ايتۋلى ءىس-شاراعا قازاقستان رەسپۋبليكاسىنىڭ جاپونياداعى توتەنشە جانە وكىلەتتى ەلشىسى ەرلان باۋداربەك-قوجاتاەۆ, استانا قالاسىنداعى ۇلتتىق اكادەميالىق كىتاپحانانىڭ باسشىسى ءۇمىتحان مۇڭالباەۆا, فيلوسوفيا عىلىمدارىنىڭ دوكتورى, اكادەميك عاريفوللا ەسىم, «جۇلدىز» ادەبي-كوركەم جۋرنالىنىڭ باس رەداكتورى ۇلىقبەك ەسداۋلەت, فيلولوگيا عىلىمدارىنىڭ دوكتورى تۇرسىن جۇرتباي, فيلولوگيا عىلىمدارىنىڭ كانديداتى, ەۋرازيا ۇلتتىق ۋنيۆەرسيتەتىنىڭ دوتسەنتى وڭايگۇل تۇرجان, جاپونياداعى شىعارماشىلىق زيالى قاۋىم, توكيوداعى قازاق دياسپوراسىنىڭ وكىلدەرى قاتىستى.
توكيولىق وقىرماندار بۇدان بىلاي قازاق حالقىنىڭ سالت-ءداستۇرى, مادەنيەتى, ونەرىمەن ءوز كىتاپحانالارىنداعى ورتالىق ارقىلى جاقىن تانىسا الادى. ورتالىقتا پرەزيدەنت نۇرسۇلتان نازارباەۆتىڭ الەمدىك ساياسي ارەناداعى ورنى مەن رولىنە ارنالعان كىتاپتار, پرەزيدەنتتىڭ اۆتورلىعىمەن جارىق كورگەن ەڭبەكتەرى, تاريح, عىلىمي-كوپشىلىك جانە كوركەم ادەبيەت كىتاپتارى قويىلماق. ەلىمىز تاراپىنان توكيو ورتالىق كىتاپحاناسىنا بارلىعى 200-گە جۋىق كىتاپ تاپسىرىلدى.
قازاقستان ادەبيەتى مەن مادەنيەتى ورتالىعى مادەنيەت جانە سپورت مينيسترلىگى, سىرتقى ىستەر مينيسترلىگى, قازاقستاننىڭ جاپونياداعى ەلشىلىگىنىڭ ىقپالداسۋىمەن اشىلدى.
توكيو ورتالىق كىتاپحاناسى 1973 جىلى توكيو استانالىق كىتاپحاناسى رەتىندە قۇرىلعان. ونىڭ قورىندا 1,98 ميلليونعا جۋىق كىتاپ, 6000 جۋرنال مەن گازەت, ءارتۇرلى اۋديوۆيزۋالدى جانە سيرەك قۇجاتتار (Ukiyo-e مەن ەدو مۇناراسىنىڭ ارحيتەكتۋرالىق ەسكيزدەرى) بار. سونىمەن قاتار ورتالىق كىتاپحانا توكيوداعى قوعامدىق كىتاپحانالاردىڭ اراسىندا شەتەل ادەبيەتىنىڭ ايرىقشا كوللەكتسيالارىن ساقتاعان. بۇل كوللەكتسيا ورتالىق كىتاپحانادا بار جالپى قوردىڭ وننان ءبىر بولىگىن قۇرايدى.
«ەگەمەن-اقپارات»
