سپورتتى جانىنا سەرىك ەتكەن كوزىقاراقتى وقىرماندارىمىز بۇل ءراسىمنىڭ قاي قالادا جانە قاي ۋاقىتتا تۇسىرىلگەنىن جاتقا ءبىلۋى كەرەك. ءيا, دۇرىس ايتاسىز! سۋرەت 2015 جىلى ەلوردا تورىندە دۇركىرەپ وتكەن دزيۋدو سپورتىنان الەم چەمپيوناتىندا تۇسىرىلگەن بولاتىن.
دۇنيە ءجۇزىنىڭ 120 ەلىنەن كەلگەن 700-دەن اسا دزيۋدو شەبەرلەرى استانادا باق سىناعان بىرىنشىلىكتىڭ العاشقى كۇنىندە-اق كۇتپەگەن جاعداي بولدى. ارينە, سپورت ماماندارى ءۇشىن بۇل كۇتىلگەن جاعداي بولۋى مۇمكىن, بىراق جانكۇيەرلەر ءۇشىن بۇل ءبىر كۇتپەگەن وقيعا, ءتىپتى توسىن سىي بولدى. استاناداعى ايتۋلى الاماندا سىنعا ءتۇسىپ جاتقان قازاقتىڭ ەكى بالاسى تاريحتا تۇڭعىش رەت الەم چەمپيوناتىنىڭ فينالىندا كۇرەسىپ, جۇلدەلى ءبىرىنشى جانە ەكىنشى ورىندى ءبولىستى.
ولار – 60 كيلودا بەلدەسكەن ەلدوس سمەتوۆ پەن رۋستام يبراەۆ ەدى. تەڭ دەڭگەيدە وتكەن كەزدەسۋدە سمەتوۆ قارسىلاسىن ءبىر شيدومەن جەڭىپ, التىن مەدالعا يە بولسا, رۋستام يبراەۆ كۇمىس جۇلدەنى قاناعات تۇتقان. ءسوز جوق, سول كۇن ەلىمىزدىڭ سپورتتىق كۇنتىزبەسىندە التىن ارىپپەن جازىلعانى انىق. ويتكەنى بۇعان دەيىنگى الەم نەمەسە باسقا دا ءىرى حالىقارالىق جارىستاردا ەلىمىزدىڭ ەكى سپورتشىسى فينالدا ءبىر-بىرىنە قارسىلاس اتانىپ, جۇلدەگە تالاسپاعان. بۇل ەكى قازاق وعلانىنىڭ ءبىر تۇعىردا التىن مەن كۇمىس جۇلدەنى ءبولىسىپ, قۋانىشتان كوزدەرىنە جاس العان تاريحي ءساتى ەدى.
تاريحي سۋرەتتى تۇسىرگەن ەلىمىزگە تانىمال فوتوسۋرەتشى – جەڭىس ىسقاباي. ول ءوزى تۇسىرگەن سۋرەتتەردىڭ ىشىندەگى ەڭ قۇندى دۇنيەمنىڭ ءبىرى وسى سۋرەت دەپ ەسەپتەيدى. سونداي-اق دزيۋدو سپورتىنىڭ تاريحىنا قانىق جەڭىس بۇل سۋرەتىنىڭ تاريحي سۋرەت بولاتىنىن سول كەزدە وزىنشە جورامالداعانىن دا ايتادى. «نەگىزى ءار سۋرەتىمنىڭ وزىنە لايىق قۇندىلىعى, وزىنە لايىق ەرەكشە تاريحى بار عوي. بىراق, ءدال وسى سۋرەت مەن ءۇشىن ەمەس, ەلىمىز ءۇشىن وتە قۇندى. ويتكەنى بۇل الەم چەمپيوناتىنىڭ تۇعىرىندا يىق تىرەسىپ تۇرعان ەكى قازاقتىڭ تۇڭعىش سۋرەتى», دەيدى ول.
راس, بۇل سۋرەت ەلىمىز ءۇشىن وتە قۇندى ءھام مۋزەي تورىنەن ورىن الاتىن تاريحي جادىگەر. ءدال مۇنداي جاعداي ەلىمىزدىڭ سپورت تاريحىنداعى جاقىن 10-15 جىلدىقتا قايتالانا ما, جوق پا, ونىسى بىزگە بەيمالىم. دەگەنمەن, ساڭلاقتارىمىز جەڭىس تۇعىرىندا قاز-قاتار جارقىراپ تۇراتىن ساتتەر ءجيى بولسىن دەيمىز.
ءالي بيتورە,
«ەگەمەن قازاقستان»
سۋرەتتى تۇسىرگەن جەڭىس ىسقاباي
