التىنشى سايلانعان پارلامەنت ءماجىلىسىنىڭ وكىلەتتىكتەرىن ىسكە اسىرۋدىڭ ءۇشىنشى سەسسياعا ارنالعان نەگىزگى ءىس-شارالار جوسپارىنا سايكەس ۇيىمداستىرىلعان وسى شاراعا ءماجىلىس دەپۋتاتتارى, قورعانىس مينيسترلىگىنىڭ, ۇقك شەكارا قىزمەتىنىڭ, ۇلتتىق ۇلان قولباسشىلىق قۇرامىنىڭ وكىلدەرى قاتىستى.
بەيىندى كوميتەت توراعاسى مۇحتار ەرمان كوشپەلى وتىرىستى اشا كەلە, قازاقستان رەسپۋبليكاسى تاۋەلسىزدىك العان كەزدەن بەرى مەملەكەت باسشىسى, جوعارعى باس قولباسشى نۇرسۇلتان ءابىش ۇلى نازارباەۆتىڭ قامقورلىعى ارقاسىندا زاماناۋي, تيىمدىلىگى جوعارى, ۇتقىر قارۋلى كۇشتەر قۇرۋ بويىنشا وراسان زور جۇمىس اتقارىلعانىن اتاپ ءوتتى. قورعانىس سالاسىنداعى ستراتەگيالىق قۇجات بولىپ تابىلاتىن قازاقستان رەسپۋبليكاسىنىڭ اسكەري دوكتريناسى بەكىتىلدى. ءوز كەزەگىندە ەل پارلامەنتى دە بۇل جۇمىستان شەت قالىپ وتىرعان جوق. ەلدىڭ قورعانىس قابىلەتىن ارتتىرۋعا جانە اسكەري قىزمەتشىلەر مەن ولاردىڭ وتباسى مۇشەلەرىنىڭ الەۋمەتتىك جاعدايىن جاقسارتۋعا باعىتتالعان بىرقاتار ماڭىزدى زاڭنامالىق اكتىلەر قابىلداندى.
وسى جۇمىس ساپارى بارىسىندا ءماجىلىس دەپۋتاتتارى قورعانىس مينيسترلىگى, ۇلتتىق ۇلان جانە ۇقك شەكارا قىزمەتى اسكەري بولىمدەرىنىڭ جاۋىنگەرلىك ازىرلىك ماسەلەلەرىن زەردەلەدى.
اتالعان اسكەري بولىمدەردە دەپۋتاتتار قارۋ-جاراق قۇرامىنداعى تەحنيكانى قاراپ شىعىپ, مەحانيكالاندىرىلعان بريگادانىڭ اسكەري قىزمەتشىلەرىن دايىنداۋ جونىندەگى ترەناجەرلىك كەشەننىڭ مۇمكىندىكتەرىمەن تانىستى.
پارلامەنتشىلەرگە زاماناۋي قارۋ-جاراق, اسكەري تەحنيكا مەن م ۇلىك ۇلگىلەرى, بولىمشەلەردىڭ جاۋىنگەرلىك ازىرلىگى كورسەتىلدى.
وسى شارا بارىسىندا ءماجىلىس دەپۋتاتتارى قورعانىس مينيسترلىگى تاۋلى-ەگەرلىك بولىمشەسىنىڭ ورنالاسقان جەرىن بارىپ كورىپ, ۇلى وتان سوعىسىنىڭ داڭقتى باتىرى باۋىرجان مومىش ۇلىنىڭ ەسكەرتكىشىنە گۇل قويدى.
حاميت ەسامان,
«ەگەمەن قازاقستان»
