ازيادا بۇعان دەيىن اق وليمپيادا ويىندارى نەبارى ەكى رەت, ەكەۋىندە دە جاپونيانىڭ – ساپپورو (1972), ناگانو(1998) قالالارىندا وتكەن ەكەن. ازيانىڭ جولبارىسى – وڭتۇستىك كورەيا كورشىلەرىمەن يىق تىرەسكەن الپاۋىت مەملەكەتتەردىڭ ءبىرى. ەندەشە نەگە قيمىلداماسقا؟ «ەر كەزەگى ۇشكە دەيىن» دەمەكشى, 2010 جىلى كانادانىڭ ۆانكۋۆەر قالاسىنا نەبارى ءۇش داۋىس جەتپەي ۇتىلىپ قالعان كورەيلەر ارادا ءتورت جىلدان كەيىن رەسەيدىڭ سوچي قالاسىنداعى تارتىستا تاعى دا ءتورت داۋىسپەن جەڭىلىپ قالدى. پىسىق, العان بەتىنەن قايتپايتىن كورەيا مەملەكەتىنىڭ قايسار جاندارى ءتىپتى سوناۋ 2014 جىلى پحەنچحان مەن كاننىن قالاسىندا عالامات سپورت كەشەندەرىن سالىپ قويدى. وسىدان التى جىل بۇرىن پحەنچحان قالاسى وليمپيادانى وتكىزۋ قۇقىعىن العاننان كەيىن دە بىرنەشە زاماناۋي سپورت كەشەندەرىن تۇرعىزدى.
وليمپيادا ويىندارى پحەنچحانداعى تاۋ كلاستەرىندە جانە كاننىن قالاسىنداعى جاعالاۋ كلاستەرىندە وتپەك. پحەنچحانداعى «الپەنسيا» سپورت پاركىندە شاڭعىمەن سەكىرۋ, بياتلون, شانا-بوبسلەي ورتالىعى, شاڭعىمەن جۇگىرۋ, ال بوكون پاركىندە فريستايل مەن سنوۋبورد جارىستارى وتسە, تاياۋ جەردەگى كانۆوندو پروۆينتسياسىنىڭ كاننىن قالاسىندا كەرلينگ, مانەرلەپ سىرعاناۋ, كونكيمەن جۇگىرۋ, شورت-ترەك سايىستارى جانكۇيەرلەردىڭ كوزايىمىنا اينالماق. بيىك قاباتتى ۇيلەردەن ساپ تۇزەگەن وليمپيادا قالاشىعى كورىكتى, قار جۇقا, تەك تاۋ ەتەگىندە اپپاق قار ايناداي جارقىرايدى. ايتا كەتۋ كەرەك, قازاقستاننان كەلگەن باپكەرلەردىڭ ءبىر توبى, ليتسەنزيا الا الماسا دا بۇر-سارق قايناپ جاتقان جارىستاردان رەپورتاجدار تاراتۋعا كەلگەن ءبىر توپ جۋرناليستەر, جانكۇيەرلەرىنىڭ كوبى كاننىن جاعالاۋ كلاستەرىندەگى قوناقۇيلەرگە ورنالاسقان. وليمپيا ويىندارى قاشان ارزان بولىپ ەدى, مۇندا دا قىمباتشىلىق, باعا ۋداي, وسكەمەننەن كەلگەن فريستايلشى اياۋلىمنىڭ اكەسى سەرىك امىرەنوۆ, بولاشاعىنان ءۇمىت كۇتەتىن شاڭعىشى يۆان ءليۋفتىڭ دەمەۋشىسى, پەرۆومايكالىق كاسىپكەر سەرگەي گلۋشكوۆ ۇشەۋىمىز قۋىقتاي عانا ءبىر بولمەگە ورنالاستىق. وكىنىشكە قاراي يۆان ليۋفت وليمپيادا جولداماسىن يەلەنە المادى.
