كەڭەستىڭ «نۇر وتان» پارتياسىنىڭ وبلىستىق فيليالىندا وتكەن العاشقى جيىنىندا قاراعاندى وبلىسىنىڭ اكىمى ەرلان قوشانوۆ جاڭادان قۇرىلعان ۇيىمنىڭ ماقساتىنا توقتالىپ, ونىڭ الدىندا تۇرعان مىندەتتەر جايىن ءسوز ەتتى.
– وسى جىلدىڭ ەڭ ماڭىزدى شارالارىنىڭ ءبىرى «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋى بولدى. ءار باستاما – ءبىزدىڭ ازاماتتاردىڭ جاعدايىن جاقسارتۋعا جاسالاتىن قادام, – دەدى ءوڭىر باسشىسى. – بۇل قۇجات شىققان ساتتەن باستاپ ەلباسى «نۇر وتان» پارتياسىنا وسى الەۋمەتتىك باستامالاردىڭ ورىندالۋ بارىسىن باقىلاۋدى تاپسىردى. قازاقستان حالقى اسسامبلەياسىنىڭ سەسسياسىندا پرەزيدەنت «نۇر وتان» پارتياسى اسسامبلەيانىڭ قاتىسۋىمەن الەۋمەتتىك باستامالاردىڭ جۇزەگە اسىرىلۋىنا قوعامدىق باقىلاۋ جاسايتىنىن اتاپ ايتتى.
بۇگىندە قاراعاندى ايماقتىق كەڭەسى جۇمىسقا كىرىسكەن. ونىڭ توراعاسى رەتىندە وبلىستىق ءماسليحاتتىڭ دەپۋتاتى سەرعازى ادەكەنوۆ تاعايىندالدى, حاتشىسى – «نۇر وتان» پارتياسىنىڭ وبلىستىق فيليالى ساياسي جۇمىس ءبولىمىنىڭ مەڭگەرۋشىسى باعىجان سادىربەكوۆا. كەلەشەكتە ناقتى باعىتتارمەن اينالىساتىن جۇمىس توپتارى قۇرىلاتىن بولادى.
وبلىستا قازىردىڭ وزىندە ءاربىر الەۋمەتتىك باستامالاردى جۇزەگە اسىرۋ بويىنشا دايىندىق جۇمىستارى جۇرگىزىلىپ جاتىر. شاعىن نەسيەلەۋگە 2018 جىلى ايماقتا 5,7 ملرد تەڭگە قاراستىرىلعان. ستۋدەنتتەر قاۋىمى اراسىندا جاتاقحاناعا مۇقتاجداردىڭ قاجەتتىلىكتەرى انىقتالعان – ولاردىڭ سانى 2700 ورىننان اسادى. بيىلعى جىلى كوللەدجدەردىڭ جاتاقحانالارىنا ارنالىپ ءۇش عيمارات قايتا قالىپقا كەلتىرىلەدى. 2019 جىلى 4 ستۋدەنتتىك جاتاقحانا سالۋ جوسپارلانىپ وتىر.
قوعامدىق كەڭەس مۇشەلەرى «سارىارقا» گاز قۇبىرى ماگيسترالىنىڭ جوباسىن دا نازارعا العان. سەبەبى گاز قۇبىرىنىڭ باسىم بولىگى قاراعاندى وبلىسى ارقىلى وتەدى.
گاز سالاسىنىڭ ارداگەرى گەننادي وۆچاروۆ «قاراعاندىوبلگاز» مامانداندىرىلعان كاسىپورنىن قۇرۋدى ۇسىندى. قاراعاندى وبلىسى كاسىپكەرلەر قاۋىمداستىعىنىڭ پرەزيدەنتى نيكولاي ابت گاز سالاسىنا قاجەتتى قۇرىلعىلاردى جاساپ شىعارا الاتىن جەرگىلىكتى زاۋىتتاردىڭ مۇددەلەرىن العا تارتۋعا كەڭەس بەردى.
– ءبىز سوزدەن ىسكە كوشىپ, جۇمىسقا بىلەك سىبانا كىرىسۋدى باستادىق دەپ ايتۋعا بولادى. ءبىزدى الدىمىزدا قىرۋار جۇمىس كۇتىپ تۇر. بۇگىن دە كوپتەگەن جاقسى پايدالى ۇسىنىستار جاسالدى. ولاردى جۇزەگە اسىرا باستايمىز. قوعامدىق كەڭەس تەك ەلباسى باستامالارىنىڭ ورىندالۋىن عانا باقىلاپ قويمايدى. ەڭ باستىسى – بارلىق كۇشتەردى بىرىكتىرۋ جانە ءار باعىتتاعى جۇمىستاردىڭ ورىندالۋىنا جاۋاپتى قۇرىلىمدارعا ناقتى كومەك كورسەتۋ, – دەپ قورىتىندىلادى جيىندى وبلىس اكىمى ەرلان قوشانوۆ.
قايرات ءابىلدا,
«ەگەمەن قازاقستان»
قاراعاندى
