ەكى ساعاتقا جۋىق ۋاقىتقا سوزىلعان ەسەپتى جيىندا ايماق باسشىسى ءوڭىردىڭ وتكەن جىلداعى جەتىستىكتەرىن تىزبەلەپ قانا قويماي ءتۇيىنى تارقاماي جۇرگەن ماسەلەلەردى دە جاسىرماي ايتىپ, ءتيىستى ورىندارعا تاپسىرما جۇكتەپ وتىردى. وبلىس اكىمى اياگوز بەن سەمەيدە ەت كومبيناتى قۇرىلىسى باستالاتىنىن, وسكەمەندە قازاقستاندىق ونىمدەردى قىتاي ستاندارتىمەن سەرتيفيكاتتايتىن ۇلكەن زەرتحانا سالىناتىنىن, ەۋروپالىق دامۋ بانكى ارقىلى وبلىس ورتالىعىندا قوقىس وڭدەۋ زاۋىتى بوي كوتەرەتىنىن جەتكىزدى. وڭىردە دارىگەرلەردىڭ بىلىكتىلىگىن ارتتىرىپ, مەديتسينالىق مەكەمەلەردى جاڭا قۇرىلعىلارمەن جابدىقتاۋعا دا كوڭىل ءبولىنىپ وتىرعانى بەلگىلى. 2016 جىلى 12 دارىگەر (انگليا), 2017 جىلى 61 دارىگەر شەت ەلدە (51-ءى انگليادا, 10-ى پولشادا) وقىپ كەلگەن-ءدى. د.احمەتوۆتىڭ سوزىنە سەنسەك, ءۇش جىلدا شەت مەملەكەتتە 150 دارىگەر شەبەرلىگىن شىڭداماق. بىلتىر ايماقتاعى ەمحانالارعا 9 ميلليارد تەڭگەگە 1023 دانا جوعارى تەحنولوگيالى قۇرىلعىلار ساتىپ الىنعان. سوعان قاراماستان وبلىستىڭ مەديتسينا سالاسىندا شەشىمىن تاپپاعان ماسەلەلەر دە از ەمەس. ءوڭىردىڭ مەديتسينا مەكەمەلەرىن تسيفرلاندىرۋ تۇرعىسىنداعى كەمشىلىكتەردى جيىندا اكىمنىڭ ءوزى دە اتاپ ءوتىپ, دەنساۋلىق ساقتاۋ باسقارماسىنا ارنايى باعدارلاما ازىرلەۋدى تاپسىردى. ايماقتا قۇرىلىس قارقىن العانىمەن جۇمىسقا كەدەرگى كەلتىرىپ تۇرعان جايتتەر دە جوق ەمەس. «بيىل 200 كوپ پاتەرلى ءۇيدىڭ قۇرىلىسى باستالادى. الايدا, وتىز بەس ۇيگە ءتيىستى قۇجات, بەس ۇيگە قاجەتتى كوممۋنيكاتسيا تارتىلماعان. ەكى قالا اكىمى مەن قۇرىلىس باسقارماسى بۇل باعىتتا وسالدىق تانىتتى. ورىنباسارىم مەن قالا, اۋدان اكىمدەرىنە تۇرعىن ءۇي قۇرىلىسىن الداعى ۋاقىتتا بەس ءجۇز مىڭ شارشى مەترگە دەيىن جەتكىزۋدى تاپسىرامىن», - دەدى د.احمەتوۆ.
ءوڭىر باسشىسى ەسەپتىك كەزدەسۋدە وبلىستىڭ ءبىلىم سالاسىنداعى جەتىستىكتەرگە توقتالىپ, كەمشىلىككە جول بەرگەن اۋدان مەن قالالاردى سىنعا الىپ, جۇمىستى شيراتۋدى جۇكتەدى. وبلىس اكىمى ۇبت تاپسىرۋ بويىنشا قالا مەكتەپتەرىنىڭ كورسەتكىشتەرى تومەندەپ, كەرىسىنشە اۋىل مەكتەپتەرىنىڭ وقۋشىلارى بيىكتەن كورىنگەنىن ساندارمەن سالىستىرا وتىرىپ ايتىپ بەردى. بۇل رەتتە كوكپەكتى, اياگوز جانە تارباعاتاي اۋداندارىن ەرەكشە اتاپ وتۋگە بولادى. ماسەلەن, بىلتىر ۇبت تاپسىرۋ كەزىندە 20 اۋىل مەكتەبى 100-دەن جوعارى بالل جيناسا, قالادان تەك 9 مەكتەپ قانا وسىنداي كورسەتكىشكە قول جەتكىزىپتى. « اتالعان تىزىمدە وسكەمەننىڭ 3 مەكتەبى ءجۇر. سەمەي مۇلدە تىزىمدە جوق. بۇل وڭىردەگى ءىرى قالالاردا ءبىلىم ساپاسىنىڭ تومەندەگەنىن كورسەتەدى», - دەدى ايماق باسشىسى.
