سيمپوزيۋمدا «قايىم مۇحامەدحانوۆ اتىنداعى ابايتانۋ ءدارىسحاناسى» اشىلىپ, قالامگەر ەڭبەكتەرىنىڭ تۇساۋى كەسىلدى. حالىقارالىق دەڭگەيدەگى القالى جيىن ۇلت رۋحانياتىنا ولشەۋسىز ۇلەس قوسقان كورنەكتى عالىم, ابايتانۋشى, تەكستولوگ قايىم مۇحامەدحانوۆتىڭ عىلىمي مۇراسىن جاڭاشا پايىمداۋعا ارنالدى.
ءدارىسحانانىڭ تۇساۋىن ۋنيۆەرسيتەتتىڭ اكادەميالىق قىزمەت جونىندەگى پرورەكتور بانۋ ناربەكوۆا, فيلولوگيا فاكۋلتەتىنىڭ دەكانى الۋا تاڭجارىقوۆا, پروفەسسور فاۋزيا شامسياقىزى جانە ادەبيەتتانۋشى بالتاباي ابدىعازين كەستى. سيمپوزيۋمعا قايىم مۇحامەدحانوۆتىڭ ۇلى دەگدار قايىم ۇلى مەن قىزى دينا قايىمقىزى قاتىسىپ, اكە مۇراسىنا كورسەتىلگەن قۇرمەتكە ريزاشىلىقتارىن ءبىلدىردى.
پرورەكتور بانۋ ناربەكوۆا ءوز سوزىندە بار عۇمىرىن الاشتانۋ مەن ابايتانۋعا ارناعان قايىم مۇحامەدحانوۆتىڭ قۋعىن-سۇرگىنگە ۇشىراسا دا تاعدىر سىنىنا مويىماي, ەلگە ادال قىزمەتى بۇگىنگى ۇرپاققا ۇلگى ەكەنىن اتاپ ءوتتى. سونىمەن قاتار, عالىم اتىمەن اشىلعان ءدارىسحانانىڭ ادەبيەتتانۋشىلار مەن پەداگوگتاردى دايارلايتىن قارا شاڭىراق ءۇشىن تاريحي مۇرا جانە اباي قۇندىلىقتارىن دارىپتەۋگە بەرىك نەگىز بولاتىنىن جەتكىزدى.
سيمپوزيۋمدا قايىم مۇحامەدحانوۆتىڭ عىلىمداعى جولىنا توقتالىپ وتكەن م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, اكادەميك كەنجەحان ماتىجانوۆ ەڭبەكتەرىنىڭ ماڭىزىن اتاپ ءوتتى.
«قايىم مۇحامەدحانوۆتىڭ جەتەكشىلىگىمەن 30-دان اسا ديسسەرتاتسيا قورعالدى. بۇگىندە اباي شاكىرتتەرى مەن ءىزباسارلارى مەكتەپتەر مەن جوعارى وقۋ ورىندارىندا وقىتىلىپ كەلەدى. بۇل – قازاق ادەبيەتىندەگى بىرەگەي عىلىمي مەكتەپ, ۇلت ماقتانىشى. وسىنداي جانكەشتى ەڭبەگى ءۇشىن ول 1951 جىلى ساياسي قۋعىن-سۇرگىنگە ۇشىراپ, 25 جىلعا باس بوستاندىعىنان ايىرىلدى. سوعان قاراماستان, عۇمىر بويى اباي ءسوزىنىڭ تۇپنۇسقاسىن ساقتاۋمەن اينالىستى, تەكستولوگيالىق تالداۋ جاساپ, عىلىمي تۇسىنىكتەمەلەر جازدى. بۇگىنگى جاستار ەركىن زاماندا ءومىر ءسۇرىپ جاتىر. كونستيتۋتسيانىڭ ەڭ باستى قۇندىلىعى – ادامنىڭ ەركىندىگى. ال وسى ەركىندىكتى قايىم مۇحامەدحانوۆ سىندى تۇلعالار عۇمىر بويى ارماندادى. سىزدەر باقىتتىسىزدار», دەدى اكادەميك.
جيىندا سونداي-اق شاكارىم ۋنيۆەرسيتەتىنىڭ رەكتورى دۋمان رىمعالي ۇلى جانە تۇركيا رەسپۋبليكاسى كونسۋلدىعىنىڭ ءبىلىم جونىندەگى اتتاشەسى, پروفەسسور شۇكىر كوشە كورنەكتى عالىمنىڭ مازمۇندى مۇراسىنا, ابايتانۋعا قوسقان كەلەلى ەڭبەگىنىڭ ماڭىزىن اتاپ ءوتتى. ابايتانۋعا ارنالعان ءدارىسحانانىڭ اشىلۋى قازاق عىلىمى مەن مادەنيەتىن دامىتۋداعى عىلىمي وراتلىقتىڭ بىرىنە اينالماق.
سيمپوزيۋمدا قايىم مۇحامەدحان ۇلى اتىنداعى ءبىلىم جانە مادەنيەت ورتالىعىنىڭ ديرەكتورى, عالىمنىڭ قىزى دينا قايىمقىزى ۋنيۆەرسيتەت قورىنا كىتاپتار سىيلادى.
