قازىرگى تاڭدا وبلىستا 25 مۇناي ءوندىرۋ جانە 20-دان استام مۇنايسەرۆيستىك كومپانيا جۇمىس ىستەيدى. وندىرىستىك كاسىپورىنداردا ون مىڭداعان جوعارى بىلىكتى جەرگىلىكتى ماماندار بار. 2017 جىلى قازاقستاننىڭ بارلىق كەن ورىنىندا 86,2 ملن.ت. مۇناي مەن گازكوندەنساتى وندىرىلسە, ونىڭ ىشىندە ماڭعىستاۋ وبلىسى بويىنشا 18 ملن.توننا مۇناي ءوندىرىلىپ, رەسپۋبليكادا وندىرىلگەن مۇنايدىڭ 20% قۇراپ وتىر. جالپى العاندا, ماڭعىستاۋ – اتىراۋ وبلىسىنان كەيىنگى ەكىنشى ءىرى مۇناي وندىرەتىن ءوڭىر. وبلىستاعى كەن ورىندارىنىڭ اشىلۋى, يگەرىلۋى, ءوڭىر ەكونوميكاسىن ورلەتۋگە مول مۇمكىندىك بەرەتىنىنە كۇمان جوق. 2017 جىلى وبلىستا جالپى گاز ءوندىرۋ 2,4 ملرد. تەكشەمەتر قۇرادى.
ايماق باسشىسى ە.توعجانوۆ گەولوگتاردى كاسىبي مەرەكەسىمەن قۇتتىقتاپ, ەل دامۋىنا قوسقان قاجىرلى ەڭبەكتەرى ءۇشىن العىس ءبىلدىردى.
- ماڭعىستاۋ وبلىسى جىل سايىنعى تۇتىنۋ كولەمى شامامەن 2 ملرد تەكشە مەتر بولاتىن نەگىزگى گاز تۇتىنۋشىلارىنىڭ ءبىرى بولىپ تابىلادى. سونداي-اق, وبلىس اۆتوموبيل كولىگىن گازداندىرۋ بويىنشا العاشقىلاردىڭ قاتارىندا (بۇگىنگى تاڭدا اۆتوكولىكتەردىڭ شامامەن 70% جانارماي رەتىندە گازدى پايدالانادى). سوندىقتان گەولوگتاردىڭ ەڭبەگىنىڭ تەك ماڭعىستاۋ وبلىسىندا عانا ەمەس, تۇتاستاي العاندا رەسپۋبليكامىزدىڭ ەكونوميكالىق سالاسىنداعى ەرەكشە ءرولى مەن ماڭىزدىلىعىن اتاپ ايتۋعا ءتيىستىمىز, دەدى ماڭعىستاۋ وبلىسىنىڭ اكىمى ەرالى توعجانوۆ.
ماڭعىستاۋ وبلىسى اكىمىنىڭ اتىنان «گەولوگ كۇنى» كاسىبي مەرەكەسىنە وراي ماڭعىستاۋ وبلىسىندا گەولوگيا سالاسىنىڭ دامۋىنا قوسقان ۇلەسى ءۇشىن
«كەنسارى» جاۋاپكەرشىلىگى شەكتەۋلى سەرىكتەستىكتىڭ باس گەولوگى رازاعۇل ايبازاروۆ, گەولوگيا سالاسىنىڭ ارداگەرى جۇمان قالدىباي, «ماڭعىستاۋ-گەولوگيا» جاۋاپكەرشىلىگى شەكتەۋلى سەرىكتەستىكتىڭ عىلىمي-وندىرىستىك ورتالىعىنىڭ ديرەكتورى اۆتانديل گاۆاشەليشۆيلي, «ەمىر-ويل» جاۋاپكەرشىلىگى شەكتەۋلى سەرىكتەستىكتىڭ گەولوگى اقزيبا ساتىبالديەۆا جانە تاعى باسقا گەولوگتار ماراپاتتالدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
