«جاس وتاننىڭ» جاڭا بەلەسى
ەلباسى, «نۇر وتان» پارتياسىنىڭ توراعاسى نۇرسۇلتان نازارباەۆ 2017 جىلدىڭ قاراشا ايىندا وتكەن پارتيانىڭ ساياسي كەڭەسىنىڭ وتىرىسىندا ۇيىمنىڭ قىزمەتىن جاڭعىرتۋ جونىندە ناقتى تاپسىرما بەرگەنى بەلگىلى. بۇل تاپسىرمالاردىڭ «جاس وتان» جاستار قاناتىنا دا تىكەلەي قاتىسى بار ەكەنى انىق. بۇل باعىتتا جاس بەلسەندىلەر ءبىرىنشى كەزەكتە وزدەرىنىڭ ورتالىق كەڭسەسىن تۇبەگەيلى وزگەرتىپ, «open spase» فورماتىنا كوشتى.
كەزەكتى سەزدىڭ اشىلۋىندا ادەتتەگىدەي باياندامالار وقىلماي, سۇراق-جاۋاپ ءتاسىلى قولدانىلدى.
– وسىدان 17 جىل بۇرىن كىشىگىرىم ۇيىرمەدەن باستالعان ۇيىم بۇگىندە اۋقىمدى قوزعالىس دارەجەسىنە جەتىپ, ۇلكەن ساياسي كۇشكە اينالدى. ەلىمىزدىڭ جالىندى جاستارىنىڭ دەنى جاسوتاندىقتاردىڭ قاتارىندا. ءبىز ەلباسىنىڭ تاپسىرماسىنا ساي كەز كەلگەن جاڭاشىلدىقتان تايسالماي, قوعامدىق وزگەرىستەرگە دايىن بولۋىمىز كەرەك. وسى ورايدا جاستاردىڭ قازىرگى يننوۆاتسيالىق جاڭالىقتارىن قولداپ, الەمدەگى وزگەرىستەردەن كەندە قالماي, الدىڭعى قاتارعا شىعۋعا مىندەتتىمىز, – دەدى «جاس وتان» جاستار قاناتىنىڭ توراعاسى دانيار سۇندەتباەۆ.
سەزدەر ارالىعىنداعى كەزەڭ بويىنشا ەسەپ بەرگەن توراعا جاستار ۇيىمىنىڭ وتكەنىنە شولۋ جاساپ ءوتتى.
بيىلعى جىلدىڭ باسىندا «جاس وتاننىڭ» تاريحىندا العاش رەت ورتالىق كەڭەسكە سايلاۋ ونلاين تاسىلىمەن وتكەن. بۇل اشىق باسەكەدە ەلىمىزدىڭ ءار تۇكپىرىنەن 363 ۇمىتكەر ءوز كانديداتۋراسىن ۇسىنىپ, ولاردىڭ 16-سى ورتالىق كەڭەس مۇشەلىگىنە ەنگەن. جەڭىسكە جەتكەندەردىڭ قاتارىندا جاس كاسىپكەرلەر, ەرىكتىلەر قوزعالىسىنىڭ بەلسەندىلەرى مەن ونەر سالاسىنىڭ وكىلدەرى بار.
د.سۇندەتباەۆتىڭ ايتۋىنشا, جاسوتاندىقتار جۇزەگە اسىرعان «NURINTECH», ء«ساتتى قادام», «جاستار – وتانعا» جوبالارىنا جاستار بەلسەنە قاتىسقان جانە جوعارى ناتيجەلەرگە قول جەتكىزگەن. ماسەلەن سوڭعى ەكى جىلدىڭ وزىندە جاستار ۇيىمىنىڭ مۇرىندىق بولۋىمەن 10 مىڭداي جاس مامان تۇراقتى جۇمىسقا ورنالاسقان. يننوۆاتسيالىق جوبالار بايقاۋىنا دا ەكى مىڭعا جۋىق ءوتىنىش ءتۇسىپ, ولاردىڭ ۇزدىكتەرى مەملەكەت دەڭگەيىندە اتالىپ ءوتتى. ونىڭ ىشىندە جاس ونەرتاپقىش ماۋلەن بەكتۇرعانوۆتىڭ بيونيكالىق پروتەز جاساۋ ءتاسىلى ساپاسى مەن قولجەتىمدىلىگىنە بايلانىستى الەمدەگى وزىق ۇلگىلەردەن دە ءتيىمدى سانالىپ وتىر.
