ىزدەگەنىڭىزدى تاۋىپ, تالعامىڭىزعا تۋرا كەلەتىن زاتتاردى تاڭداي الاسىز. كادەسىيدان بولەك قولونەر شەبەرلەرىنىڭ قولىنان شىققان, تۇرمىستا قولدانىلاتىن نەمەسە قۇندى سىيلىق رەتىندە ۇسىنىلاتىن زاتتار كوپ. قولونەر شەبەرلەرى اراسىنداعى باسەكەلەستىكتىڭ جوعارى جانە ولارعا جاسالعان مۇمكىندىكتىڭ مولدىعى دا سۇرانىستى قامتاماسىز ەتۋدە.
كۇنى كەشە وتكەن قولونەر شەبەرلەرىنىڭ حالىقارالىق فەستيۆالى دە بەكزات ونەرگە دەگەن كوزقاراستى بىلدىرەدى. «تۇركىستان – تۇركى الەمىنىڭ مادەني استاناسى» جىلى اياسىندا وتكەن شاراعا ەلىمىزدەن بولەك تۇركىتىلدەس بىرقاتار ەلدەردەن «قولى التىن» شەبەرلەر قاتىستى. تۇركىستان قالاسىنىڭ اكىمى ءا.وسەرباەۆتىڭ ايتۋىنشا, بيىل جالپى جەتپىستەن استام جوبالار ىسكە اسىرىلسا, ونىڭ قىرىققا جۋىعى حالىقارالىق دەڭگەيدەگى باسقوسۋلار ەكەن. ال تۇركسوي-دىڭ قازاقستاندىق وكىلى ا.تۇرعانباەۆ: «قولونەر – بۇل ولمەس ونەر. اتادان بالاعا ميراس بولىپ كەلە جاتقان بەكزات ونەرىمىزدى جوعالتىپ الماۋ ءبىزدىڭ پارىزىمىز. بۇل ونەردى كەيىنگى جاستارعا ۇيرەتۋ قاجەت. سوندىقتان دا بۇل فەستيۆالدىڭ ماڭىزى ەرەكشە. وزگە باۋىرلاس ەلدەر قولونەرشىلەرىمەن تاجىريبە الماسۋ دا بۇگىنگى ارنايى وتكەن كورمەدەن كورىنىس تاپتى. تۇركىستان ءبىر جىلدىق قالا ەمەس, ماڭگىلىك رۋحاني استانامىز بولىپ قالا بەرمەك», دەدى.
قولونەر سالاسىنداعى وتكىزىلگەن تۇڭعىش فەستيۆال تۇركسوي اياسىندا الداعى ۋاقىتتا مادەني استانالاردا دا ءوز جالعاسىن تاپپاق. فەستيۆال بارىسىندا قاتىسۋشىلار قولونەر مەكتەبىنىڭ شەبەرحاناسىندا شەبەرلىك سىنىپتارمەن تانىسىپ, ەتنوگرافيالىق مۋزەيدە بولدى.
عالىمجان ەلشىباي,
«ەگەمەن قازاقستان»
