اقسۋ قالاسى اۋىلدىق اۋماعىنىڭ «الينا», «باستاۋ», «كاتيۋشا», «ماماداليەۆ», «اسەل جانە ك», «اققۋ», «زامان», «قىزىلجار-قۇس» جشس, «جامانوۆ» جانە «رەي-اگرو» جك جانە باسقا دا ءونىم وندىرۋشىلەردىڭ دە ونىمدەرى تۇرعىندارعا جاقسى تانىس. ىزدەگەنىڭىزدى جارمەڭكەدەن تاباسىز. اۋىلدىڭ تازا ءونىمى.
باعالار بازارلار مەن شاعىن دۇكەندەردەگى باعادان الدەقايدا تومەن. اۋدانداردان جەتكەن شارۋاشىلىقتار سيىر, جىلقى, قوي ەتىن, 1,5 توننا قۇس ەتىن, 15 توننا كارتوپ, 9 توننا ءسابىز, 3 توننا قىزىلشا, 6 توننا قىرىققابات جانە تاعى باسقا ونىمدەر اكەلىپتى. سيىر ەتىنىڭ ءبىر كيلوسى 1400 تەڭگەدەن ساۋدالانسا, جىلقى ەتى 1500 تەڭگەدەن, كارتوپ, كوكونىس ونىمدەرىنىڭ قۇنى 75-80 تەڭگە ارالىعىندا. ال اقسۋدا جارمەڭكە «اۋىل بازارىندا», ەكىباستۇزدا «اۋىل» بازارىندا ايىنا ەكى رەت وتەدى.
بايقاعانىمىزداي, وبلىس ورتالىعى اۋىلدىق اۋماعىنا قاراستى اۋىلداردان, اقسۋدان, پاۆلودار اۋدانى اۋىلدارىنان كەلەتىن اعايىندار قۇرتتىڭ اششىسىن دا, ءتاتتىسىن دە جاساپ, قايماق, ءسۇت, قولدان ۇيىتقان ايران, ماي, كىلەگەي, تالقان, سۇزبەسى دەيسىز بە, ءبارى بار. سىي-سياپاتقا قاجەت قولونەر بۇيىمدارىن دا تاستاماي جارمەڭكەگە الىپ كەلەدى. قوراسىنداعى مالىن باعىپ, ءوسىرىپ, ءوز ءونىمىن وزدەرى جاساپ دايىنداپ, سەنبى سايىن ارقالانىپ قالاعا جەتەدى. ناتيجەسىندە وتباسىندا بەرەكە, بالا-شاعا توق, امان-ەسەن. ۇيدەگى شارۋاشىلىعىنىڭ زەينەتى دەگەن وسى.
وبلىس اكىمدىگىنىڭ مالىمەتىنشە, سەنبى سايىن جارمەڭكە وتكىزۋدەگى ماقسات – وبلىس ورتالىعى تۇرعىندارىنىڭ 20 پايىزىن ارزان ونىممەن قامتۋ. بۇل اۋىلشارۋاشىلىق ونىمدەرىنىڭ, ازىق-ت ۇلىكتىڭ باعالارىن تۇراقتاندىرۋعا مۇمكىندىك بەرەدى. ياعني تۇرعىندار ءبىر اپتاعا جەتەرلىك قورىن ساتىپ الا الادى. باعا ساياساتىن تۇراقتاندىرۋ جارمەڭكە وتكىزۋمەن دە شەكتەلمەيدى.
– سوندىقتان بيىل «پاۆلودار» الەۋمەتتىك-كاسىپكەرلىك كورپوراتسياسى» اق ارقىلى دا قۇس ەتى, قيار, قىزاناق, كۇرىش, قانت, وسىمدىك مايى سياقتى ونىمدەر ساتىپ الىندى. بۇل ازىق-ت ۇلىك ونىمدەرى الەۋمەتتىك دۇكەندەر ارقىلى ساۋدالانۋدا, – دەيدى وبلىس اكىمىنىڭ ورىنباسارى باۋىرجان قاسەنوۆ.
جالپى, جارمەڭكە – شارۋا قوجالىقتارعا دا, تاۋار وندىرۋشىلەرگە دە, تۇتىنۋشىعا دا ءتيىمدى. بۇل اۋىلدا جاسالاتىن, وندىرىلەتىن ونىمدەردى وتكىزۋدىڭ ۇتىمدى جولى.
فاريدا بىقاي,
«ەگەمەن قازاقستان»
پاۆلودار وبلىسى
