىڭ قولعاپتارى ويناتىلدى. اۋكتسيوننان تۇسكەن قارجى 7 ميلليون تەڭگەنى قۇرادى. بۇگىن, 29 مامىر كۇنى تۇسكەن قاراجاتتىڭ بارلىعى ناۋقاس بالالار ەمىنە جۇمسالدى.
- ۋادە ەتكەندەي اتىراۋ وبلىستىق سپورت باسقارماسىمەن بىرگە 2 ميلليون تەڭگەنى كومەككە مۇقتاج دانلو ەلەرسا سيندرومىنا, تسەرەبرواستەنيكالىق سيندرومىنا شالدىققان, دتسپ جانە ەپيلەپسيامەن اۋراتىن 4 ناۋقاس بالاعا تابىستادىق. قالعان 5 ميلليون تەڭگەنى كورەيا ەلىندە ەم الىپ جاتىرعان اليما كوپەيدىڭ ەمىنە جىبەردىك,-دەيدى «Astana Arlans» كومانداسىنىڭ PR-مەنەدجەرى شىڭعىس تۇسىباەۆ.
اۋىر دياگنوز قويىلىپ, شۇعىل تۇردە ەمگە مۇقتاج بالالار تۋرالى اقپارات قالالىق جۇمىسپەن قامتۋ, الەۋمەتتىك باعدارلامالار جانە ازاماتتىق حال اكتىلەرىن تىركەۋ بولىمىنەن الىندى.
- مەنىڭ قىزىمدا سيرەك كەزدەسەتىن دانلو ەلەرسا سيندرومى. ونىڭ ەمىنە جىل سايىن قوماقتى قاراجات كەتەدى, سول سەبەپتى قالالىق بولىمنەن كومەك سۇراعان بولاتىنمىن. وسىنداي قاسيەتتى ايدا قولداۋ كورسەتكەندەرىڭىزگە راحمەت. ءبىز شىنىمەن كۇتپەدىك,- دەيدى قالا تۇرعىنى ديليارا گيلاەۆا.