وتكەن جىلى تۇركى كەڭەسىنە مۇشە مەملەكەتتەردىڭ جاستارى, اتاپ ايتقاندا قازاقستان, قىرعىزستان, تۇركيا مەن ازەربايجاننىڭ وكىلدەرى وڭتۇستىك قازاقستان وبلىسىندا ۇيىمداستىرىلعان تاريحي, رۋحاني جانە ساياسي لاگەردە تىنىققان. بۇل جوبا قاتىسۋشىلاردىڭ كوڭىلىنەن شىعىپ, ونى الداعى ۋاقىتتا اتالعان ەلدەردىڭ بىرىندە وتكىزۋ تۋرالى ۇسىنىس بەرىلگەن.
سەزد بارىسىندا اۋىز تولتىرىپ ايتارلىق جاعىمدى مالىمەتتەر مەن جەتىستىكتەردى جاستار قاناتىنىڭ باقىلاۋ-رەۆيزيالىق كوميسسياسىنىڭ توراعاسى ەۆگەني كوچەتوۆ باياندادى. رەسمي مالىمەتتەرگە قاراعاندا, بۇگىندە «جاس وتان» مۇشەلەرىنىڭ سانى 164 مىڭنان اسقان. قازاقستان بويىنشا اۋقىمدى شارالارعا تارتىلعان 1,5 ملن ادام – ەلىمىزدەگى جاستاردىڭ ۇشتەن ءبىرىن قۇرايدى. بۇل ءاربىر قالا, اۋدان مەن اۋىلداعى, ءوندىرىس جانە وقۋ ورىندارىنداعى جاستاردىڭ بەلسەندىلىگىن كورسەتەدى.
رۋحاني جاڭعىرۋدىڭ باسىم باعىتى
سەزدىڭ رەسمي اشىلۋىنا ارنالعان جيىننان كەيىن قاتىسۋشى دەلەگاتتار بىرنەشە توپقا ءبولىنىپ, ءتۇرلى تاقىرىپتاردا پىكىر الماستى. اتاپ ايتقاندا, «رۋحاني جاڭعىرۋ», «تسيفرلى قازاقستان», «قازاقستاندا جاسالعان», ء«بىلىم. عىلىم. يننوۆاتسيا» جانە «سالاماتتى ۇلت» تاقىرىپتارىندا وتكەن سەسسيالار اياسىندا جاسوتاندىقتار ۇلتتىق جاڭعىرتۋ پروتسەسىن يدەيالىق كەڭىستىكتە جۇرگىزۋ, ەكونوميكالىق ءوسىمنىڭ جاڭا مودەلىن قۇرۋ سىندى اۋقىمدى تاقىرىپتار توڭىرەگىندە اشىق الاڭ قۇردى.
ۇلتتىق مۋزەيدە وتكەن «رۋحاني جاڭعىرۋ» سەسسياسىنىڭ جۇمىسىنا قاتىسقان «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا كورسەتىلگەن مىندەتتەر اياسىندا اتقارىلعان اۋقىمدى جۇمىستارعا نازار اۋداردى. ونىڭ ايتۋىنشا, «قازاقستاننىڭ كيەلى جەرلەرىنىڭ گەوگرافياسى», «قازاق تىلىندەگى 100 جاڭا وقۋلىق», «تۋعان جەر» جانە وزگە دە باعىتتار بويىنشا ناقتى قادامدار جاسالىپ, ناتيجەلەرگە قول جەتكىزىلگەن.
