قازاقستاندىق جانە سەرب كومپوزيتورلارىنىڭ اۋەندەرى 15 اقپان كۇنى تەاتردىڭ ۇلكەن زالىندا شىرقالادى.
كورەرمەن نازارىنا تىلەس قاجىعاليەۆتىڭ «دالا اڭىزى» سيمفونيالىق سيۋيتاسى ۇسىنىلادى. ت. قاجىعاليەۆتىڭ مۋزىكالىق مۇراسى ۇلتتىق ونەردىڭ بەتكە ۇستارى ءارى تىڭداۋشىلاردىڭ شىنايى قىزىعۋشىلىعىن تۋدىرارى حاق. ت. قاجىعاليەۆتىڭ شىعارمالارىن وتاندىق جانە شەتەلدىك جەتەكشى ۇجىمدار الەمنىڭ ەڭ ۇزدىك ساحنالارىندا ورىنداپ كەلەدى.
«استانا وپەرا» مۋزىكانتتارىمەن بىرلەسە مايا رايكوۆيچ بەلگرادتا قازاقستاندىق كومپوزيتورلار – ا.جۇبانوۆ, ە.برۋسيلوۆسكي, م.ساعاتوۆتىڭ تۋىندىلارىن ۇلكەن جەتىستىكپەن ورىندادى. ەندى, مىنە, قازاقستانداعى ءوزىنىڭ العاشقى ونەر كورسەتۋىندە, پيانيست ەلوردالىق كورەرمەنگە سەرب مۋزىكاسىن ۇسىنباق. وسى كەشتە ۆەرا ميلانكوۆيچتىڭ وركەسترمەن فورتەپيانوعا ارنالعان №2 كونتسەرتى شىرقالادى. كولەمدى ءارى اسەرگە تولى تۋىندى 1995 جىلى, بۇرىنعى يۋگوسلاۆياداعى ازاماتتىق سوعىستىڭ سوڭىندا جازىلعان ەدى. كونتسەرت ادىلەتسىزدىكتە ءومىر سۇرەتىن, دەگەنمەن ءمولدىر ماحابباتپەن قورعالعان سەرب ءارتىسىنىڭ ىشكى جان-دۇنيەسىن بەينەلەيدى. كومپوزيتور ءوز شىعارماسىن كەرەمەت پيانيست, بىرەگەي مىنەزدى قايراتتى تۇلعا ءارى ءوز ىسىنە بەرىلگەن ۇستاز – مايا رايكوۆيچكە ارناعان.
«ۆەرا ميلانكوۆيچتىڭ مۋزىكاسى – جاڭا سارىننىڭ دجاز ەلەمەنتتەرىمەن جانە سەرب ۇلتتىق اۋەندەرىمەن توعىسۋى. فورتەپيانوعا ارنالعان كونتسەرتتىڭ ءۇشىنشى بولىگى مەن ءۇشىن ەرەكشە قىزىعۋشىلىق تۋدىردى, وندا حالىق مۋزىكاسىمەن قاتار ل.بەرنستايننىڭ ايگىلى «ۆەستسايد وقيعاسىنان» ۇزىندىلەر كەلتىرىلگەن. بۇل كونتسەرت پيانيست ءۇشىن دە, وركەستر ءۇشىن دە وتە كۇردەلى, سوندىقتان شىعارما تىڭداۋشىلاردى شاتتىققا بولەپ, ەرەكشە كۇش-قۋات بەرەدى دەپ ۇمىتتەنەمىن», – دەدى مايا رايكوۆيچ. كونتسەرتتىڭ باستالۋى ساعات 19.00-دە.
