الەمنىڭ 18 مەملەكەتىنەن 155 كومپانيا مەن ۇيىم وكىلدەرى قاتىسقان كورمە الاڭىندا رەسەي, پولشا, ۇلىبريتانيا, بەلارۋس, ازەربايجان, تاجىكستان, تۇركيا, قىتاي, ءۇندىستان, البانيا جانە باسقا مەملەكەتتەردىڭ باسپالارى ءوز ونىمدەرىن اكەلگەن. سونىمەن قاتار بيىل قازاقستاندا وزبەكستان جىلى جاريالانعاندىقتان, وزبەك باسپالارىنا, كىتاپ شىعارۋ كومپانيالارىنا ايرىقشا كوڭىل بولىنگەن. وسى ورايدا ايتۋلى شاراعا ارنايى كەلىپ ءسوز سويلەگەن وزبەكستاننىڭ باسپا ءىسى جانە اقپارات اگەنتتىگى ديرەكتورىنىڭ ءبىرىنشى ورىنباسارى سابىر شۇكىروۆ «كورمە ارقىلى مادەني, ىسكەرلىك بايلانىستار نىعايىپ, الەم بويىنشا كىتاپ يندۋسترياسىن زەردەلەۋگە مۇمكىندىك تۋادى», دەدى.
سونىمەن ءۇش كۇنگە جوسپارلانعان كىتاپ تانىستىرىلىمى, اۆتورلارمەن كەزدەسۋ, وزگە دە ءىس-شارالار كۇن ءتارتىبى تىعىز ورنالاستىرىلعان كورمە-جارمەڭكەدە ەكى كۇننىڭ ىشىندە كوپتەگەن كىتاپتاردىڭ تۇساۋى كەسىلدى. سونىڭ ىشىندە قازاق تىلىندە جارىق كورگەن كىتاپتاردىڭ ءوزى از ەمەس ەكەن. كورمەنىڭ العاشقى كۇنى, قازاقتىڭ ءارى بي, ءارى عۇلاماسى, ورتا ءجۇزدىڭ ەل اعاسى بولعان اتاقتى انەت بابا تۋرالى ەرلان سىدىقوۆ, جامبىل ارتىقباەۆ قۇراستىرعان «انەت بابا: عۇمىرى مەن زامانى» كىتابىنىڭ تۇساۋى كەسىلىپ, ءارى قاراي جالعاسىن تاپتى. بەلگىلى پۋبليتسيست ساۋىتبەك ابدراحمانوۆتىڭ ءتول ادەبيەتىمىزدىڭ وزەكتى ماسەلەلەرىن كەڭىنەن قوزعايتىن «ادەبيەت الەمى» كىتابىنىڭ تانىستىرىلىمى دا تاماشا ءوتتى. تانىستىرىلىمدا وقىرمان ادامزات تاريحىنداعى ارعى-بەرگىدەگى جاۋھار تۋىندىلار تۋرالى تالداۋلار مەن كوركەم اۋدارمانىڭ كوكجيەگى جايىندا مول ماعلۇماتقا قانىعىپ, اۆتوردىڭ زياتكەرلىك قۋاتىنا ءتانتى بولدى.
سودان كەيىن تاعى ءبىر ەرەكشە جاعداي – قازاق تىلىنە اۋدارىلعان «جاڭا زامان ازەربايجان پوەزياسىنىڭ انتولوگياسى» جيناعىنىڭ تانىستىرىلىمى بولدى. سالتاناتتى راسىمگە قانداس اقىنداردان ەكبەر گوشالى, يلگار تۇركوگلى, يىلماز وكۋگلى قاتىستى.
تاناگوز تولقىنقىزى, داۋلەتكەرەي كاپ ۇلى باستاعان اقىنداردىڭ مۇرىندىق بولۋىمەن 40-تان استام قانداس اقىنداردىڭ ولەڭدەرى ەنگەن كىتاپتىڭ تۇساۋىن قازاقستان جازۋشىلار وداعىنىڭ توراعاسى ۇلىقبەك ەسدəۋلەت جانە ازەربايجاننىڭ قازاقستانداعى توتەنشە جانە وكىلەتتى ەلشىسى راشاد مامەدوۆ كەستى.
سونىمەن بىرگە اتالمىش شارا اياسىندا بەلگىلى عالىم شەرۋباي قۇرمانباي ۇلىنىڭ «كوركەم اۋدارماداعى جاڭا اتاۋلار: جاسالۋى مەن قولدانىسى» كىتابىنىڭ تانىستىرىلىمى بولدى.