– رۋحاني جاڭعىرۋدىڭ باستى ماقساتى – بابادان ميراس بولعان اسىل مۇرالارىمىزدى دارىپتەۋ, ۇلتتىق كودىمىز بەن قۇندىلىقتارىمىزدى ساقتاۋ جانە حالىقتى ورتاق مۇددەگە ۇيىستىرۋ. بۇل ارنايى زاڭ نەمەسە قاۋلىمەن شەشىلەتىن جۇمىس ەمەس. ول ءۇشىن ۇلتىمىزدىڭ بار قادىر-قاسيەتىن وسكەلەڭ ۇرپاقتىڭ بويىنا ءسىڭىرىپ, سول جولدا ايانباي ەڭبەك ەتۋىمىز كەرەك. بۇل رەتتە «جاس وتانعا» سانا اشىقتىعىنىڭ اياسىن كەڭەيتۋ, باسەكەگە قابىلەتتىلىكتى ارتتىرۋ, پراگماتيزم, ەڭبەكقورلىق سياقتى مىندەتتەر جۇكتەلەدى. ءار جاسوتاندىق جاڭعىرۋ اياسىندا الەمنىڭ وزىق تاجىريبەلەرىن ەركىن مەڭگەرە وتىرىپ, ءوزىنىڭ ۇلتتىق كودى مەن رۋحاني, مادەني بىرەگەيلىگىن ساقتاۋى ءتيىس, – دەدى پارتيا توراعاسىنىڭ ءبىرىنشى ورىنباسارى م.اشىمباەۆ. سونداي-اق ول قابىلدانىپ جاتقان قازاق ءتىلىنىڭ گرافيكاسىنداعى جاڭا ءالىپبي وركەنيەت تۇتاستىعى ءۇشىن جاسالعان ۇلكەن قادام ەكەنىن ايتا كەلىپ, جاستاردى ەلباسى ماقالاسىنىڭ وزەكتى باعىتتارىن جۇزەگە اسىرۋدا بەلسەندىلىك تانىتۋعا شاقىردى.
اتالعان سەسسياعا ءبىلىم جانە عىلىم ۆيتسە-ءمينيسترى اسحات ايماعامبەتوۆ, «اتامەكەن» ۇلتتىق كاسىپكەرلەر پالاتاسى اقپاراتتىق-كوممۋنيكاتسيالىق تەحنولوگيالار, ءبىلىم بەرۋ جانە يننوۆاتسيا كوميتەتىنىڭ توراعاسى مۇرات ابەنوۆ, مادەنيەت جانە سپورت مينيسترلىگى تىلدەردى دامىتۋ جانە قوعامدىق ساياسي جۇمىس كوميتەتىنىڭ توراعاسى قۋات بوراش سپيكەر رەتىندە قاتىسىپ, باعدارلاما اياسىندا اتقارىلعان جۇمىستارعا توقتالدى.
ءبىلىم بەرۋدى ەكونوميكالىق ءوسۋدىڭ جاڭا مودەلىنىڭ ورتالىق بۋىنىنا اينالدىرۋ توڭىرەگىندە ءسوز قوزعاعان ءبىلىم جانە عىلىم ۆيتسە-ءمينيسترى اسحات ايماعامبەتوۆ كاسىپتىك ستاندارتتاردى ەڭبەك نارىعىنىڭ تالاپتارىنا ساي جاڭارتۋ تۇرعىسىندا باياندادى.
