ايماق باسشىسىنىڭ ايتۋىنشا, وتكەن جىلى قوستاناي وبلىسىندا «رۋحاني جاڭعىرۋ» باعدارلاماسى اياسىندا جۇزەگە اسىرىلۋى ءتيىس 24 شاعىن جوبا, بارلىعى 339 ءىس-شاراعا جالپى كولەمى 2723,686 ملن تەڭگە جۇمسالعان. بيىلعى جىلى باعدارلاما اياسىندا وڭىردە جالپى قۇنى 4586,5 ملن تەڭگەنى قۇرايتىن 85 جوبا, 46 شاعىن جوبا, بارلىعى 801 ءىس-شارا ىسكە اسىرىلۋدا.
– وبلىستا 100-دەن اسا مەكتەپتە مۋزەي اشىلىپ, 87 ىزدەۋ وتريادى قۇرىلدى. جىل اياعىنا دەيىن ولكەتانۋ باعىتىندا قوسىمشا 14 مەكتەپ مۋزەيى اشىلادى. وسى باعىتتا قوستاناي وبلىسىنا تانىمال تۇلعالار تۋرالى مالىمەتتەر مەن ەكسپوناتتار جيناستىرىلۋدا. ولاردىڭ دەنىن تانىمال تۇلعالاردىڭ ۇرپاقتارى, تۋىس-تۋعاندارى اكەلۋدە, – دەدى ارحيمەد مۇحامبەتوۆ.
ءباسپاسوز ءماسليحاتىندا ايتىلعانداي, 172 ملن تەڭگەدەن استام جەكە ينۆەستيتسيالاردىڭ ەسەبىنەن بالالارعا ارنالعان تەحنوپاركتەر مەن بيزنەس-ينكۋباتورلار جەلىسىن قۇرۋ ءۇشىن وبلىستىڭ بارلىق ايماقتارىندا 21 تسيفرلى تەحنولوگيالار كابينەتى اشىلىپتى. سونىمەن قاتار بۇگىنگى تاڭدا قوستاناي وبلىسىندا «مامانداندىرىلعان اقپاراتتىق تەحنولوگيالار مەكتەپ-ليتسەي-ينتەرناتى» جوباسىن ىسكە اسىرۋ باستالعان. وعان وبلىستىق بيۋدجەتتەن 178 ملن تەڭگەدەن استام قاراجات ءبولىندى.
– وتكەن جىلى مەتسەناتتاردىڭ كومەگىمەن كەيكى باتىر كەسەنەسى مەن تارحان شاقشاق جانىبەك ەسكەرتكىشى تۇرعىزىلىپ, بيۋدجەت قاراجاتى ەسەبىنەن ىبىراي التىنسارين كەسەنەسى قايتا جاڭعىرتىلدى. جالپى, ەلىمىزدەگى كيەلى ورىندار تىزىمىنە قوستاناي وبلىسىنان 29 نىسان ەنگىزىلگەن, سونىڭ ىشىندە 10 جالپىۇلتتىق جانە 19 جەرگىلىكتى نىسان بار. بيىلعى جىلى قاسيەتتى نىسانداردى جوندەۋ, قايتا جاڭعىرتۋ جانە اۋماقتارىن اباتتاندىرۋعا 88,5 ملن تەڭگە قاراجات جۇمسالادى. جوندەۋ جۇمىستارى سارىكول اۋدانىنداعى باراق باتىر كەسەنەسى مەن ۇزىنكول اۋدانىنداعى سۆياتونيكولسكايا شىركەۋىنە دە جۇرگىزىلەتىن بولادى,– دەدى اكىم.
بۇگىنگى تاڭدا وبلىستا «كوركەيە بەر, قوستاناي!» اكتسياسى كەڭ قانات جايىپ كەلەدى. سونىڭ ارقاسىندا وتكەن جىلى 2 ملرد 674 تەڭگەنىڭ 135 الەۋمەتتىك جوباسى ىسكە اسىرىلدى. جەرگىلىكتى كاسىپكەرلەر باعدارلامانىڭ «اتامەكەن» جوباسىنا ەرەكشە قولداۋ تانىتقانىن ايرىقشا اتاپ وتكەن ءجون. بيزنەس قۇرىلىمداردىڭ اتسالىسۋىمەن 101 ءبىلىم بەرۋ, دەنساۋلىق ساقتاۋ, مادەنيەت پەن سپورت مەكەمەلەرى جوندەلىپ, 61 الەۋمەتتىك نىساننىڭ ماتەريالدىق-تەحنيكالىق بازاسى جاڭارتىلعان, 18 بالالار جانە سپورت الاڭدارى ورناتىلعان.
وبلىس اكىمى بايانداماسىندا «اتامەكەن» جوباسى بويىنشا 2018 جىلى 4 ملرد 165 ملن تەڭگەنىڭ تاعى 140 الەۋمەتتىك جوباسى ىسكە قوسىلاتىنىن مالىمدەدى. بۇعان قوسا 1000 ورىنعا ارنالعان ۇلتتىق مادەني ورتالىق سالىنادى, سوتسياليستىك ەڭبەك ەرى كامشات دونەنباەۆانىڭ قۇرمەتىنە ساياباق اشىلىپ, ەسكەرتكىش ءمۇسىنى ورناتىلادى جانە قازاق حالقىنا العىس مونۋمەنتى بوي كوتەرەدى.
ءسوز سوڭىندا ا.مۇحامبەتوۆ ايماقتىڭ باستى بايلىعى ونىڭ ەل تاعدىرىنا جاۋاپتى ازاماتتارى ەكەنىن اتاپ ءوتتى.
ارنۇر اسقار,
«ەگەمەن قازاقستان»
