ەلباسى ۇسىنعان بەس الەۋمەتتىك باستاما بارلىق قوعام مۇشەلەرى ءۇشىن ماڭىزدى. ەلىمىز وسى ۋاقىتقا دەيىن باسپانا الۋ مۇمكىندىكتەرىن كەڭەيتۋ بويىنشا كوپتەگەن شارالار اتقاردى. ال «7 – 20 – 25» جاڭا باعدارلاماسى ءاربىر وتباسىنا باسپانا الۋدىڭ مۇمكىندىگىن جاساپ, اسىرەسە قاراپايىم تۇرعىنداردىڭ قولجەتىمدىلىگى ارتادى. ەلباسى ۇسىنعان فورمۋلانىڭ مازمۇنى قوعام مۇشەلەرى ءۇشىن تۇسىنىكتى جانە اشىق.
پرەزيدەنتتىڭ ەكىنشى باستاماسىندا جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن ازايتۋ ۇسىنىلادى. ەلباسى وتانداستارىمىزدى قولداۋ ماقساتىندا كەلەسى جىلدىڭ 1 قاڭتارىنان باستاپ جالاقىسى تومەن جۇمىسشىلاردىڭ سالىق جۇكتەمەسىن 10 ەسەگە ازايتىپ, 1 پروتسەنت قانا سالىق سالۋ جونىندە باياندادى. بۇل ۇستانىم 2 ميلليوننان استام ادام جالاقىسىنىڭ جۇمىس بەرۋشىگە سالماق سالماي كوبەيۋ مۇمكىندىگىن بەرەدى.
ءۇشىنشى باستاما تىكەلەي ەلىمىزدىڭ بولاشاعى – وسكەلەڭ ۇرپاق پەن جاستارعا ارنالعان. ەلىمىزدىڭ جاستارعا دەگەن ايقىن كورىنىسى رەتىندە جاڭا وقۋ جىلىنان باستاپ قوسىمشا 20 مىڭ گرانت ءبولىنۋىن ايتۋىمىزعا بولادى. بۇل گرانتتاردىڭ 11 مىڭى تەحنيكالىق ماماندىقتار بويىنشا باكالاۆرلىق ءبىلىم بەرۋگە تيەسىلى. باستاما قازاقستاننىڭ ءتورتىنشى ونەركاسىپتىك رەۆوليۋتسيا جاعدايىنداعى جاڭا ەكونوميكادا زور سۇرانىسقا يە بولاتىن ينجەنەرلەر, اقپاراتتىق تەحنولوگيا, روبوت-تەحنيكا, نانوتەحنولوگيا سالاسىنىڭ ماماندارىن دايارلاۋعا مۇمكىندىك بەرەدى. ەلباسى قازىر جوعارى وقۋ ورىندارى مەن كوللەدجدەردىڭ ستۋدەنتتەرىن جاتاقحانامەن قامتاماسىز ەتۋ ماسەلەسىنىڭ وزەكتى ەكەندىگىن ايتا وتىرىپ, 2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىردى. اتالمىش مىندەتتى جۇزەگە اسىرۋ ءۇشىن مەملەكەت پەن جەكەمەنشىكتىڭ سەرىكتەستىگى قاعيداسىن پايدالانۋدى ۇسىندى.
پرەزيدەنتتىڭ «شاعىن نەسيە بەرۋدى كوبەيتۋ» ءتورتىنشى باستاماسى جاپپاي كاسىپكەرلىكتى دامىتۋعا سەرپىن بەرەتىندىگى انىق. ەلىمىز بۇل باعىتتى دامىتۋ بويىنشا باعدارلامالار مەن قولداۋ قۇرالدارىن جەتىلدىرۋ ۇستىندە. باستاماعا سايكەس وسى جىلى شاعىن نەسيەلەردىڭ جالپى سوماسى ارتىپ, قوسىمشا 20 ميلليارد تەڭگە بولىنەتىن بولدى.
«ەلدى گازبەن قامتاماسىز ەتۋدى جالعاستىرۋ» اتتى ەلباسىنىڭ بەسىنشى باستاماسى ەلدىڭ ميلليونداعان تۇرعىندارىن گازبەن قامتاماسىز ەتۋمەن قاتار, شاعىن جانە ورتا بيزنەستىڭ جاڭا وندىرىستەرىن اشۋعا مۇمكىندىك بەرەدى. سونىمەن بىرگە ەلىمىزدىڭ ەكولوگيالىق احۋالىن جاقسارتاتىندىعىنا سەنىمدىمىز.
مەملەكەت باسشىسى ەلىمىزدىڭ الەۋمەتتىك جاڭعىرۋ جولىندا جاڭا, اۋقىمدى قادام جاساۋعا دايىن ەكەندىگىن ايتتى. نەگىزىنەن الەۋمەتتىك جاڭعىرۋ بارلىق ازاماتتاردىڭ مۇقتاجدىقتارى مەن مۇددەلەرىن جۇزەگە اسىرۋ بارىسىنداعى قوعامنىڭ دامۋ قۇرىلىمىن جەتىلدىرۋ ۇدەرىسى بولىپ تابىلادى. بۇل جاڭا مەن ەسكىنىڭ, زاماناۋي جانە ءداستۇرلى ۇستانىمدار نەگىزىندە وزگەرىستەرگە ۇشىرايتىن قوعامنىڭ وڭتايلى جانە ءتيىمدى قىزمەتىنىڭ كورىنىسى. جاڭا باعدارلاماداعى بارلىق باسىم باعىتتار, مىندەتتەر مەن ماقساتتار مەملەكەتتىك ورگاندار, تۇرعىندار, ساراپشىلار مەن عالىمدار ءۇشىن ترانسپارەنتتى قۇبىلىس. سوندىقتان ەلباسىنىڭ ەلدىڭ يگىلىگى ءۇشىن ۇسىنعان ۇتىمدى, وپتيميستىك جوباسى مەملەكەت تاريحىنداعى ماڭىزدى باعدارلاما بولىپ قالا بەرەتىندىگىنە سەنەمىز.
مۇرات ناسيموۆ,
ساياسي عىلىمدار كانديداتى, قاۋىمداستىرىلعان پروفەسسور, «بولاشاق» عىلىمي-زەرتتەۋ ينستيتۋتىنىڭ ديرەكتورى
قىزىلوردا