بۇعان دەيىن وسى جولداردىڭ اۆتورى ءتورت جازعى, ەكى اق وليمپيادا ويىندارىنا قاتىسقان. دۇنيە ءجۇزىنىڭ تۇكپىر-تۇكپىرىنەن كەلگەن سپورت جۇلدىزدارى وليمپيادانىڭ مەدالىن الۋ ءۇشىن جانىن سالىپ, اق تەر-كوك تەر بولىپ جاتادى. الايدا قازاقستان قىسقى سپورتتان ەسەسىن جىبەرىپ العان. 1994 جىلعى نورۆەگيانىڭ ليللەحاممەر قالاسىندا ۆ.سميرنوۆ التىننان القا تاققان ەدى. سودان بەرى التىن ارمانعا اينالدى. سميرنوۆتىڭ ەكى كۇمىس, ءبىر قولاسى, پاۆلودارلىق شاڭعىشى پروكاشەۆا مەن سوچيدەگى مانەرلەپ سىرعاناۋشى دەنيس تەننىڭ العان ءبىر-ءبىر قولاسى جىرتىققا جاماۋ بولا الار ما ەكەن؟ ك ۇلىمدەگەن كورەيا ەلىندە ءۇمىت كۇتكەن جەرلەستەرىمىز فريستايلشىلار يۋليا گالىشەۆا مەن دميتري رەيحەرد جۇلدەگە قول سوزسا, نۇر ۇستىنە نۇر. بۇل ەكەۋىنىڭ دە جۇلدە تەرۋگە قاۋقارى بار. وسىندايدا ەسكە تۇسەدى, سوچيدە قوس ساڭلاقتىڭ ونەرىن تاماشالاعان ەدىك. الدىن الا وتكەن ىرىكتەۋ جارىستا يۋليا شەبەر ونەر كورسەتسە دە كانادا مەن امەريكانىڭ تورەشىلەرى قاساقانا توبىقتان قاعىپ, سۋپەرفينالعا (جەتىنشى ورىن) جىبەرمەي قويدى. ءسويتىپ تالانتتى قىزدان «كەك» قايتاردى. ول قانداي كەك؟ بۇدان ءۇش-ءتورت جىل بۇرىن كانادالىق باپكەرلەر گالىشەۆانى ءوز ەلى اتىنان جارىستارعا قاتىستىرۋعا تىرىسقان. الايدا جۇرەگى قازاق ەلى دەپ سوققان يۋليا ءتىپتى رەسەيلىك مامانداردىڭ دا ۇسىنىسىنان باس تارتتى. بۇل وقيعانى يۋليانىڭ ءوز اۋزىنان ەستىگەنبىز. ال سوچيدە دميتري رەيحەرد تە تاماشا ونەر كورسەتتى. ول ءتىپتى قولا جۇلدەگەر اتانادى دەپ رەسەيلىك سپورت كوممەنتاتورى بىرنەشە رەت ەفيردەن ايتىپ جىبەردى. وكىنىشكە قاراي بۇل جولى دا باتىراش, قوتىراشتار قولدا تۇرعان كەم دەگەندە ءبىر مەدالدى كوزدى باقىرايتىپ تۇرىپ تارتىپ الدى.
ەگەر دەموكراتيا ۇستەمدىك قۇرعان وڭتۇستىك كورەياداعى وليمپيا ويىندارى كەزىندە باپكەرلەر ءادىل قازىلىق جاساسا, ەكى ساڭلاقتان دا مەدال كۇتەمىز. ال وسكەمەندىك تالانتتى قىز اياۋلىم امىرەنوۆا ءالى جاس, نەبارى 16-دا. بۇل ءدۇبىرلى دودادا اياۋلىم العاشقى جيىرمالىققا ەنىپ جاتسا جامان بولماس. 3 اقپاندا پحەنچحانعا كەلىپ, بەسى كۇنى العاشقى جاتتىعۋلارىن جاساعان اياۋلىم فريستايل تراسساسىنىڭ اسا قاۋىپتى ەكەنىن, ونىڭ ۇستىنە اۋا رايىنىڭ دا قۇبىلمالى بولىپ تۇرعانىن ايتتى.
