«وقۋلىق» رەسپۋبليكالىق عىلىمي-پراكتيكالىق ورتالىعى مەن قىزدار ۋنيۆەرسيتەتىنىڭ ۇيىتقى بولۋىمەن ۇيىمداستىرىلعان باسقوسۋعا قازاقستاندىق جانە شەتەلدىك عالىمدار مەن كىتاپ باسپالارىنىڭ باسشىلارى قاتىستى.
كونفەرەنتسيانى «وقۋلىق» رەسپۋبليكالىق عىلىمي-پراكتيكالىق ورتالىعىنىڭ ديرەكتورى بەيبىتكۇل كارىموۆا اشىپ, جۇرگىزىپ وتىردى.
قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆا باسقوسۋدىڭ ءمانى مەن ماڭىزى تۋراسىندا بايانداپ, ونىڭ ءبىلىم بەرۋ رەسۋرستارىن جاڭعىرتۋداعى ءرولىن كەڭىنەن اتاپ ءوتتى.
– الەمدىك وركەنيەتتىڭ نەگىزگى قوزعاۋشى كۇشى ءبىلىم ەكەنى بارشاعا بەلگىلى اقيقات. عىلىمعا قول جەتكىزۋ, ونىڭ جەتىستىكتەرىن قوعامدىق ومىرگە, ەلدىڭ يگىلىگىنە پايدالانۋ, ءبىلىمدى دە پاراساتتى ۇرپاق تاربيەلەۋ حالقىمىزدىڭ قاشاننان بەرگى باستى ماقساتى بولدى. بۇگىنگى باسەكە زامانىندا عىلىم مەن تەحنولوگيانى جەتىلدىرمەي, شىن مانىسىندە تاۋەلسىز ەل بولۋ مۇمكىن ەمەس. ويتكەنى, عىلىم – ادامزات ءومىرىنىڭ ەڭ شەشۋشى فاكتورىنا اينالىپ وتىر. ەلدىڭ شارۋاشىلىعىن, مادەنيەتىن, ونىڭ قورعانىس قابىلەتىن جان-جاقتى دامىعان عىلىم عانا قامتاماسىز ەتە الادى. «جاقسى وقۋلىق – ۇلتتىڭ يگىلىگى, رۋحاني قۇندىلىعى». وقۋلىق دايارلاۋ ىسىنە قازىر ۇلتتىق سيپات, مەملەكەتتىك ماڭىز بەرىلىپ وتىر. وقۋلىق قۇراستىرۋدا جاڭا تەحنولوگيانى ورىندى پايدالانۋ – ستۋدەنتتىڭ جان-جاقتى قۇزىرەتتىلىگىن دامىتۋعا, شىعارماشىلىق, سىني ويلاۋ قابىلەتتەرىن قالىپتاستىرۋعا باعىت بەرەدى. ءبىلىم بەرۋدىڭ ۇلتتىق مودەلىنە ءوتۋ يننوۆاتسيالىق پەداگوگيكالىق تەحنولوگيالاردى يگەرۋدى قاجەت ەتەدى, ال يننوۆاتسيالىق تەحنولوگيا دەگەنىمىز – پەداگوگتىڭ ءبىلىمى مەن بىلىگى, زياتكەرلىك قابىلەتى. قازىرگى جاس ۇرپاقتىڭ سانالى دا ساپالى ءبىلىم الۋىنىڭ شارتى – وقۋ پروتسەسى مەن وعان قاجەتتى ماتەريالداردى ۇنەمى جاڭالاۋ, جاڭعىرتۋ, – دەدى گ. الدامبەرگەنوۆا.
سونىمەن قاتار, كونفەرەنتسيانىڭ پلەنارلىق ماجىلىسىندە انگليانىڭ «Foxton books» باسپاسىنىڭ باسشىسى يۋسۋف ۆۋز «كوپتىلدى ءبىلىم بەرۋ جانە اعىلشىن ءتىلدى وقۋلىقتاردا ءماتىندى دەڭگەيلەپ بەرۋ ماڭىزدىلىعى», ى. التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى جانبول جىلباەۆ ء«بىلىم بەرۋ مازمۇنىن جاڭعىرتۋ – قازىرگى زاماننىڭ سىن-تەگەۋرىندەرىنە جاۋاپ رەتىندە», وزبەك مەملەكەتتىك الەم تىلدەرى ۋنيۆەرسيتەتىنىڭ پروفەسسورى ماحانبەت دجۋسۋپوۆ «كيريلل ءالىپبيىنىڭ قىزمەت ەتۋ جاعدايىندا لاتىن الىپبيىنە كوشۋ», ۆەنگريانىڭ «Mozaik Education» باسپاسىنىڭ باس ديرەكتورىنىڭ ورىنباسارى پەتەر توروك «Mozabook» تسيفرلىق ءبىلىم بەرۋ پلاتفورماسى» تاقىرىپتارىندا بايانداما جاسادى.
كونفەرەنتسيا جۇمىسى «زاماناۋي ءبىلىم بەرۋ ورتاسى جانە پەداگوگ كادرلاردى دايارلاۋ», ء«بىلىم مازمۇنىن جاڭارتۋ جاعدايىندا ءبىلىم بەرۋ رەسۋرستارىن ءارتاراپتاندىرۋ جانە وقۋ ادەبيەتتەرىن ازىرلەۋ مەن ساپاسىن باعالاۋدىڭ جاڭا تاسىلدەمەلەرى», ء«بىلىم بەرۋ رەسۋرستارىن تسيفرلاندىرۋ – جاڭا ءبىلىم مەن ۇزدىك ءبىلىم بەرۋ تاجىريبەلەرىن مەڭگەرۋدىڭ داڭعىل جولى», «وقۋ ادەبيەتتەرىن لاتىن الىپبيىنە كوشىرۋدىڭ ادىستەمەلىك ماسەلەلەرى» جانە ء«ۇش ءتىلدى وقىتۋ جۇيەسىنە كوشۋ جاعدايىندا وقۋ باسىلىمدارىن ازىرلەۋ: تاجىريبە جانە بولاشاعى» اتتى سەكتسيا جۇمىستارىندا جالعاستى. وندا وقۋلىق اۆتورلارى تاقىرىپ توڭىرەگىندە وزىندىك ويلارىن ايتىپ, پايىمدى پىكىرلەرىمەن ءبولىستى.
سونىمەن قاتار جيىن شەڭبەرىندە مەكتەپكە دەيىنگى تاربيە مەن وقىتۋعا ارنالعان وقۋلىقتار مەن وقۋ-ادىستەمەلىك قۇرالدارى اۆتورلارىمەن قاتىسۋىمەن دوڭگەلەك ۇستەل, شەبەرلىك سىنىپتارى ءوتتى.
