وسى ۋاقىتقا دەيىن وتاندىق ماماندار بۇل ءىس بويىنشا 4 رەت ساراپتاما جۇرگىزگەن. ەندى جابىرلەنۋشى تاراپىنان شاقىرتىلعان امەريكالىق مامانداردان قۇرالعان بەسىنشى توپ جامبىل وبلىسىنىڭ قىلمىستىق ىستەر بويىنشا مامانداندىرىلعان اۋدانارالىق سوتىندا وتكەن توقمادي ىسىنە بايلانىستى سوتقا قاتىسىپ, وزدەرى جاساعان ساراپتاما قورىتىندىلارىن جاريا ەتتى.
سوت بارىسىندا امەريكالىق تاۋەلسىز كريميناليست ساراپشى يريس دەللي مۇراتحان توقمادي ەرجان تاتىشەۆتى 12 سانتيمەتر قاشىقتىقتا اتىپ ولتىرگەنىن مالىمدەدى. جيىرما جىلدان بەرى كىسى ءولىمىن تەرگەۋدە تاجىريبەلى مامانعا اينالعان يريس دەللي كولىك ىشىندەگى كىسى ءولىمىن انىقتاۋ ءۇشىن مودەلدى انيماتسيا جاساپ, كولىك سالونىنىڭ كولەمىن سىزعان. «قارۋ كولىكتىڭ ارتىندا وتىرعان ادام ارقىلى قولدانىلعان. ناقتى ايتسام, وق تيگەن ادامنىڭ باسى مەن اتىلعان قارۋدىڭ قاشىقتىعى 12 سانتيمەتر. بۇل ماكسيمالدى ولشەم. تىم جاقىن دەگەننىڭ وزىندە 6 سانتيمەتر بولادى», دەدى يريس دەللي.
ايتا كەتەيىك, شەتەلدىك ماماندار جامبىل وبلىسىنىڭ قورداي اۋدانىنا قاراستى وتار جازىعىنداعى قىلمىس بولعان جەردە زەرتتەۋ جۇمىستارىن جۇرگىزگەن ەكەن. الايدا ساراپتاما توبىنىڭ جەتەكشىسى مايكل پاتريك سوت بارىسىندا «زاۋەر» ماركالى نەمىس ۆينتوۆكاسىنىڭ وزدىگىنەن اتىلماعانىن ايتتى. تاۋەلسىز كريميناليست ساراپشى 12-ءشى كاليبرلى ۆينتوۆكا وتە قىمبات قارۋ ەكەنىن, ونىڭ وزدىگىنەن اتىلمايتىنىن, سونداي-اق قارۋ تازالايتىن اداممەن تىلدەسكەنىن, ول قارۋدىڭ جاعدايىنىڭ جاقسى بولعانىن ايتقانىن دا جاريالادى.
ء«بىز بۇل ءىستى كومپيۋتەرلىك مودۋلدەر ارقىلى زەرتتەدىك. ەرجان تاتىشەۆتى كولىكتىڭ ارتىندا وتىرعان ادام اتقان. ولتىرۋگە ادەيى ارەكەتتەنگەن. ال جانىنداعى ادامنىڭ بۇل ىسكە قاتىسى جوق. رولدەگى ادام الدىنا قاراپ كەلە جاتقاندا اتىپ ولتىرىلگەن. بۇعان وقتىڭ ۇشۋى مەن مارقۇمنىڭ مي سۇيىقتىعىنىڭ شاشىلۋ باعىتى دالەل», دەدى شيرەك عاسىر بويى كىسى ءولىمىنىڭ سەبەپتەرىن اشۋعا ماماندانعان مايكل پاتريك.
امەريكالىق ساراپشى مامانداردىڭ پىكىرى وسىنداي. جامبىل وبلىسىندا مۇراتحان توقماديدىڭ ىسىنە قاتىستى سوت پروتسەسى ءالى جالعاسۋدا. جابىرلەنۋشى تاراپتىڭ ارنايى شاقىرتۋىمەن كەلگەن شەتەلدىك مامانداردىڭ پىكىرىنشە, تاتىشەۆكە وق ارتىنان اتىلعان بولىپ وتىر. ەسكە سالا كەتەيىك, توقمادي كتك ارناسىنداعى ارنايى دەرەكتى فيلمدە دە تاتىشەۆتى كولىكتىڭ ارتىندا وتىرىپ اتقانىن ايتقان بولاتىن.
حاميت ەسامان,
«ەگەمەن قازاقستان»
جامبىل وبلىسى