بۇل ەڭبەكتە الەم ادەبيەتى جاۋھارلارىن قازاق تىلىنە اۋدارۋ كەزىندە جاسالىپ, قالىپتاسقان جانە كوركەم اۋدارماعا عىلىم ءتىلى مەن باق تىلىنەن ەنگەن جاڭا اتاۋلار مەن قولدانىستار ارنايى جينالىپ, تىلدىك تۇرعىدان زەرتتەلگەن. اۆتور قازىرگى كوركەم اۋدارما سالاسىنداعى ءسوزجاسام, تەرمينجاسام تاجىريبەسىنە جان-جاقتى توقتالىپ, وقىرماندارىمەن وي ءبولىستى.
سونىمەن قاتار كورمەدە اقىن, جازۋشى-پۋبليتسيست ەربول شايمەردەننىڭ «قازاق افوريزمدەرى» كىتابىنىڭ دا تانىستىرىلىمى ءوتتى. بۇل انتولوگيادا ءتۇرلى تاريحي كەزەڭدە ءومىر سۇرگەن 80-گە جۋىق تۇلعانىڭ تولعام-پايىمدارى توپتاستىرىلعان.
كورمە-جارمەڭكەنىڭ ەكىنشى كۇنى جازۋشى ءشاربانۋ بەيسەنوۆانىڭ ەلوردامىزدىڭ 20 جىلدىعىنا ارنالعان «بوزوق ارۋى» كىتابىنىڭ تانىستىرىلىمى دا كوپشىلىكتىڭ كوڭىلىنەن شىقتى. « ۇلى دالا ارۋلارى» توپتاماسىمەن شىعىپ وتىرعان ەكىنشى كىتاپ ۇلت تاريحىنان ەرەكشە ورىن الىپ, ەل جادىندا ساقتالعان اۋليە انالار ومىرىنەن سىر شەرتەدى. تانىستىرىلىم بارىسىندا اۆتور كىتاپ مازمۇنىنا قىسقاشا توقتالىپ, سۇحبات بەردى.
تاريح عىلىمدارىنىڭ دوكتورى, ايگىلى ارحەولوگ ساماشەۆ زەينوللانىڭ «بەرەل ارتەفاكتىلەرىنىڭ الەمدىك ماڭىزى» كىتابىنىڭ تانىستىرىلىمى دا ەرەكشە سيپاتقا يە بولدى. اۆتور دۇنيە جۇزىنە اتى شىققان بەرەل ارتەفاكتىلەرىنىڭ الەمدىك ماڭىزى تۋراسىندا كەلەلى اڭگىمە قوزعادى.
سونداي-اق بەلگىلى سىنشى امانگەلدى كەڭشىلىك ۇلى قازاقتىڭ عاجايىپ اقىنى, مەملەكەتتىك سىيلىقتىڭ لاۋرەاتى جۇمەكەن ناجىمەدەنوۆتىڭ شىعارماشىلىعى جونىندە جازعان «رۋح جىرى» كىتابىنىڭ تانىستىرىلىمىندا جۇمەكەن شىعارماشىلىعىن جان-جاقتى تالداپ, وقىرماندارىمەن وي ءبولىستى.
«فوليانت» باسپاسى ۇيىمداستىرىپ وتىرعان اتالمىش كورمە-جارمەڭكەدە بۇدان وزگە ادەبي شارالار, ورىس جانە وزگە تىلدەردەگى شەتەلدىك اۆتورلاردىڭ كىتاپتارىنىڭ دا تانىستىرىلىمى بولىپ جاتىر. الدا تانىستىرىلاتىن كىتاپتاردىڭ ىشىندە مەملەكەتتىك ورتالىق مۋزەي قىزمەتكەرى, ەتنولوگ عالىم نۇرسان ءالىمبايدىڭ «قازاقتىڭ ەتنوگرافيالىق كاتەگوريالار, ۇعىمدار مەن اتاۋلارىنىڭ ءداستۇرلى جۇيەسى» اتتى 5 تومدىعىنىڭ دا تۇساۋى كەسىلەدى. نۇرسان ءالىمبايدىڭ يدەياسى بويىنشا قولعا الىنىپ, ەتنولوگيا بولىمىندە دايىندالعان عىلىمي-زەرتتەۋ جۇمىسى – جالپى 10 مىڭ اتاۋ مەن ۇعىمدى قامتىعان بىرەگەي ەڭبەك. كەزدەسۋ بارىسىندا وسى ىرگەلى ەڭبەككە جەتەكشىلىك ەتكەن عالىم نۇرسان الىمبايمەن سۇحبات وتكىزىلىپ, وقىرمان قاۋىم ەنتسيكلوپەديامەن تانىسۋعا مۇمكىندىك الادى.
ۇلاربەك نۇرعالىم ۇلى,
«ەگەمەن قازاقستان»
