فوتو: ەرلان ومار, «ەگەمەن قازاقستان»
ەلوردا تورىندەگى تاۋەلسىزدىك سارايىن دۋمانعا بولەگەن اتالمىش وقيعاعا ەۋروپادا تۇراتىن ءتىلشى-جۋرناليست ءباشىر جانالتاي, وزبەكستانداعى قازاق ۇلتتىق مادەني ورتالىعىنىڭ وكىلى كلارا سادىرباەۆا باستاعان شەتەلدەردەگى قازاق دياسپورالارى جانە اتاجۇرتىنا ورالعان زيالى قاۋىم وكىلدەرى قاتىسىپ, ۇلىستىڭ ۇلىق مەيرامى – ناۋرىزدى اتاپ ءوتتى.
مادەني شاراعا جينالعان قاۋىمعا اقجارما تىلەگىن ارناعان مەملەكەت جانە قوعام قايراتكەرى مىرزاتاي جولداسبەكوۆ, قانداستاردى كەلە جاتقان ۇلىس كۇنى مەرەكەسىمەن قۇتتىقتاي وتىرىپ, حالقىمىزدى وسىنداي جاقسىلىققا جەتكىزگەن ءبىر تاڭىرگە شۇكىرشىلىك ەتەتىنىن ەمىرەنە ايتتى. سونىمەن قاتار قايراتكەر-عالىم: «ناۋرىز اۋەلى تاتۋلىق مەيرامى. تاتۋلىقتىڭ وزەگى – بىرلىك پەن بەرەكە. ءبىزدىڭ بابالارىمىزدان قالعان ەڭ ۇلكەن امانات تا وسى. قازىرگى تاۋەلسىزدىك داۋىرىندە وسى اماناتقا ادال بولۋىمىز كەرەك», دەدى.
جاڭا قىزمەتكە كىرىسكەنىنە سەگىز ايدىڭ ءجۇزى بولعان دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ, وسى ارالىقتا اتقارىلعان جۇمىستىڭ بارىسى جايلى بايانداپ, جينالعان كوپشىلىكپەن الداعى جوسپارىمەن ءبولىستى. – ەڭ اۋەلى, – دەدى زاۋىتبەك قاۋىسبەك ۇلى, – ەلدەگى دەموگرافيالىق احۋالدى جاقسارتۋدىڭ ءبىر جولى شەتتەگى قازاقتاردى اتاجۇرتقا اكەلۋ. ول ءۇشىن ولاردىڭ باسپانا جانە جۇمىس ماسەلەسىن شەشۋ كەرەك. وسى ماقسات ءۇشىن قازىرگى تاڭدا استانا ماڭىنان 200 گەكتار جانە شىمكەنت قالاسى توڭىرەگىنەن ءدال وسىنداي جەر تەلىمىن الىپ, جاڭادان ەلدى مەكەن تۇرعىزۋ ءىسىن قولعا الماقپىز.
مۇنىڭ سىرتىندا ەلوردا ماڭىنا كوكونىس وسىرەتىن وتە ۇلكەن اۋماققا جىلىجاي سالىپ, ودان شىققان ونىمدەردى ساتاتىن ارنايى بازار اشىپ, قونىستانۋشى قانداستاردى جۇمىسپەن قامتىماق ەكەن. اتاپ وتۋگە تۇرارلىق تاعى ءبىر جاڭالىق قاۋىمداستىق ەلباسى تاپسىرماسىمەن قۇرىلعان «وتانداستار» قورى ارقىلى ۇستىمىزدەگى جىلى 150-دەن استام مەكتەپ جاسىنداعى ءجاسوسپىرىمدى (شەتەلدە ءومىر ءسۇرىپ جاتقان) بۋرابايداعى «بالداۋرەن» دەمالىس لاگەرىنە اكەلىپ, ولاردىڭ ءتىل ۇيرەنۋىنە جانە ەلىمىزدىڭ تاريحي ورىندارىمەن تانىسۋىنا جاعداي تۋعىزباق. بۇل ءىس جىل سايىن جالعاسىن تابادى جانە ۋاقىت وزعان سايىن دەمالۋشى بالالاردىڭ دا سانى ارتادى. سونىمەن قاتار بۇعان دەيىن اتاجۇرتىنا ورالىپ, ءار سالادا ابىرويلى قىزمەت ەتىپ جۇرگەن تۇلعالاردىڭ دا ەڭبەگى ناسيحاتتالماق.
وسىلاي ماڭىزدى باسقوسۋ ۇستىندە ءوزىنىڭ الداعى جوسپار-جوباسىمەن تانىستىرعان ز.تۇرىسبەكوۆ, بۇدان بىلاي 21 ناۋرىزعا «وتانداستار كۇنى» دەگەن مارتەبە بەرىپ, ونى ۇلىستىڭ ۇلى كۇنى قارساڭىندا كۇللى ەل كولەمىندە قانداستارعا ىقىلاس تانىتاتىن داتاعا اينالدىرۋدى جيىن قوناقتارىنا ۇسىندى. ۇسىنىس بىردەن قولداۋ تاپتى.
جيىننىڭ سوڭىندا قوناقتار ارنايى دايىنداعان ونەرپازداردىڭ كونتسەرتىن تاماشالاپ, س.ىسقاقبەك ۇلى, ب.جالىن, ب.زەردە, ا.اقىمبەك, گ.سىرىمگۇل قاتارلى قىلقالام شەبەرلەرىنىڭ كارتيناسىن, گ.توقانقىزى باستاعان بىزكەستەشىلەردىڭ ونەرى مەن ب.قوپىلايقىزىنىڭ قولىنان شىققان ويۋلى سىرماقتاردى تاماشالاپ, كوزايىم بولدى.
بەكەن قايرات ۇلى,
«ەگەمەن قازاقستان»