«رۋحاني جاڭعىرۋ تالاپتارى داستۇردەن الشاقتاۋ ەمەس, كەرىسىنشە, ۇلتتىق كودىمىزدى, تاريحىمىزدى ساقتاي وتىرىپ سانا اشىقتىعى ارقاسىندا بىلىكتىلىك پەن باسەكەگە قابىلەتتى بولا ءبىلۋدى كوزدەيدى. ەلباسى قويعان مىندەتتەر نەگىزىندە قازاق تىلىندەگى 100 جاڭا وقۋلىق بويىنشا وزگە تىلدەردەن 17 كىتاپ اۋدارىلدى. 2018 جىلى ساياساتتانۋ, ينفورماتيكا, الەۋمەتتانۋ سالاسىنداعى تاعى 30 كىتاپتى اۋدارۋ جوسپاردا بار. ولار الداعى قىركۇيەك ايىنان باستاپ ەلدەگى جوعارى وقۋ ورىندارىندا وقىتىلا باستايدى», دەدى اسحات ايماعامبەتوۆ. ۆيتسە-ءمينيستردىڭ ايتۋىنشا, ەلىمىزدىڭ 16 ءوڭىرى بويىنشا ولكەتانۋ وقۋلىقتارى ازىرلەنگەن. جۋىردا بارلىق مەكتەپتەردە 7-سىنىپتان باستاپ ولكەتانۋ وقۋلىعى وقۋ پروتسەسىنە ەنگىزىلىپ, ءتۇرلى تۋريستىك جۇمىستار جۇرگىزىلمەك.
«قارجى ساۋاتتىلىعى مەن كاسىپكەرلىك قۇزىرەتتىلىگىن دامىتۋ بويىنشا 10-11-سىنىپ وقۋشىلارىنا ارنايى ساباق وتەتىن بولادى. بۇل وتە ماڭىزدى قادامداردىڭ ءبىرى. سونىمەن بىرگە كاسىپتىك كوللەدجدەردە نارىق ىڭعايىنا قاراي جاستارعا قارجى ساۋاتتىلىعى ۇيرەتىلەدى. ولار وقۋدى بىتىرگەن سوڭ جۇمىس ىزدەۋشى مامان ەمەس, جۇمىس بەرۋشىگە اينالادى. مۇنداي جوبا وسىعان دەيىن قاراعاندىدا ىسكە اسىرىلدى, بۇگىندە العاشقى ناتيجەسىن دە كورسەتتى», دەيدى ۆيتسە-مينيستر.
تىلدەردى دامىتۋ جانە قوعامدىق ساياسي جۇمىس كوميتەتىنىڭ توراعاسى قۋات بوراش جاڭا تۇرپاتتى جاڭعىرۋدىڭ نەگىزگى مىندەتتەرىن اتاپ, لاتىن الىپبيىنە كوشۋدىڭ تەرەڭ قيسىنى بار ەكەنىن ءارى عىلىمي جانە ءبىلىم بەرۋ پروتسەسىنىڭ ەرەكشەلىكتەرىنە بايلانىستى ىسكە اسىرىلىپ وتىرعان ىلكىمدى باستاما ەكەنىن اتادى.
«مەملەكەت باسشىسىنىڭ باعدارلامالىق ماقالاسىنداعى مىندەتتەر قويىلعان ءبىر جىل ىشىندە ەلەۋلى جۇمىس اتقارىلدى. مەكتەپتە اعىلشىن ءتىلى وقىتىلاتىندىقتان, ولار لاتىن ءالىپبيىن تەز قابىلدايتىنى ءسوزسىز. جاڭا تەحنولوگيالار ارقىلى قازاق ءتىلىنىڭ حالىقارالىق اقپارات كەڭىستىگىنە كىرىگۋىنە ءتيىمدى مۇمكىندىك تۋىپ وتىر. وسىعان وراي ۇلتتىق كوميسسيا قۇرىلىپ, ونىڭ جانىنان اشىلعان ءتورت جۇمىس توبى ورفوگرافيا, تەرمينولوگيا, ادىستەمە جانە اقپاراتتىق تەحنولوگيالارعا يكەمدەۋ ىسىنە بايلانىستى تياناقتى ءىس جۇرگىزىپ جاتىر. 2025 جىلعا دەيىن اتقارىلاتىن ءىس-شارالار جوسپارى بەكىتىلىپ, ءار جىلدىڭ الگوريتمى كورسەتىلدى. مۇنىڭ بارلىعى ەل بولاشاعى ءۇشىن, قازاق ءتىلىنىڭ الەمدىك دەڭگەيدەگى ءوز ورنىن تابۋ, عىلىم مەن مادەنيەتكە جول اشۋ ءۇشىن جاسالىپ وتىرعان دۇنيە. اتالعان ءبىر جىل ىشىندە مادەنيەت سالاسى بويىنشا 800-دەن استام ءىس-شارا ءوتتى. اقتوبە, شىعىس قازاقستان, جامبىل, پاۆلودار وبلىستارىندا 7 مۋزەي, 3 كىتاپحانا اشىلدى», دەدى قۋات بوراش.
