تىركەلۋدەن تۇسكەن بارلىق قاراجات «BI جۇلدىزاي» قايىرىمدىلىق قورىنا جىبەرىلەدى. 2016 جىلى وسى اكتسيا اياسىندا 10 ملن تەڭگە, ال 2017 جىلى 16 ملن تەڭگە جينالعان, بۇل قاراجاتقا بالالاردىڭ ەستۋ جانە باس مي مۇشەلەرىنىڭ جۇمىسىن جاقسارتۋعا ارنالعان توماتيس تەراپياسىنا ارنايى وڭدەلگەن SOLISTEN قۇرىلعىلارىن ساتىپ الۋعا جۇمسالدى.
وسى جىلى ۇيىمداستىرۋشىلاردىڭ بولجامدى دەرەگى بويىنشا قور شوتىنا مارافونعا تىركەلۋدەن شامامەن 22 ملن تەڭگە قاراجات تۇسكەن.
- بۇل قازاقستانداعى جالعىز 100% قايىرىمدىلىق مارافونى. ياعني جينالعان بارلىق قاراجات قورعا اۋدارىلادى, ال مارافوننىڭ بۇكىل شىعىنىن BI Group كومپانياسى وتەيدى. ءوزىنىڭ عانا ەمەس, قاراماعىنداعى قىزمەتكەرلەردىڭ, قالانىڭ, ەلدىڭ قامىن ويلايتىن وسىنداي كومپانيانىڭ بارى قۋانتادى. ۇلتىمىزدىڭ دەنى ساۋ بولۋى ءتيىس, ويتكەنى بۇل ءبىزدىڭ بولاشاعىمىز. ال ەڭ قولجەتىمدى سپورت ءتۇرى ول – جۇگىرۋ, دەيدى BI مارافوننىڭ باس تورەشىسىنىڭ كومەكشىسى, قازاقستاندىق ۋلترامارافونشى, حالىقارالىق دارەجەدەگى سپورت شەبەرى مارات جىلانباەۆ.
جالپى, BI Marathon ەلوردامىزدىڭ تۇرعىندارى مەن قوناقتارى ءۇشىن جارقىن سپورتتىق مەرەكەگە اينالدى. وتكەن جىلعىداي مارافون قاشىقتىعى 5, 10, 21 جانە 42,2 شاقىرىمدى قۇرادى. ال ەڭ كىشكەنتاي قاتىسۋشىلار ءۇشىن 2 شاقىرىمدى قۇرايتىن بالالار جۇگىرۋى دە بولادى. ايتپاقشى, ايتا كەتەيىك, ەڭ جاس قاتىسۋشى – مارات جىلانباەۆتىڭ قىزى 4 جاسار اليانا 2 شاقىرىمعا جۇگىرسە, ەڭ ەگدە قاتىسۋشى 76 جاستاعى اقساقال قايىرباي ءسالىموۆ 42 شاقىرىمدىق تولىققاندى مارافوندى جۇگىرىپ ءوتتى. سونداي-اق, قاتىسۋشىلاردىڭ اراسىندا بوكستان وليمپيادا ويىندارىنىڭ چەمپيونى سەرىك ساپيەۆ تە بولدى.
ءالي بيتورە,
«ەگەمەن قازاقستان»
