ءبىر «اتتەگەن-ايى», فەلدشەرلىك-اكۋشەرلىك پۋنكتتىڭ توزىعى جەتىپ تۇر. بۇرىن مۇندا جاپ-جاقسى مەديتسينالىق عيمارات بولعان. شاتىرىنا, جىلۋ جۇيەسىنە جوندەۋ جۇرگىزۋدى باسى ارتىق ءىس ساناعان بيلىك قