فوتو: اۆتور
كونتسەرت استانانىڭ 20 جىلدىعىنا ارنالدى. باعدارلاما ءۇش بولىمنەن قۇرالعان, «قازاق ۇلتتىق ءبيى», «زامان بي» جانە «ششەلكۋنچيك» بالەتى. ەكى ساعات ىشىندە كورەرمەندەر سيقىرلى بي الەمىن تاماشالاپ ۇلگەردى. سونىڭ ىشىندە پەتر چايكوۆسكيدىڭ «ۇيقىداعى سۇلۋ» اتتى كلاسسيكالىق بالەتتىڭ ۆارياتسياسى, ادولف اداننىڭ «جيزەلى», تسەزار ءپۋنيدىڭ «كونەك-گوربۋنوگى», ليۋدۆيگ مينكۋستىڭ «بايادەركاسى», ريكاردو دريگونىڭ «كورسارى» مەكتەپتىڭ تاربيەلەنۋشىلەرىنىڭ ورىنداۋىمەن ساحنانى ەرەكشە گۇلگە بولەدى. ال زامانۋي بي بولىمىنەن كوزگە تۇسكەندەردىڭ ىشىنەن گۋلليۆەر مەن ليليپۋتتار, «چيكاگو» ميۋزيكلىنداعى كابارە بيشىلەرى, افريكاندىق سافارلار, «ۆۆەرح تورماشكامي» بيىمەن ءتىل المايتىن بالالار, مىسىقتار مەن ورمەكشىلەر جانە كىرپىلەردى اتاۋعا بولادى.
-«ششەلكۋنچيك» بالەتىن ساحنالاپ وتىرمىز,-دەدى بالەت مەكتەبىنىڭ ديرەكتورى كاميليا يسمايلوۆا,-بۇل ەرتەگى وسىدان 126 جىل بۇرىن العاش رەت ساحنالانعان. سەمەي قالاسىندا بۇكىل الەمگە ايگىلى جانە ءارتۇرلى ەلدەردە قويىلعان ەرتەگى قايتا جاڭعىرىپ وتىر دەي الامىز. بالالاردىڭ جازعى دەمالىس كەزىندە دە ەرەكشە تاماشالايتىن بالەت قويىلىمى.
بي كەشى اتا-انالاردىڭ دا, وقۋشىلاردىڭ دا جانە مەكتەپ ۇجىمىنىڭ دا كوڭىلدەرىنە كەرەمەت قۋانىش قالدىردى.
راۋشان نۇعمانبەكوۆا
سەمەي
