ساپار بارىسىندا اكىم فينليانديا سىرتقى ىستەر مينيسترلىگى مەملەكەتتىك حاتشىسىنىڭ ورىنباسارى م.كەينيانەنمەن كەزدەستى. كەزدەسۋدە ەكىجاقتى ارىپتەستىكتى دامىتۋ ماسەلەلەرى ءسوز بولدى.
التاي كولگىنوۆ قازاقستان رەسپۋبليكاسىندا, سونىڭ ىشىندە باتىس قازاقستان وڭىرىندە قولعا الىنعان «جاسىل» ەكونوميكانى دامىتۋدىڭ بارىسى, مەملەكەت باسشىسى العا قويعان ەكونوميكانى جاڭعىرتۋ ستراتەگيالىق تاپسىرماسى تۋرالى ايتىپ بەردى. وسىعان بايلانىستى قالپىنا كەلتىرىلەتىن قۋات كوزدەرىن پايدالانۋ, قالدىقتاردى وڭدەۋ سالاسىن جەتىلدىرۋ سەكىلدى ماڭىزدى باعىتتار ءوڭىر ەكونوميكاسىن دامىتۋدا باسىم باعىتقا يە بولعان.
حەلسينكيدە قازاقستاندىق دەلەگاتسيا فينليانديانىڭ «VTT» تەحنولوگيالىق زەرتتەۋلەر ورتالىعى ازىرلەگەن «سمارت-سيتي» تەحنولوگياسىن ەندىرۋدىڭ جاڭا تۇجىرىمداماسىمەن جانە قالدىقتاردى وڭدەۋ وندىرىسىمەن تانىستى.
ەسپوو قالدىقتاردى وڭدەۋ ورتالىعىن ارالاپ كورگەن ءوڭىر باسشىسى فينليانديانىڭ استاناسى مەن ونىڭ ماڭىنداعى ەلدى مەكەندەرگە قىزمەت كورسەتەتىن «HSY» مۋنيتسيپالدىق كاسىپورنىنىڭ جۇمىسىمەن جاقىن تانىستى. دەلەگاتسيا باسشىسى باتىس قازاقستان وبلىسى سۋوميمەن وزىق تەحنولوگيا سالاسىنداعى ارىپتەستىكتى ودان ءارى دامىتۋعا مۇددەلى ەكەندىگىن ءبىلدىردى. فين جاعىنىڭ قاتىسۋىمەن ورال قالاسىندا ىسكە قوسىلادى دەپ كۇتىپ وتىرعان قالدىق وڭدەيتىن ەكولوگيالىق كەشەندە وسى زامانعى ەڭ وزىق تەحنولوگيالار پايدالانىلماق.
جوبالاۋشىلاردىڭ پىكىرىنشە, بۇل قالدىقتى جيناۋ, تاسىمالداۋ, سۇرىپتاۋ, وڭدەۋ ماسەلەلەرىن قامتيتىن كەشەندى ينفراقۇرىلىم بولماق.
ساپار بارىسىندا حەلسينكي قالاسىندا باتىس قازاقستان وبلىسى اكىمدىگى, فين بيزنەس-حابى جانە مەن «Collaprime» كومپانياسى اراسىندا ارىپتەستىك تۋرالى ۇشجاقتى كەلىسىمگە قول قويىلدى.
ايتا كەتۋ كەرەك, باتىسقازاقستاندىقتار مەن فين كومپانيالارى ارىپتەستىگىنىڭ العىشارتى 2017 جىلى استانا قالاسىندا وتكەن «ەكسپو-2017» حالىقارالىق كورمەسىندە جاسالدى. ودان كەيىن دە باتىس قازاقستان اكىمدىگى مەن «Collaprime» كومپانياسى باسشىلارى بىرنەشە مارتە كەزدەسىپ, ورال قالاسىنداعى كاسىپتىك-تەحنيكالىق ارناۋلى وقۋ ورىندارىندا 3D-جوبالاۋ سالاسى بويىنشا وقىتۋشىلاردىڭ بىلىكتىلىگىن ارتتىرىپ, جاڭا ماماندىققا دايارلاۋ دايىندىعى باستالعان بولاتىن.
ورال قالاسىندا «Smart City Uralsk» جوباسى قولعا الىنىپ, قازىردىڭ وزىندە قالا تۇرعىندارىنىڭ ومىرىنە ءىت تەحنولوگياسى دەندەپ ەنىپ بارادى. فيندىك BIM جانە 3D-جوبالاۋ تەحنولوگياسىن باتىس قازاقستان ءوڭىرىنىڭ كوممۋنالدىق ينفراقۇرىلىمى مەن قۇرىلىس سالاسىندا كەڭىنەن قولدانۋ ەكىجاقتى پايدالى بولارى انىق.
كوپتەگەن حالىقارالىق سىيلىقتاردىڭ جەڭىمپازى اتانعان «Collaprime» كومپانياسى 2016 جىلى فينليانديدا BIM-تەحنولوگيا بويىنشا ەڭ ۇزدىك ۇيىم اتاۋىنا يە بولعان.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان وبلىسى
