شارا ۇيىمداستىرۋشىلارى - يندەر اۋداندىق اكىمدىگى. جارىستىڭ ماقساتى - وڭتۇستىك كورەياداعى قىسقى وليمپيادا ويىندارىنا قاتىسىپ جاتقان قازاقستاندىق وليمپياداشىلارعا قولداۋ ءبىلدىرۋ. يندەر اۋدانىنىڭ اكىمى سەرىك ارىستاننىڭ ايتۋىنشا, بالالاردىڭ ۇمتىلىسى جاقسى, سوندىقتان جەرگىلىكتى وقۋشىلار ايماقارالىق جارىستاردا ىلعي جۇلدەلى ورىنعا يە.
«وتكەن جىلى بارلىق مەكتەپتەرگە شاڭعى مەن كونكي الىندى. باستى ماقسات – اۋداندا قىسقى سپورت تۇرلەرىن دامىتۋ. بۇگىنگى كۇنگە دەيىن بالالاردىڭ جاتتىعۋىنا مۇمكىندىك بولمادى. ەندى بارلىق مەكتەپتە ءوز كوماندالارى بار. بۇگىن اۋدان تاريحىندا العاش رەت قازاقستاندىق وليمپياداشىلاردى قولداۋ ماقساتىندا سايىس وتكىزدىك», دەيدى سەرىك ارىستان.
تازا اۋاداعى قىزىقتى سايىس ەشكىمدى بەي-جاي قالدىرمادى.
«وسىنداي جارىستار ءجيى ءوتىپ تۇرعانىن قالايمىن. ءبىز كورشى وبلىستاردا وتكەن وسىنداي جارىستارعا قاتىسىپ, ەكىنشى ورىن الدىق. ەندى ىلعي جاتتىعىپ, كەلەسى جارىستاردا مىندەتتى تۇردە جۇلدەلى ورىن الامىز», دەدى قاتىسۋشىلاردىڭ ءبىرى سۇلتانبەك راحمەتوۆ.
ايتا كەتەيىك, وڭىردە جازعى سپورت تۇرلەرى ءداستۇرلى تۇردە قارقىندى دامىپ كەلەدى. وتكەن جىلدان باستاپ مۇندا قىسقى سپورت تۇرلەرىن دامىتۋدى دا قولعا العان. تەك يندەر اۋدانىندا عانا 49 ميلليون تەڭگەگە بارلىق مەكتەپتەرگە قاجەتتى قۇرالدار الىندى.