ءوڭىر مەكتەپتەرىن بىتىرگەن تۇلەكتەردىڭ شەت ەلگە, ونىڭ ىشىندە رەسەيدىڭ جوعارى وقۋ ورىندارىنا كەتىپ جاتقانى دا جيىندا نازاردان تىس قالمادى. د.احمەتوۆ 11 جىل باعىپ-قاعىپ, ءتالىم-تاربيە بەرگەن وقۋشىلارىمىزدىڭ وزگە ەلگە كەتۋىنە جول بەرمەس ءۇشىن وڭىردە «بىلىكتى مامان» اتتى ارنايى باعدارلاما ازىرلەنىپ, 2017 جىلى 200, بيىل دا وسىنداي كولەمدە گرانت بولىنگەنىن تىلگە تيەك ەتتى.
وبلىس اكىمىنىڭ ەسەبى اياقتالعاننان كەيىن سۇراق-جاۋاپقا كەزەك بەرىلدى. الايدا سۇراعىن قويعانشا ايماق باسشىسىنىڭ اتقارعان جۇمىستارىن جىپكە ءتىزىپ, ۋاقىتتى الىپ, زالداعى جۇرتتى جالىقتىرعان تۇرعىندار دا بولدى. قويار ساۋالىنان ايتار ماقتاۋى كوپ تۇرعىنداردى «العىستى ماعان ەمەس, ەلباسىعا ايتىڭىزدار. وڭىردەگى جۇمىستاردىڭ بارلىعى مەملەكەت باسشىسىنىڭ تاپسىرماسى نەگىزىندە اتقارىلىپ جاتىر» دەپ ءوڭىر باسشىسىنىڭ ءوزى ارەڭ توقتاتىپ, سەمەيدەگى راديولوگيالىق ورتالىقتىڭ قۇرىلىسى مەن زايسانداعى شىلىكتى قورىمىنا مۋزەيدىڭ قاشان سالىناتىنى سەكىلدى وزەكتى ساۋالداردى قويعان ادامدارعا جان-جاقتى, تۇششىمدى جاۋاپ قايتاردى.
كەرەك دەرەك
2017 جىلى وبلىستا 380 مىڭ شارشى مەتر تۇرعىن ءۇي پايدالانۋعا بەرىلدى. 46 ميلليارد تەڭگەگە 357 شاقىرىم جول جوندەلدى. 8,3 ميلليارد تەڭگە قارجىعا 17 مىڭ تۇرعىنى بار 21 ەلدى مەكەنگە اۋىز سۋ تارتىلدى. كاسىپكەرلىكتى قولداۋ كارتاسى اياسىندا 381 ميلرد تەڭگەنىڭ 6 جوباسى جۇزەگە اسىرىلدى.
2018 جىلى 82,3 ميلليارد تەڭگە قارجىعا «قالباتاۋ – مايقاپشاعاي», «الماتى - وسكەمەن», «ومبى-مايقاپشاعاي», «تاسكەسكەن-باقتى», «وسكەمەن - زىريان – راحمان قاينارى» جولدارىن رەكونسترۋكتسيالاۋ, «وسكەمەن – سەمەي», «وسكەمەن – شەمونايحا», «قاراعاندى – اياگوز», «تاسكەسكەن – باقتى», «ماكانشى – جالاڭاشكول», «دميتريەۆكا - بورودۋليحا – شەمونايحا», «سەمەي-قاراۋىل» باعىتتارىنداعى جولدارعا ورتاشا جوندەۋ جۇمىستارى جۇرگىزىلىپ, 1,3 ميلليون شارشى مەتر تۇرعىن ءۇي قۇرىلىسىن پايدالانۋعا بەرۋ جوسپارلانعان. 14 مىڭ حالىق تۇراتىن 11 اۋىلدى اۋىز سۋمەن قامتۋ ءۇشىن 20 جوبا ازىرلەنگەن. كاسىپكەرلىكتى قولداۋ كارتاسى اياسىندا قۇنى 114 ميلليارد تەڭگەنى قۇرايتىن 9 جوبا جۇزەگە اسىرىلماق.
ازامات قاسىم,
«ەگەمەن قازاقستان»
وسكەمەن
