استانا بەيبىت پىكىرتالاستار ورتالىعىنا اينالدى. شەتەل باسىلىمدارىنا شولۋ

THE HILL

وتكەن اپتادا دونالد ترامپ قازاقستان پرەزيدەنتى نۇرسۇلتان نازارباەۆپەن كەزدەسىپ, ديپلوماتيالىق جەتىستىككە جەتتى. قىتاي جانە رەسەيمەن شەكارالاس قازاقستان 1991 جىلى تاۋەلسىزدىگىن العاننان بەرى ۇلكەن جەتىستىكتەرگە جەتكەن نەگىزگى مەملەكەت جانە ەۋرازيانىڭ جۇرەگى.

قازاقستان يادرولىق ارسەنالدان باس تارتىپ, بۇگىنگى تاڭدا سولتۇستىك كورەيا مەن يرانعا جاقسى ۇلگى بولىپ وتىر. شەتەلدىك كومپانيالار قازاقستانعا تاۋەلسىزدىك جىلدارى 300 ملن دوللار ينۆەستيتسيا سالعان. ونىڭ ىشىندە 50 ملن دوللار مۇناي, گاز, ۋران مەن مەتالداردان تۇراتىن تابيعي بايلىقتى دامىتۋعا جۇمسالعان. دۇنيەجۇزىلىك بانكتىڭ ايتۋىنشا, بۇل ەلدەگى ءىجو دە جوعارى.

قازاقستان ديپلوماتيالىق كەلىسسوزدەر وتكىزىپ, بەيتاراپ پلاتفورما ۇسىندى. مىسالى, استانادا سيريا بويىنشا كەلىسسوزدەر وتكىزىلدى. ترامپپەن كەزدەسۋدە ن.نازارباەۆ سولتۇستىك كورەيا ماسەلەسى بويىنشا دا كەلىسسوزدەر الاڭىن ۇسىنۋعا ءازىر ەكەنىن ايتتى.

اقش قازاقستاننىڭ ەكونوميكالىق ىنتىماقتاستىق ۇيىمىنا كىرۋگە جانە الەمدەگى ەڭ دامىعان 30 مەملەكەتتىڭ قاتارىنا كىرۋگە تالپىنىسىن قولدايدى.

THE FORBES

نيۋ-يوركتەگى لينكولن ورتالىعىندا استانا بالەت تەاترى ونەر كورسەتتى. وندا ءبىز قازاقستانداعى بالەتتىڭ بارلىق سۇلۋلىعى مەن كاسىبي شەبەرلىگىن بايقادىق. سپەكتاكلدە حورەوگرافيالىق كوركەم ايشىقتى دا, تاريحي ەلەمەنتتەردى دە كوردىك. بۇعان قازاقتاردىڭ قانىنا سىڭگەن كوشپەندى رۋح تا سەپتەسسە كەرەك.

قازاقستان پرەزيدەنتى نۇرسۇلتان نازارباەۆ اق ۇيگە عانا ەمەس, نيۋ-يوركتەگى بالەتكە دە كەلدى. ول ءوز مەملەكەتىن الەمگە تانىتۋعا تالپىنىپ جۇرگەن كوشباسشى. بالەتتە ءبىز قازاقتاردىڭ الەمگە وزدەرىن قالاي كورسەتە الاتىنىنا كوز جەتكىزدىك. مۇنايعا باي باسقا مەملەكەتتەرگە قاراعاندا قازاقستان الەۋمەتتىك جانە مادەني باعىتقا ەرەكشە كوڭىل ءبولىپ كەلەدى.

قازاقستان پرەزيدەنتى قازاق حالقىنىڭ بىرلىگىن نىعايتىپ قانا قويماي, باسقا دا ەتنيكالىق توپتاردىڭ اراسىندا الاۋىزدىقتىڭ بولۋىنا جول بەرمەدى. سونىمەن قاتار استانانى حالىقارالىق بەيبىت پىكىرتالاستار ورداسىنا اينالدىردى. اقش-قا كەلىپ, الەمدىك ءىرى مۇناي كومپانيالارىمەن كەلىسىمشارتقا وتىردى.

REUTERS

قازاقستان Euroclear بانكىمەن قازاقستاندىق قۇندى قاعازداردى ەۋروپالىق پلاتفورمادان قورعاۋعا مۇمكىندىك بەرەتىن كەلىسىمشارتقا قول قويدى. بۇل قازاقستاننىڭ باسەكەگە قابىلەتتىلىگىن ارتتىرىپ, شەتەلدىك ينۆەستورلاردى كوپتەپ تارتۋعا مۇمكىندىك بەرمەك. بۇعان دەيىن قازاقستان ورتالىق بانكى Euroclear-مەن 2019 جىلى جۇمىس ىستەي باستاۋى مۇمكىن ەكەنىن ايتقان بولاتىن.

قازاقستاننىڭ قارجى مينيسترلىگى, استانا قور بيرجاسى, «استانا» حالىقارالىق ورتالىق قور بيرجاسى Euroclear-مەن مەموراندۋمعا وتىردى. ايتا كەتۋ كەرەك, بريۋسسەلدىڭ Euroclear كومپانياسى قۇندى قاعازداردىڭ ەۋروپاداعى ەڭ ۇلكەن ورداسى. ال Astana International Exchange – ايماقتىق قارجى ورتالىعىن قۇرۋعا ارنالعان قور بيرجاسى.

STRATFOR

قازاقستان ەنەرگەتيكالىق رەسۋرستارعا باي, گەوساياسي مۇمكىندىگى جوعارى مەملەكەت جانە ول ورتالىق ازياداعى باسقا بەس مەملەكتەكە قاراعاندا ەكونوميكالىق جاعىنان الدا كەلەدى. قازاقستان كورشىلەس قىتاي جانە رەسەيمەن جاقسى قارىم-قاتىناس ورناتقان.

اقش-تىڭ پاكىستانمەن قارىم-قاتىناسى ناشارلاي باستاعاندىقتان, ۆاشينگتون قازاقستاننىڭ ساترتەگيالىق كومەگىن قاجەت ەتۋى مۇمكىن. ءتىپتى, قازاقستان پرەزيدەنتى نۇرسۇلتان نازارباەۆتىڭ دونالد ترامپپەن كەزدەسۋىندە دە وسى ماسەلە ايتىلدى.

ARMEDIA

قازاقستان پرەزيدەنتى نۇرسۇلتان نازارباەۆتىڭ اقش-قا بارۋى – تاريحي ساپار. بۇعان دەيىن ول امەريكاعا 2016 جىلى كەلدى.

اقش پەن قازاقستان اراسىندا ديپلوماتيالىق قارىم-قاتىناستار 1991 جىلدىڭ 25 جەلتوقسانىندا باستالدى. امەريكا 1992 جىلى قاڭتاردا ءبىرىنشى بولىپ الماتىدا ەلشىلىگىن اشتى. سول كەزدەن بەرى ەكى مەملەكەت اراسىندا كوپتەگەن سالالار بويىنشا سەرىكتەستىك دامىپ كەلەدى. قازاقستاندا امەريكالىق كاپيتالى بار 500 كومپانيا جۇمىس ىستەيدى.

د.ترامپ پەن ن.نازارباەۆ ءۇش ۇكىمەتارالىق كەلىسىمشارتقا وتىردى. ونىڭ ىشىندە حالىقارالىق ساۋدا, اۆياتسيالىق قىزمەتتەر مەن تەمىر جول ءترانزيتى تۋرالى كەلىسىم قامتىلعان. ن.نازارباەۆتىڭ اقش-قا ساپارى ترامپقا قازاقستاندى كوپىر ەتە وتىرىپ رەسەيمەن قارىم-قاتىناسىن نىعايتۋعا نەمەسە ورتالىق ازياداعى جاعدايعا ارالاسۋعا مۇمكىندىك بەرەدى.

دايىنداعان

گۇلنۇر قۋانىشبەكقىزى,

«ەگەمەن قازاقستان»