تسيفرلى قازاقستان – ماڭىزدى قادام
سەزد اياسىندا جاستاردىڭ ءبىر لەگى اقپارات جانە كوممۋنيكاتسيالار ۆيتسە-ءمينيسترى دارىن تۇياقوۆتىڭ, «قازپوشتا» اكتسيونەرلىك قوعامىنىڭ باسقارما توراعاسى ساكەن سارسەنوۆتىڭ, «زەردە» ۇلتتىق ينفوكوممۋنيكاتسيا حولدينگى توراعاسىنىڭ ورىنباسارى پاۆەل كوكتىشەۆتىڭ «تسيفرلى قازاقستان» تاقىرىبى بويىنشا دارىستەرىن تىڭدادى.
اتاپ ايتقاندا, ۆيتسە-مينيستر وڭىرلەردەن جينالعان جاستارعا «تسيفرلى قازاقستان» جوباسىنىڭ مىندەتتەرى مەن ماقساتتارى تۋرالى بايانداپ بەردى. ونىڭ سوزىنە قاراعاندا, 5 باعىتى, 17 باستاماسى, 120 ءىس-شاراسى بەكىتىلگەن جوبا تاياۋ جىلداردىڭ وزىندە قازاقستاننىڭ الەمنىڭ تسيفرلى كارتاسىنداعى ورنىن ايشىقتاپ بەرۋى ءتيىس. ەلباسىنىڭ تاپسىرمالارىنا سايكەس, 2025 جىلعا دەيىن ەلىمىزدىڭ ەكونوميكاسىنىڭ ايتارلىقتاي ءوسىمىن قامتاماسىز ەتۋ مەن تۇرعىنداردىڭ ءومىر ءسۇرۋ دەڭگەيىن جاقسارتۋ مىندەتى باسىمدىقتاردىڭ العى لەگىندە تۇر. ونىڭ ىشىندە ەكونوميكانىڭ سالالارىن تسيفرلاندىرۋ, تسيفرلى مەملەكەتكە كوشۋ, تسيفرلى جىبەك جولىن جۇزەگە اسىرۋ, ادام كاپيتالىن دامىتۋ, يننوۆاتسيالىق ەكوجۇيەنى قالىپتاستىرۋ باعىتتارى بۇگىندە كەشەندى تۇردە جۇزەگە اسىرىلىپ جاتىر.
– بۇگىندە تەحنولوگيانىڭ ءوسۋ, دامۋ قارقىنى جوعارى. ادام قۇندىلىقتارىنىڭ ءوزى تەحنولوگيالارعا اۋىستى. ءبىزدىڭ الدىمىزداعى مىندەت – قازاقستاندى الدىڭعى قاتارلى مەملەكەتتەردىڭ قاتارىنا شىعارۋ. بۇل ماقساتتا جوسپارىمىز ايقىن, جولىمىز اشىق. الداعى 3-5 جىلدىڭ ىشىندە ەلىمىزدى تسيفرلاندىرۋ جۇيەسىنە تولىق ەنگىزەمىز, – دەدى ۆيتسە-مينيستر.