بۇل شاڭعىشى الەكسەيدىڭ سوڭعى وليمپياداسى بولار. جاس بولسا وتىزدان استى. پولتورانين ءوزىنىڭ ءتورتىنشى وليمپياداسىندا قالاي دا ءبىر مەدال الۋعا جانىن سالاتىن شىعار دەگەن ويدامىز. الەكسەيدىڭ تۋريندە جانە سوچيدەگى ونەرىن تاماشالادىق. تاجىريبەسى مول, كلاسسيكالىق جۇگىرۋدىڭ شەبەرى نەگە ەكەنى بەلگىسىز, الەم كۋبوگى جارىستارىندا بارلىق كۇشىن جۇمساپ الاتىن سياقتى. وتكەن جىلدىڭ سوڭىندا الەم كۋبوگى جارىستارىندا قاتارىنان التى رەت التىنعا, بىرنەشە جۇلدەگە قول سوزدى. تاكتيكالىق قاتەلىكتى وسى جولى دا جىبەرىپ الدى ما دەگەن وي مازالايدى. سەبەبى سكانديناۆيا ەلدەرى مەن رەسەيدىڭ جۇيرىكتەرى تەك ءبىر-ەكى رەت قانا الەم كۋبوگىنا قاتىسىپ, وندا دا «قۇپياسىن» اشپاي, كۇشىن پحەنچحانداعى دوداعا ساقتاپ قالدى. ونىڭ ۇستىنە الەكسەيدىڭ وڭ جامباسىنا كەلەتىن ءوزىنىڭ سۇيىكتى كلاسسيكالىق تاسىلمەن 15 شاقىرىمدىق سايىسى ەركىن جۇگىرۋگە اۋىستىرىلدى. ال جەرلەسىمىز بۇل ءادىستى ۇناتا قويمايدى. دەسەك تە جارىس جولىنا ەكى نەمەسە ءۇش رەت شىعاتىن الەكسەيگە ءبىز سەنەمىز.
شەتەلدىڭ ساراپشىلارى قازاقستان وليمپيادادا ءبىر مەدال, قولانى د.رەيحەرد الۋى مۇمكىن دەپ جاريا ەتتى. كىم ءبىلسىن, جورامال ءدال كەلۋى مۇمكىن. بىراق قازاقستانعا كەم دەگەندە ءبىر ەمەس, ەكى مەدال قاجەت. ەلىمىزدىڭ سپورت باسشىلارى ساڭلاقتارعا وسىنداي تالاپ قويىپ وتىر. تاعى كىمدەردىڭ مەدال الۋعا قاۋقارى بار؟ دەنيس تەن جاتتىعۋدا قاتتى جاراقات العان, ءۇمىت از. وڭتۇستىكتىڭ فريستايل-اكروباتيكا شەبەرلەرى سىن ساتتە جارق ەتە قالۋى مۇمكىن. ال مادىعالي قارسىبەكوۆ جەتەكشىلىك ەتەتىن شورت-ترەكتىڭ شەبەرلەرى دە مەدال ءۇشىن جانىن سالماق. سوچيدەگى ەستافەتالىق جارىستاعى بەسىنشى ورىن جامان ناتيجە ەمەس. الەم كۋبوگىنىڭ كەزەكتى كەزەڭىندە ۆيشنەۆسكايا مەن براۋننىڭ قولا مەدال جەڭىپ الۋى بۇرىن تاريحتا بولماعان. گالينانىڭ سۇر مەرگەن ەكەنى داۋسىز, الايدا بويشاڭ قارسىلاستارىنا قاراعاندا جىلدامدىعى ناشار. ال باسقا جارىس تۇرىنەن مەدال الامىز دەۋ قيالمەن تەڭ.
وڭداسىن ەلۋباي, جۋرناليست,
ارنايى «ەگەمەن قازاقستان» ءۇشىن پحەنچحاننان (وڭتۇستىك كورەيا)
