كورمەگە قازاقستان جانە قىرعىز رەسپۋبليكاسىنىڭ حالىق ءارتىسى, كومپوزيتور, مۋلتياسپاپشى, ەسىمى الەمگە تانىلعان ۆوكاليست ديماش قۇدايبەرگەننىڭ مۋزەي قورىنا سىيعا تارتقان جادىگەرلەرى قويىلدى.
مادەني ءىس-شارانىڭ اشىلۋىنا ونەر يەسىنىڭ ءوزى قاتىسىپ, ەكسپوزيتسيانىڭ لەنتاسىن قيدى. مۋزەيگە ءانشى جەكە مۇراعاتىنداعى 70-تەن استام مۋزىكالىق اسپاپتى سىيعا تارتتى. ونداي اسپاپتىڭ ءبىرى ديماشقا اتاسى بالا كۇنىندە سىيعا بەرگەن, شىعارماشىلىق جولىندا ۇنەمى جانىنا الىپ جۇرگەن قاستەرلى دومبىراسى بولسا, ەكىنشىسى – ءوز قولتاڭباسى قويىلعان مۋزىكالىق اسپاپ.
الماتى قالاسى مادەنيەت باسقارماسىنىڭ باسشىسى دانيار اليەۆ كورمەنىڭ مازمۇندىق ەرەكشەلىگىن اتاپ وتسە, الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا انشىگە حاكىم اباي اتامىز ۇستاعان دومبىرانىڭ كوشىرمەسىن ۇسىندى. ونىڭ ايتۋىنشا, كورمە ونەرى ارقىلى حالىقتاردى جاقىنداستىرىپ جۇرگەن دارىندى تۇلعانىڭ شىعارماشىلىعىن ناسيحاتتاپ, حالىقارالىق دەڭگەيدەگى جەتىستىكتەرىن ايشىقتاي وتىرىپ, ۇلتتىق مۋزىكالىق اسپاپتاردى دارىپتەۋدى ماقسات ەتەدى.
ءوز كەزەگىندە ىقىلاس مۋزەيىمەن بىرلەسكەن جوبانىڭ ماڭىزىنا توقتالعان ءانشىنىڭ اكەسى, قازاقستاننىڭ مادەنيەت قايراتكەرى, ءانشى, سازگەر, قانات ايتباەۆ ءىس-شارانىڭ رۋحاني-مادەني ماڭىزىنا توقتالىپ, ۇلتتىق ونەردى ۇلىقتاپ, الەم حالىقتارىنىڭ مۋزىكالىق مۇراسىن ءبىر كەڭىستىكتە توعىستىرعان تاعىلىمدى باستاما ەكەنىن اتاپ ءوتتى. ال ديماشتىڭ اناسى, قازاقستاننىڭ ەڭبەك سىڭىرگەن قايراتكەرى سۆەتلانا ايتباەۆانىڭ ايتۋىنشا, كورمەگە قويىلعان اسپاپتار وتباسى ءۇشىن اسا قىمبات. ديماشقا سىيلانعان اسپاپتاردىڭ العاشقىسى – بەلارۋس فانكلۋبى بەرگەن «گۋسلي». كورمەدە كۋبا, يرلانديا, مالايزيا, تاعى باسقا ەلدەردەن جينالعان اسپاپتار بار. ولاردىڭ ارقايسىسى الەمدەگى مىقتى دەگەن شەبەرلەردىڭ قولىنان شىققان.
كورمە جادىگەرلەرىنىڭ قاتارىندا ساحا حالقىنىڭ ءداستۇرلى اسپابى, مايكل دجەكسوننىڭ جەكە ءستيليسى گوكو زالدي ارنايى ازىرلەگەن ساحنالىق كوستيۋم, ايگىلى رۋمىن ۆيرتۋوزى گەورگە زامفير سىيلاعان پان-فلەيتا ەرەكشە قىزىعۋشىلىق تۋعىزادى.
كورمەدە الماتىلىق كىشكەنتاي ونەرپازدار ديماشتىڭ رەپەرتۋارىنداعى بىرقاتار ءاندى ورىنداپ, كوپشىلىكتىڭ ىقىلاسىنا بولەندى.
الماتى