وزگە سپيكەرلەر دە ءوز سالالارى بويىنشا جەتىستىكتەرىن جاستارعا بايىپپەن جەتكىزدى. ماسەلەن ەلىمىزدىڭ پوشتا جۇيەسىندە سوڭعى جىلدارى تىڭ جاڭالىقتار جۇزەگە اسىرىلدى. «قازپوشتانىڭ» باسقارما توراعاسى اڭگىمەسىنە ءازىل ارالاستىرا وتىرىپ, جاسوتاندىقتارعا تولىققاندى مالىمەت بەردى. ساكەن سارسەنوۆتىڭ ايتۋىنشا, ەلىمىزدىڭ پوشتا سالاسىندا بۇگىندە 23 مىڭداي ادام جۇمىس ىستەيدى. ەلدە پوشتا سالاسىنىڭ بەدەلى ارتىپ, تەك وتكەن جىلدىڭ وزىندە عانا حالىققا 90 ملن قىزمەت كورسەتىلگەن. بولىمشەلەرىنىڭ 70 پايىزى اۋىلدىق جەرلەردە بولعاندىقتان, جاڭاشىلدىقتاردى الدىمەن شالعاي مەكەندەردە قولدانۋ ۋاقىت پەن قارجىنىڭ ۇيلەسىمدى ۇنەمدىلىگىن تۋعىزعان. ءتىپتى تاۋلى وڭىرلەردەگى 30 اۋىلعا حات-حابار درون ارقىلى تاسىمالدانا باستاپتى.
جاستارعا عىلىم مەن تەحنيكانىڭ وزىق جەتىستىكتەرى تۇرمىسىمىزعا ۇزدىكسىز ەنىپ جاتقاندىعى جانە ۋاقىت ۇدەرىسىنە ىلەسۋدىڭ ماڭىزدىلىعى تۋرالى دا ايتىلدى. مىسالى قازىر «قازپوشتانىڭ» تسيفرلى كەڭسەسىندە تۇتىنۋشىلارعا روبوت قىزمەت كورسەتەدى. بۇل كۇنى كەشە قيال-عاجايىپقا تەڭدەس جاڭالىق بولاتىن.
جيىن بارىسىندا جاستار دا وزدەرىنىڭ كوكەيىندەگى ساۋالدارىن قويىپ, تيىسىنشە تۇشىمدى جاۋاپتارىن الدى.
ايتا كەتەيىك, سەزد جۇمىسى بۇگىن دە جالعاسادى.
نۇرعالي جولداسقاليەۆ,
«جاس وتان» جاستار قاناتى باتىس قازاقستان وبلىستىق فيليالىنىڭ توراعاسى:
– سەزگە ءبىزدىڭ وڭىردەن 45 ادام كەلدى. ولاردىڭ ىشىندە ستۋدەنتتەر, ونەرلى جاستار, سپورتشىلار مەن جۇمىسسىز جۇرگەن جاستاردىڭ وكىلدەرى بار. وسىنداي اۋقىمدى شارالاردا بىزگە ءاربىر جاستىڭ پىكىرى ماڭىزدى. وتكەنگە كوز جۇگىرتىپ قاراساق, ەلباسىنىڭ تاپسىرماسىنا سايكەس ايماقتاردا قۇرىلعان رەسۋرستىق ورتالىقتار قازىر ءتيىمدى جۇمىس جاساپ جاتىر.
بۇل جولعى سەزدە دە جاستاردىڭ كوڭىلىنەن شىعاتىن تىڭ باستامالار, جاڭالىقتار ەستيمىز دەگەن ۇمىتتەمىز. بىزدەر «نۇر وتان» پارتياسىنىڭ جاستار قاناتىنىڭ وكىلدەرى بولعاندىقتان ەلدەگى ءاربىر وزگەرىسكە قۇلشىنا ارالاسىپ, ولاردى جۇزەگە اسىرۋدا الدا تۇرۋىمىز كەرەكتىگىن تۇسىنەمىز.
جومارت رياتوۆ,
«جاس وتان» جاستار قاناتى سەمەي قالالىق بولىمشەسىنىڭ جەتەكشىسى:
– «جاس وتان» جاستار قاناتىنىڭ اياسىندا جۇرگەنىمە ءتورت جىلدىڭ ءجۇزى بولدى. بىراق ۇلكەن سەزگە ءبىرىنشى رەت قاتىسىپ وتىرمىن. بۇل جيىننىڭ جاستاردىڭ باعىت-باعدارىن ايقىنداپ بەرەتىنىنە سەنىمدىمىن. وسى جەردە ايتىلعان جاڭالىقتاردى ەلگە بارعان سوڭ جاستار اراسىندا ءتۇسىندىرۋ, ناسيحاتتاۋ ىستەرىنە كىرىسەمىز. ءوز ەلىن سۇيۋگە, تۋعان جەرىن قۇرمەتتەۋگە مۇنداي القالى باسقوسۋدىڭ اسەرى كوپ بولادى.
