فەدەراتسيانىڭ رەسمي سايتى تاراتقان مالىمەت بويىنشا, الەم چەمپيوناتىن قازاقستان قابىلدايتىندىعى تۋرالى كوپەنگاگەندە (دانيا) شايبالى حوككەيدىڭ جىلدىق حالىقارالىق كونگرەسىندە بەلگىلى بولعان. «2019 جىلى الەم بىرىنشىلىگىندە ەرلەر اراسىندا ا توبىنىڭ ديۆيزيونىن قابىلداۋعا قازاقستان مەن سلوۆەنيا ۇسىنىس تاستادى. داۋىس بەرۋدىڭ ناتيجەسى بويىنشا قازاقستان جەڭىسكە جەتتى! قازاقستاننىڭ حوككەي تاريحىندا تۇڭعىش رەت الەم بىرىنشىلىگىن قابىلدايدى», دەلىنگەن فەدەراتسيانىڭ رەسمي حابارلاماسىندا.
حوككەيدەن الەم چەمپيوناتىنىڭ 2020 جىلعى ەليتالىق ديۆيزيونىندا ويناۋ ءۇشىن ا توبىنىڭ قۇرامالارى استاناداعى «بارىس ارەنادا» 2019 جىلدىڭ 29 ءساۋىر مەن 5 مامىر ارالىعىندا سىنعا تۇسەدى. وندا قازاقستان, بەلارۋس, وڭتۇستىك كورەيا, ۆەنگريا, سلوۆەنيا جانە ليتۆا قۇرامالارى قاتىسادى.
قازاقستان قۇراماسى ەكى جىل قاتارىنان ءبىرىنشى ديۆيزيوننان ەليتالىق الەم بىرىنشىلىگىنە وتە الماي كەلەدى. سوڭعى رەت وتانداستارىمىز ەليتالىق ديۆيزيوندا 2015 جىل ويناعان-دى.
ءالي بيتورە,
«ەگەمەن قازاقستان»
