ەركىن كۇرەس شەبەرلەرىنىڭ جارىسىندا ەدىگە قاسىمبەكتىڭ اسقان شەبەرلىگىنە تامساندىق. 125 كگ سالماقتا ايقاسقان قازاقتىڭ نار تۇلعالى 19 جاستاعى بالۋانى بارلىق باسەكەدە باسىمدىق تانىتىپ, فينالدىق سايىستا بوزكىلەم قوجايىنى, الەم كۋبوگى مەن ەۋروپا چەمپيوناتىنىڭ قولا جۇلدەگەرى, توكيو وليمپياداسىنا قاتىسۋشى دەنيس حرومەنكوۆتى 5:4 ەسەبىمەن قاپى قالدىردى. ءسويتىپ, قاسىمبەك اسا بەدەلدى جارىستىڭ جەڭىمپازى اتاندى. ەستەرىڭىزگە سالا كەتەيىك, ءدال وسى قازاقتىڭ الىبى 2025 جىلى بولگاريانىڭ ساموكوۆ قالاسىندا ۇيىمداستىرىلعان جاستاردىڭ الەم بىرىنشىلىگىندە (U20) قارسىلاس شاق كەلتىرمەي, باس جۇلدەنى ولجالادى. سونداي-اق, ەدىگەنىڭ بىلتىر قازاقستان چەمپيوناتىنىڭ فينالىندا تالاي دۇرمەكتە ىسىلعان اككى الىشەر ەرعاليدى جەڭگەنى دە جانكۇيەرلەردىڭ جادىندا.
تانىمال بالۋاندار داۋلەت ەرگەش (86 كگ) پەن نۇرلان وتەگەنوۆتىڭ (79 كگ) دە جەڭىس تۇعىرىنىڭ ەڭ بيىك ساتىسىنا كوتەرىلۋگە جاقسى مۇمكىندىكتەرى بولدى. الايدا ولار فينالدا ءسۇرىندى. داۋلەت رەسەيلىك ازىرەت ۇلىمباشەۆتەن, نۇرلان بەلارۋستىك ماگومەدحابيب كاديماگومەدتەن ۇتىلدى. 70 كگ سالماق دارەجەسىنىڭ قولاسىن قازاقستاننىڭ قوس بالۋانى ناچىن كۋلار مەن امەرحان يانديەۆ ءوزارا ساراپقا سالىپ, بۇل باسەكە ءبىر عانا ۇپاي ايىرماشىلىعىمەن كۋلاردىڭ پايداسىنان شەشىلدى. سونداي-اق, ەراسىل مۇحتار ۇلى (57 كگ), ءادي سەرىك ۇلى (65 كگ), مەيىرجان ءاشىروۆ (74 كگ), سانجار دوسجانوۆ (74 كگ) جانە نۇركەرىم ەسنياز بەن بەيبارىس قاسىمبەك (92 كگ) ۇزدىك ۇشتىكتى تۇيىنەدى.
ايەلدەر كۇرەسىنەن وتكەن باسەكەدە لاۋرا عانيقىزى (50 كگ) مەن الينا ەرتوستىك (76 كگ) كۇمىسپەن كۇپتەلسە, يرينا كازيۋلينا مەن ەلەنا شالىگينا (68 كگ) قولاعا قول سوزدى.
سوفياداعى بوكس باسەكەسى: قازاقستاننىڭ 15 بىلعارى قولعاپ شەبەرى رينگكە كوتەرىلدى