جۋىردا مەملەكەت باسشىسى نۇرسۇلتان نازارباەۆ جاريالاعان بەس الەۋمەتتىك باستامانى ەستىگەن سەمەيلىك جاستار ءدۇر سىلكىندى. ويتكەنى ستۋدەنتتەرى كوپ ءبىزدىڭ وڭىرگە گرانتتاردىڭ كوبەيتىلۋى, جاڭادان جاتاقحانالاردىڭ سالىنۋى تىڭ سەرپىلىس بەرەتىندىگىنە كۇمان جوق.
ابىلايحان قايروللاەۆ,
«جاس وتان» جاستار قاناتى سولتۇستىك قازاقستان وبلىستىق فيليالىنىڭ توراعاسى:
– بۇل جولعى سەزدەن كۇتەرىمىز كوپ. اتاپ ايتقاندا, جاستار ءۇشىن ماڭىزدى شەشىمدەر قابىلداناتىندىعىنا سەنىمدىمىن. ادەتتە, وڭىرلەردە قوردالانعان ماسەلەلەردىڭ دە ءتۇيىنىن تارقاتىپ, كۇرمەۋىن شەشىپ الامىز.
ماسەلەن, سولتۇستىك قازاقستان وبلىسىندا مەكتەپ بىتىرگەن تۇلەكتەردىڭ رەسەيلىك وقۋ ورىندارىنا تاڭداۋ جاساپ, شەكارا اسىپ جاتقاندارى قىنجىلتادى. وسى ماسەلەنى اشىق كەزدەسۋلەردە تالقىعا سالماق ويىمىز بار. ويتكەنى ەلىمىزدىڭ سولتۇستىك وڭىرلەرىندە جاستار سانى ازايىپ بارادى. ەلباسىنىڭ بەس الەۋمەتتىك باستاماسىنان جاستارعا كەدەرگى پروبلەمالاردى شەشۋ جولدارىن ۇعىندىق. ءبىزدىڭ ەندىگى مىندەت – جاڭا باستامالاردى زامانداستارىمىزعا تەرەڭ ءتۇسىندىرۋ.
ءاينىل ءابۋالى,
جامبىل وبلىستىق حالىق شىعارماشىلىعى ءۇيىنىڭ قىزمەتكەرى:
– جامبىل وبلىسىندا 227 مىڭداي جاس بار. ولاردىڭ ۇزدىكتەرى, بەلسەندىلەرى استاناعا جينالىپ, ورتاق ماسەلەلەردى تالقىلاپ جاتىرمىز. «جاس وتاننىڭ» سەزىنەن بولاشاققا باعدار, سەرپىلىس الامىن دەگەن ءۇمىتىم بار.
قازىرگى تاڭدا مەملەكەت تاراپىنان جاستارعا كورسەتىلىپ جاتقان قولداۋ از ەمەس. بۇل ءۇردىستىڭ سوڭعى كەزدە ەلباسى نۇرسۇلتان نازارباەۆتىڭ بەس الەۋمەتتىك باستاماسى ارقىلى قايتا جاڭعىرعانىنا ءبارىمىز كۋامىز. وسىناۋ باستامالار بۇگىنگى سەزدە قىزۋ تالقىلاندى. مەنىڭ ويىمشا, جاستار وسى القالى جيىننان وزدەرىنە باعىت-باعدار الادى. بۇل ءوز كەزەگىندە ءبىزدىڭ قوعام ومىرىنە بەلسەنە ارالاسۋىمىزعا جول اشاتىنى ءسوزسىز.
سەرىك ابدىبەك,
ايا ءومىرتاي,
«ەگەمەن قازاقستان»
