تورعايدا تۋعان توپجارعان ءوزىنىڭ وزگەشە سامعاۋىمەن از عانا ۋاقىت ارالىعىندا ساحنا ساڭلاعىنا اينالدى. «استانا وپەرا» تەاترىنىڭ جەتەكشى ءسوليسى اتانىپ, كورەرمەن كوڭىلىنەن ويىپ ورىن العان وبرازدار جاسادى. ولاردىڭ ءبارىن ساۋساق بۇگىپ ساناماي-اق, ا.جۇبانوۆ پەن ل.ءحاميديدىڭ «ابايىنداعى» اباي, ە.بۋرسيلوۆسكيدىڭ «قىز جىبەگىندەگى» بەكەجان, دج. ءپۋچچينيدىڭ «مادام باتتەرفليايىنداعى» شارپلەس, گ.دونيتسەتتيدىڭ «دون پاسكۋالەسىندەگى» مالاتەستا پارتيالارىن ايتساق تا جەتىپ جاتىر.
ول سونداي-اق, بىرقاتار بەدەلدى حالىقارالىق بايقاۋلاردىڭ لاۋرەاتى. الەمنىڭ ءار شالعايىنداعى ايگىلى كونتسەرت زالدارىندا ونەر كورسەتكەنى تاعى بار. ۆەروناداعى فيلارمونيكا تەاترىندا دج.ءپۋچچينيدىڭ «بوگەماسىنداعى» مارسەل جانە دج.ءروسسينيدىڭ «سەۆيلدىك شاشتارازىنداعى» فيگارو رولدەرىن ورىنداعانىن اتاپ وتكەنىمىز ورىندى.
بۇيىرسا, بۇل ونەرپازىمىز ەندى جەمىستى شىعارماشىلىق جولىنداعى كەلەسى شىڭعا بەتتەدى. قازىلار القاسىنىڭ قاتال سىنىنان سۇرىنبەگەن سۇندەت باقتالاستارىن باسىپ وزىپ, اتاقتى ريم وپەرا تەاترىنا قابىلداۋعا مۇمكىندىك بەرەتىن جولدامانى جەڭىپ الدى. ءساتىن سالسا, ەۋروپاداعى وسىناۋ تانىمال مادەنيەت ورداسى قازاقستاندىق جارىق جۇلدىزبەن ەكى جىلدىق كەلىسىمشارتقا وتىرماق. ەلدەن ەستۋىمىزشە, باريتوندار بايگەسىنە تورەلىك ەتكەن دومەنيكو كولايانني سىندى كوريفەيىڭىز ونىڭ قابىلەت-قارىمى اتاعى اسپانداعان لا سكالا ارتىستەرىنەن كەم سوقپايتىنىن ايتقان كورىنەدى.
«استانا وپەرا» تەاترىنىڭ ءباسپاسوز قىزمەتى تاراتقان اقجولتاي اقپاراتتا باعى جانعان بايعوجيننىڭ ءبىر-ەكى اۋىز لەبىزى بەرىلگەن ەكەن. «مەن ءوز ەلىمنىڭ پاتريوتىمىن. سوندىقتان بولاشاقتا وتانىمدى اسقاقتاتا بەرۋگە ايانباي ۇلەس قوسامىن. ەلباسىمىزدىڭ «رۋحاني جاڭعىرۋ» باعدارلاماسىندا بەلگىلەنگەندەي قازاقستان مادەنيەتىن جاھانعا جايۋ ىسىنە قىزمەت ەتەمىن» دەلىنگەن وندا.
سونىمەن سۇندەت بايعوجين ءريمدى باعىندىرماق. بىراق, باياعى اتتيلا باباسىنداي ريمدىكتەردى قىلىشتىڭ جۇزىمەن ەمەس ادەمى اندەرىمەن «قىرماق».
تالعات باتىرحان,
«ەگەمەن قازاقستان»
