وسىعان وراي استانا قالاسىنىڭ پروكۋراتۋراسى مەن ىشكى ىستەر باسقارماسىنا جانە «نۇر وتان» پارتياسىنىڭ فيليالىنا شاعىمدانعان قۇرىلىسشىلار كومپانيا جەتەكشىلەرى وزدەرىن الداپ سوققاندارىن, زاڭعا شورقاقتىعىن پايدالانىپ ءبىر-بىردەن كەڭسەگە شاقىرىپ, جاقىندا جۇمىسقا ادام العاندا قايتا شاقىرىپ الاتىندارىن ايتىپ, قاعازعا قول قويۋلارىن سۇراعانىن ايتادى. كەيبىر كەلىسپەگەن قۇرىلىسشىلاردى قۋدالايتىندارىن ايتىپ قورقىتقان دا كورىنەدى. ال قۇرىلىسشىلار ءوز كەزەگىندە قىستىگۇنى دالادا قالعاندارىنا جانە قارجىلىق وتەماقى الماعاندارىنا نارازىلىق تانىتىپ, شاعىمدانۋعا ءماجبۇر بولعان.
«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ اتالعان ماسەلەنىڭ شەشىمىن قاراستىرۋ پارتيا نازارىندا بولاتىنىن, قازىرگى كەزدە استانا قالاسى اكىمدىگى جانە پروكۋراتۋراسىمەن وسى تاراپتا بىرىگىپ جۇمىس ىستەپ جاتقانىن جەتكىزدى.
ال ەڭبەك جانە حالىقتى الەۋمەتىك قورعاۋ ءمينيسترى تامارا دۇيسەنوۆا وسى وقيعاعا قاتىستى تۇسىندىرمەسىندە جەرگىلىكتى ەڭبەك ينسپەكتسياسىنىڭ جۇمىستان بوساتۋ تۋرالى حابارلامانى 62 ادامنىڭ الۋى تيىستىگىن انىقتاعانىن ايتادى. بۇعان دەيىن بىرقاتار ءباسپاسوز قۇرالدارىندا اتالعان قۇرىلىس الاڭىندا 400-گە جۋىق ادامنىڭ جۇمىستان بوساعانى حابارلانعان بولاتىن.
«ەگەر قوسىمشا ادامدار بولسا, ءبىز ايتامىز. وندا 11 كومپاننيا جۇمىس ىستەيدى. ءار كومپانيانىڭ باس مەردىگەرمەن جاساسقان ەڭبەك شارتى بار. وندا جۇمىستى قاشان اياقتايتىنى, قۇرىلىس الاڭىنان قاشان كەتەتىنى ناقتى كورسەتىلگەن», دەدى ت.دۇيسەنوۆا.
ءمينيستردىڭ ايتۋىنشا, جۇمىستان بوساعاندارعا ورتاشا ايلىق جالاقى كولەمىندە وتەماقى تولەنەدى. «ەڭبەك كودەكسىندە ناقتى كورسەتىلگەن. ەگەر كاسىپورىننىڭ ەكونوميكالىق جاعدايىنىڭ تومەندەۋىنە بايلانىستى ازاماتتار جاپپاي جۇمىستان بوساسا, ولارعا ەكى ايلىق كولەمىندەگى ەڭبەكاقى بەرىلەدى. ەگەر بۇل جاعداي جۇمىس كولەمىنىڭ ازايۋىنا بايلانىستى وربىسە, وندا جۇمىس كولەمى ورىندالعاننان كەيىنگى جۇمىستان بوساتۋ ەسەبىندە قارالادى جانە وتەماقى رەتىندە ايلىق ەڭبەكاقى تولەنەدى. ءار كاسىپورىن جۇمىس كۇشىن تارتقان كەزدە جۇمىس كولەمىن انىقتايدى. «ابۋ-دابي پلازادا» جۇمىس ىستەيتىن ءتورت ۇيىمنىڭ دا جۇمىس اۋقىمى انىقتالعان. ولار نەگىزىنەن ەكىنشى دەڭگەيلى جۇمىستاردى ورىندادى. كەلىسىمشارت بەكىتكەندە جۇمىستىڭ قاي ۋاقىتتان قاي ۋاقىتقا دەيىن سوزىلاتىنى دا تىكەلەي بەلگىلى بولادى. بۇل دا ەڭبەك كودەكسىندە جازىلعان. ەگەر ەڭبەك كەلىسىمشارتى بەلگىلى ءبىر ۋاقىتقا بەلگىلەنسە, سول ورىندالعاننان كەيىن كەيىن جۇمىس سانى قىسقارادى», دەدى مينيستر.
دۋمان اناش,
«ەگەمەن قازاقستان»
