ءىس-شارا ەلباسى نۇرسۇلتان نازارباەۆتىڭ قۇتتىقتاۋ حاتىمەن اشىلدى. مەملەكەت باسشىسىنىڭ سوزىن قازاقستاننىڭ فرانتسياداعى توتەنشە جانە وكىلەتتى ەلشىسى جان عاليەۆ وقىپ بەردى.
«كوپتەگەن ەلدەردىڭ عالىمدارى مەن ساراپشىلارىنىڭ, تاريحشىلارى مەن ءتىل ماماندارىنىڭ قاتىسۋىمەن مۇنداي القالى جيىننىڭ ەۋروپا تورىندە, پاريج قالاسىندا ءوتۋىنىڭ ەرەكشە سيمۆولدىق ءمانى بار. الەمدىك وركەنيەتكە ولشەۋسىز ۇلەس قوسقان تۇركى جۇرتىنىڭ قارا شاڭىراعى ‒ قازاقستان سان مىڭ جىلدىق تامىرلى تاريحىنىڭ كەتكەنىن كەلتىرىپ, كەمىن تولتىرعان «مادەني مۇرا», «حالىقارالىق تاريح تولقىنىندا» سىندى باعدارلاماردى ىسكە اسىردى.
بىلتىردان بەرى تارلان تاريحتىڭ, جاسامپاز بۇگىنگى كۇن مەن جارقىن بولاشاقتىڭ كوكجيەكتەرىن ۇيلەسىمدى ساباقتاستىراتىن ۇلت جادىنىڭ تۇعىرناماسى ىسپەتتى «رۋحاني جاڭعىرۋ» باعدارلاماسىن قولعا الدى.
وسىنىڭ ناتيجەسىندە بارشا ادامزات تاريحىمەن ۇششتاساتىن تاريحي-مادەني مۇرالارىمىزدىڭ عىلىمي اينالىمداعى ءورىسى كەڭەيدى. داڭقتى بابالارىمىزدان ميراس بولعان رۋحاني قازىنالار حالقىمىزدى وتكەننىڭ وشپەس ونەگەسىمەن قاۋىشتىرىپ, جارقىن بولاشاققا جول اشتى.
مەنىڭ باستاماممەن استانادا اشىلعان حالىقارالىق تۇركى اكادەمياسى وسى باعىتتا جەمىستى جۇمىستار اتقارىپ كەلەدى. سونىڭ ءبىر ايعاعىنداي بۇگىنگى فورۋم ارقىلى ەۋرازيا ءتوسىن جايلاعان باۋىرلاس ەلدەردىڭ ورتاق مۇرالارى كەڭىنەن ۇلىقتالىپ, ەلارالىق, مادەنيەتارالىق ديالوگ ودان ءارى زور سەرپىنگە يە بولارىنا سەنەمىن. فورۋم جۇمىسىنا ساتتىلىك تىلەيمىن!», دەلىنگەن ەلباسىنىڭ فورۋم قاتىسۋشىلارىنا ارنالعان قۇتتىقتاۋ حاتىندا.
ج.عاليەۆ ءبىلىم مەن عىلىمنىڭ «عيباداتحاناسى» اتانعان يۋنەسكو-دا ءوتىپ جاتقان شارانىڭ ماڭىزىنا توقتالدى. سونداي-اق جيىندى ۇيىمداستىرعانى ءۇشىن حالىقارالىق تۇركى اكادەمياسىنا العىسىن جەتكىزدى.
سونىمەن قاتار فورۋم بارىسىندا ازەربايجان, قىرعىزستان پرەزيدەنتتەرىنىڭ قۇتتىقتاۋ حاتتارى وقىلدى. جيىن يۋنەسكو-نىڭ «مۇرانى ساقتاۋ, ناسيحاتتاۋ جانە جالعاستىرۋ» ستراتەگيالىق مىندەتىنە ۇلەس قوسۋ ماقساتىمەن ۇيىمنىڭ شتاب-پاتەرىندە ءوتىپ جاتىر. ەلباسىنىڭ «رۋحاني جاڭعىرۋ» باعدارلاماسىن ناسيحاتتاۋ ماقساتىندا ۇيىمداستىرىلعان ءىس-شارا تۇركى الەمىنىڭ قۇندىلىقتارىن زەرتتەپ, زەردەلەۋ جانە ناسيحاتتاۋدى ماقسات ەتكەن.
جيىنعا 16 ەلدەن عىلىم, مادەنيەت جانە قوعام قايراتكەرلەرى, ساياساتكەرلەر مەن ديپلوماتتار قاتىستى. فورۋم بارىسىندا قاتىسۋشىلار «تۇركى جازبا ەسكەرتكىشتەرى», «تۇركى ءتىلى مەن ادەبي-مادەني مۇرالارى», «تۇركى تىلدەرىنىڭ تارالۋ ارەالدار» ماسەلەلەرى توڭىرەگىندە باياندامالار جاسايدى.
اباي اسانكەلدى ۇلى
«ەگەمەن قازاقستان»
پاريج
