وسى ماسەلەنى شەشۋدىڭ ءبىر جولىن Microsoft عالىمدارى ۇسىنىپ وتىر. ولار Project Silica دەپ اتالاتىن جوبادا دەرەكتەردى شىنىنىڭ ىشىنە جازىپ ساقتاۋدى سىناقتان وتكىزىپ جاتىر. جوبا تۋرالى عىلىمي ماقالا Nature جۋرنالىندا دا جاريالانعان.
زەرتتەۋشىلەردىڭ ايتۋىنشا, شىنىنىڭ بىرنەشە ارتىقشىلىعى بار: ياعني ول ارزان ماتەريال, جوعارى تەمپەراتۋراعا ءتوزىمدى, وڭاي ب ۇلىنبەيدى, سىزات پەن سىرتقى اسەرگە بەرىك.
سوندىقتان مۇنداي ءادىس دەرەكتەردى 10 مىڭ جىلعا دەيىن ساقتاۋعا مۇمكىندىك بەرۋى ىقتيمال. بۇعان دەيىن عالىمدار اقپاراتتى دنق-عا ساقتاۋ يدەياسىن دا كوپ ايتقان. تەوريا بويىنشا, 1 گرامم دنق-عا وتە كوپ مالىمەت سىيعىزۋعا بولادى. بىراق دنق سينتەزى قىمبات, دەرەكتى وقۋ باياۋ, ءارى ساقتاۋ ءۇشىن ارنايى جاعداي كەرەك.
بۇدان شامامەن 10 جىل بۇرىن ساۋتگەمپتون ۋنيۆەرسيتەتىنىڭ وپتوەلەكترونيكا مامانى پيتەر كازانسكي قىسقا لازەرلىك يمپۋلستار ارقىلى شىنى پلاستينانىڭ ىشىنە وتە ۇساق «ىزدەر» ءتۇسىرىپ, اقپارات كودتاعان. بىراق ول ءادىس قىمبات جابدىقتى جانە وتە ءدال ميكروسكوپتى قاجەت ەتكەن.
Microsoft زەرتتەۋشىلەرى بۇل ءتاسىلدى جەتىلدىرىپ, تۇرمىستا دا, زەرتحانادا دا قولدانىلاتىن بوروسيليكات شىنىسىن پايدالانعان. لازەر ساۋلەسى شىنىنىڭ ىشىندە شامامەن 100 نانومەتر اۋماقتا سىنۋ كورسەتكىشىن وزگەرتەدى دە, ميكروسكوپپەن كورىنەتىن بەلگى قالدىرادى. ەڭ ماڭىزدىسى – بەلگىلەردى ءارتۇرلى تەرەڭدىككە تۇسىرۋگە بولادى. ياعني ءبىر عانا پلاستينانىڭ ىشىنە كوپ قابات ەتىپ دەرەك «جازۋعا» مۇمكىندىك بار.
جازۋ جىلدامدىعىن ارتتىرۋ ءۇشىن عالىمدار لازەردى ءتورت ساۋلەگە ءبولىپ قولدانعان. سونىڭ ارقاسىندا جازۋ جىلدامدىعى سەكۋندىنا شامامەن 66 مەگابايتقا جەتكەن. بولاشاقتا پاراللەل ساۋلەلەر سانىن 16-عا دەيىن كوبەيتۋ ارقىلى جىلدامدىقتى تاعى ارتتىرۋعا بولادى دەيدى.
ال اقپاراتتى وقۋ ءۇشىن شىنى ارقىلى جارىق وتكىزىلەدى, ميكروسكوپتىڭ وپتيكالىق كامەراسى ءار قاباتتاعى بەلگىلەردى تۇسىرەدى. كەيىن ارنايى الگوريتم سول سۋرەتتەردى وڭدەپ, قايتادان تسيفرلىق فايلعا اينالدىرادى. جۇيە تولىق روبوتتاندىرىلعان, ياعني لازەر مەن ميكروسكوپ اۆتوماتتى جۇمىس ىستەيدى, جازۋ پروتسەسى ءدال رەتتەلەدى.
زەرتتەۋشىلەر بۇل ادىسپەن بىرنەشە فيلم مەن مۋزىكالىق ءارحيۆتى ساقتاپ تا ۇلگەرگەن. ەگەر تەحنولوگيا كوممەرتسيالىق دەڭگەيگە شىقسا, بولاشاقتا ماڭىزدى مەملەكەتتىك, عىلىمي جانە مادەني مۇرا دەرەكتەرىن مىڭداعان جىل بويى بۇزباي ساقتاۋدىڭ جاڭا مۇمكىندىگى پايدا بولۋى مۇمكىن.
