كوكتەم كەلەر تۇستا تاۋ بوكتەرىندەگى قار ەرىپ, ونىڭ سوڭىنان تولاسسىز جاۋعان جاۋىن سالدارىنان ت.رىسقۇلوۆ اۋدانىنىڭ اقىرتوبە, تەرەڭوزەك جانە ماماي اۋىلدارىنا سۋ جايىلدى. بۇل ايماقتا قاۋىپتى دەلىنەتىن سۋ قويمالارى مەن توعاندار بولماعانىمەن, تاۋ ىرگەسىندەگى اۋىل حالقىنىڭ كوكتەم كەلسە الاڭدايتىنداي جاعدايى بار. ءارى ەتەكتە ورنالاسقان اتالعان اۋىلدار ءۇشىن تاۋدان تۇسكەن قار سۋىنىڭ ۇرەي اكەلەتىنى انىق. اسىرەسە 27 اقپان كۇنى تەرەڭوزەك اۋىلىنداعى تەرەڭ سايدىڭ اراسىمەن ەنى 6, تەرەڭدىگى 2 مەتر سۋ اعىپ, جۇرتتى ابىگەرگە سالدى. ابىروي بولعاندا ەشقانداي ۇيگە, ادامدار مەن مال-جانعا زالال كەلگەن جوق. تەك لاي سۋدىڭ بەتىن باسقا ارناعا بۇرۋ ءۇشىن اۋىلعا كىرەبەرىس جول ارنايى جىرتىلدى. بۇدان سوڭ اقىرتوبە اۋىلىنان تەرەڭوزەك اۋىلىنا كىرەر تۇستاعى كوپىردىڭ دە الدى قازىلىپ, سۋ جازىق دالاعا اعىزىلدى.
تەرەڭوزەك اۋىلىندا تاسقىن ورىن العان كۇنى جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ وقيعا ورنىنا ارنايى بارىپ, حالىقپەن كەزدەستى. وبلىستىق جانە اۋداندىق توتەنشە جاعدايلار دەپارتامەنتىنىڭ باسشىلىعى دا سول اۋىلدا. وقيعا ورنىنا بارىپ, جامبىل وبلىستىق توتەنشە جاعدايلار دەپارتامەنتى باسشىسىنىڭ ورىنباسارى تالعات سابيروۆپەن تىلدەسكەنىمىزدە, ول ءدال قازىرگى ۋاقىتتا حالىققا ءتونىپ تۇرعان ەشقانداي قاۋىپتىڭ جوق ەكەنىن ايتتى.
ونىڭ ايتۋىنشا, اقىرتوبە, تەرەڭوزەك جانە ماماي اۋىلدارىنداعى 26 ءۇيدىڭ اۋلاسىنا سۋ كىرگەنمەن, ەشكىمنىڭ ءۇي-جايىنا نۇقسان كەلمەگەن. ءارى سول كۇنى وبلىس بويىنشا 150 ادام مەن 19 تەحنيكا جۇمىلدىرىلىپ, تاسقىننىڭ الدىن العان. اتاپ ايتقاندا, تۇرعىن ۇيلەردىڭ اۋلاسىنا كىرگەن لاي سۋلاردى سورىپ الۋ جۇمىستارى جۇرگىزىلىپ, سونداي-اق سۋ كەلەتىن دامبىلارعا 350 قاپ قۇم توسەلىپ, تەحنيكالاردىڭ كومەگىمەن 1 ميلليون 980 مىڭ ليتر لاي سۋ ەگىستىك القابىنا قاراي بۇرىلعان. ال ت.رىسقۇلوۆ اۋدانىنىڭ اكىمى اسقار قىرىقباەۆ سۋ كەلۋ قاۋپى بار جوعارعى ارنالاردا اۋداننىڭ 8 تەحنيكاسى جۇمىس ىستەپ جاتقانىن, ءارى اۋدان دەڭگەيىندە شتاب قۇرىلىپ, كەزەكشىلەر جۇمىس ىستەۋدە ەكەنىن ايتتى. سونىمەن قاتار اكىم ەشقانداي وتباسىنىڭ زارداپ شەكپەگەنىن, سوندىقتان دا كومەككە مۇقتاج ازاماتتاردىڭ جوق ەكەنىن مالىمدەدى.
ايتا كەتەيىك, تاۋلى ايماقتاردا ەرىپ, جۇرتتى ابىگەرگە سالعان قاردىڭ قالىڭدىعى 70 سانتيمەتر بولسا, جەردىڭ توڭى 55 سانتيمەتر بولىپتى. بۇل ورايدا ەرىگەن قار سۋىنىڭ جەرگە ءسىڭىپ كەتۋ مۇمكىندىگى وتە تومەن. ءدال وسىنداي وقيعا اۋداندا 1967 جىلى, ودان كەيىن 2005 جىلى ورىن العان. ون ءۇش جىلدان بەرى بولماعان وقيعا بيىل قىستىڭ سوڭىن الا تاعى قايتالاندى.
حاميت ەسامان,
«ەگەمەن قازاقستان»
جامبىل وبلىسى
