كەزدەسۋگە فرانتسيا پارلامەنتى تومەنگى پالاتاسىنىڭ ۆيتسە-سپيكەرى كارول بيۋرو-بوننار, سىرتقى ىستەر جونىندەگى كوميتەتتىڭ مۇشەسى انني شاپيولە, سونىمەن قاتار دوستىق توپ حاتشىلىعى مەن قازاقستان ەلشىلىگىنىڭ قىزمەتكەرلەرى قاتىستى.
حالىقارالىق ساياساتتىڭ كوكەيكەستى ماسەلەلەرى جونىندە بارىنشا قىزىعۋشىلىق تۋدىراتىن, سونىمەن قاتار 2018 جىلعى ماۋسىمدا 10 جىلدىعى اتالىپ وتكەلى وتىرعان قازاقستان مەن فرانتسيا ستراتەگيالىق سەرىكتەستىگىنىڭ بولاشاعى مەن جاي-كۇيى تۋرالى پىكىر الماسۋ بولدى. تاراپتار ورتالىقسىزداندىرۋ بويىنشا ىنتىماقتاستىق پەن پارلامەنتتىك ديپلوماتياداعى ءوزارا ىقتالداستىقتى ءسوز ەتتى.
فرانتسۋز دەپۋتاتتارى ۇلتتىق ستراتەگيا مەن دامۋ باعدارلامالارى شەڭبەرىندەگى قازاقستان قوعامىندا بولىپ جاتقان ديناميكالىق دامۋ مەن باتىل رەفورمالاردى قۋاتتادى. سونىڭ ىشىندە ەلىمىزدىڭ ادام قۇقىقتارى مەن دەموكراتيا قاعيداتتارىن نىعايتۋداعى جەتىستىكتەرىنە باسا نازار اۋدارىلدى.
ءوز كەزەگىندە ك.بيۋرو-بوننار مەن ا.شاپيولە قازاقستاننىڭ الەم بويىنشا بىتىمگەرشىلىك جانە يادرولىق قارۋدى سىناۋعا تىيىم سالۋ مەن جاپپاي قىرىپ-جوياتىن قارۋدى تاراتپاۋ ىسىندەگى كوشباسشىلىق رولىنە جوعارى باعا بەردى. سونىمەن قاتار ولار بۇرىنعى سەمەي پوليگونى مەن ارال تەڭىزى باسسەينىندەگى تەحنوگەندىك ءزىلزالا ايماعىنداعى ەكولوگيانى قايتا قالپىنا كەلتىرۋدەگى بەلسەندى جۇمىستاردىڭ ماڭىزدىلىعىن اتاپ ءوتتى.
فرانتسيا پارلامەنتشىلەرى پرەزيدەنت نۇرسۇلتان نازارباەۆتىڭ قازاقستان حالقىنا ارنالعان ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا كورسەتىلگەن مىندەتتەرگە ەرەكشە قىزىعۋشىلىق تانىتتى. قازاقستاندىق ەلشى جولداۋداعى باعىتتاردى فرانتسيانىڭ ءارتۇرلى ايماعىندا ورنالاسقان ءىرى, ورتا جانە كىشى كاسىپورىندارمەن ىنتىماقتاستىقتى ورناتۋ كوزقاراسى تۇرعىسىنان ءتۇسىندىرىپ بەردى.
پ.كابارە قازاقستاندىق ارىپتەسى ومارحان وكسىكباەۆتىڭ شاقىرۋى بويىنشا وسى جىلدىڭ ەكىنشى جارتىسىندا دوستىق توپتىڭ باسشىسى رەتىندە ءبىزدىڭ ەلگە بارۋ نيەتىن راستادى. ونىڭ ويىنشا, قازاقستان فرانتسۋزدارعا تەك سەنىمدى ەكونوميكالىق جانە ساياسي سەرىكتەستىك رەتىندە عانا ەمەس, سونداي-اق تۋريستىك باعىت بويىنشا ءالى اشىلا قويماعان ۇلى جىبەك جولى وتەتىن ءار الۋان مادەنيەتكە باي ەل قالپىندا قىزىقتىرادى.
فرانتسيا ۇلتتىق اسسامبلەياسىنىڭ دەپۋتاتتارى 2017 جىلدىڭ 18 جەلتوقسانىندا قازاقستان مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوباسىن كوپشىلىك داۋىسپەن قولداعانىن ەسكە سالامىز. بيىلعى 15 اقپاندا اتالعان تاريحي قۇجاتقا فرانتسيا سەنات مۇشەلەرى دە ءبىراۋىزدان داۋىس بەرگەن بولاتىن. الداعى ۋاقىتتا زاڭ ەلدىڭ پرەزيدەنتىنىڭ قول قويۋىمەن بەكىتىلەدى دەپ كۇتىلۋدە.
«ەگەمەن-اقپارات»
