«جازايىن مىنا ءسوزدى
مۇتاللاپقا,
تاراعان ابىرويى شارتاراپقا.
اعاشى ات بايلايتىن
سولتۇستىكتىڭ,
تاپسىردىم سەنى, قالقام,
جەتى ارۋاققا»,
دەپ قازاقتىڭ جىر ءدۇلدىلى عافۋ قايىربەكوۆ اعالىق اقادال قوشەمەتىن بىلدىرگەن ءمۇتاللاپ قانقوجين بۇگىندە سەكسەننىڭ سەڭگىرىنە كوتەرىلىپ وتىر. 1969 جىلى «جازۋشى» باسپاسىنان «اق قايىڭدار ارالى» دەگەن اتپەن تۇڭعىش ولەڭدەر جيناعى جارىق كورگەن اقىننىڭ «قارا قانات ءتۇن اسپاندى جاپپاسا, ەركە قىزداي جۇلدىز جىمىڭ قاقپاسا. نازدى ولەڭدەر سىلق-سىلق ك ۇلىپ اقپاسا, اق قايىڭدار شاشقا شولپى تاقپاسا, مەن اقىن بوپ تۋماس ەم» دەگەن شىنايى سەزىمنەن تۋعان ليريكالىق توپتامالارىن وقىرمان قاۋىم جىلى قابىلداعان بولاتىن. ولەڭ ولكەسىنە ورلەي جۇزگەن ونىڭ قادامىنا عابيت, ءسابيت, سافۋان سياقتى نار تۇلعالى اعالارى ءسات ساپار تىلەگەن. سودان بەرگى مەرزىمدە 15-كە جۋىق كىتابى مەن پۋبليتسيستيكالىق وي-تولعامدارىن جۇرتشىلىققا ۇسىنعان ابىز اقساقالدىڭ اقىندىق جانە ازاماتتىق تۇلعالارىن ءبىر-بىرىنەن بولە-جارۋ مۇمكىن ەمەس. ول تەلەجۋرناليست رەتىندە دە قوعامنىڭ كوكەيكەستى ماسەلەلەرىن تامىرشىداي تاپ باسىپ, اششى شىندىقتى بۇكپەسىز جازا ءبىلدى. وبلىستىق «قازاق ءتىلى» قوعامىنىڭ العاشقى توراعالارىنىڭ ءبىرى رەتىندە انا ءتىلىمىزدىڭ مەملەكەتتىك ءتىل رەتىندە ورنىعۋىنا, كەڭ ءورىس جايۋىنا, تاۋەلسىزدىك تۇعىرىنىڭ بەكي تۇسۋىنە ۇلكەن ۇلەس قوسقان قايراتكەر, ۇلت جاناشىرى رەتىندە دە جەرلەستەرى اركەز قۇرمەت تۇتادى. ابىلاي حاننىڭ اق ءۇيى سەكىلدى كيەلى وردانىڭ ساقتالىپ قالۋىنا, ماعجان ەسىمىنىڭ قايتا ورالۋىنا تەڭدەسسىز ۇلەس قوستى.
قازاقستان جازۋشىلار جانە جۋرناليستەر وداعىنىڭ مۇشەسى, ەلىمىزدىڭ ەڭبەك سىڭىرگەن مادەنيەت قىزمەتكەرى, سولتۇستىك قازاقستان وبلىسىنىڭ قۇرمەتتى ازاماتى ءمۇتاللاپ قانعوجيننىڭ 80 جاسقا تولۋ قۇرمەتىنە ارنالعان ادەبي كەش س.مۇقانوۆ اتىنداعى سازدى-دراما تەاترىندا ءوتتى. وبلىس اكىمىنىڭ ورىنباسارى ماديار دۇيسەنباي ۇلى مەرەيتوي يەسىن ايماق باسشىسى قۇمار اقساقالوۆتىڭ اتىنان قۇتتىقتاپ, العىس حات تابىس ەتتى.
وبلىستىق ارداگەرلەر كەڭەسىنىڭ توراعاسى ەسكەندىر ەلەۋسىزوۆ, ەڭبەك ارداگەرى قۇدايبەرگەن قاليەۆ, «سولتۇستىك قازاقستان» گازەتىنىڭ باس رەداكتورى جاراسباي سۇلەيمەنوۆ, «قىزىلجار» تەلەارناسىنىڭ ديرەكتورى ەرلان توقشىلىق, پەتروپاۆل قالاسى اكىمىنىڭ ورىنباسارى ەۆگەني گلوتوۆ مۇكەڭ جايلى تەبىرەنە سويلەپ, سىي-سياپاتتار جاسادى.
«ەگەمەن قازاقستان» گازەتىنىڭ قىزمەتكەرى جاقسىباي سامرات قازاقستان جازۋشىلار وداعىنىڭ توراعاسى نۇرلان ءورازاليننىڭ قۇتتىقتاۋ حاتىن وقىپ بەرىپ, يىعىنا شاپان جاپتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
