كەڭەس اسكەرىنىڭ اۋعانستان اۋماعىنان شىعارىلعانىنىڭ 29 جىلدىعىنا ارنالعان ەكسپوزيتسيانى قالا تۇرعىندارى, جاۋىنگەر-ينتەرناتسيوناليستەر, مەكتەپ وقۋشىلارى جانە ت.بيگەلدينوۆ اتىنداعى اسكەري مەكتەپ-ينتەرناتتىڭ كادەتتەرى تاماشالادى.
كورەرمەندەر نازارىنا 200-دەن استام جادىگەر ۇسىنىلدى. ونىڭ ىشىندە فوتوسۋرەتتەر, اۋعان سوعىسى كەزىندەگى اسكەري كيىم-كەشەكتەر, ناگرادالار مەن ەرەكشەلىك بەلگىلەرى بولدى.
«مەدالدىڭ سىرت جاعى» كورمەسىن بەزەندىرۋ بارىسىندا اۆتورلاردىڭ كوپ ويلانۋلارىنا تۋرا كەلىپتى. ماسەلەن, «بۇل فوتوسۋرەتتەردى بالالارعا كورسەتۋگە بولا ما؟ ولار كورەرمەندەر جۇرەگىندە قورقىنىش تۋدىرماي ما؟», دەگەن سۇراقتار تۋىنداعان. ويلانا كەلە, ۇيىمداستىرۋشىلار بولاشاقتا مۇنداي قاتەلىكتەر قايتالانباس ءۇشىن جاس ۇرپاق سوعىستىڭ سۋرەتتەردەگى قاسىرەتتى ءىزىن, جازىلماس جاراسىن ءوز كوزىمەن كورۋلەرى كەرەك دەگەن توقتامعا كەلىپتى.
فوتوگراف داۋلەت ابدراحمانوۆتىڭ «قىزىل ءىز» كورمەسى جاۋىنگەر-ينتەرناتسيوناليستەردىڭ قازىرگى زامانداعى پورترەتتەر گالەرەياسىن كورەرمەن نازارىنا ۇسىندى. ءار سۋرەتتە ەكى كەزەڭ ۋاقىتى شەندەستىرىلە كورسەتىلگەن – الىستا قالعان 80-ءشى جىلدار جانە ونىڭ اياسىنداعى بۇگىنگى كۇن بەينەسى.
اتالعان كورمە جاۋىنگەر-ينتەرناتسيوناليستەردىڭ ەرلىك ىستەرى مەن ءوز مىندەتتەرىنە دەگەن ادالدىقتارىن بۇگىنگى بۋىن وكىلدەرىنە ۇلگى قىلىپ كورسەتۋدى ماقسات ەتكەن.
قايرات ءابىلدا,
«ەگەمەن قازاقستان»
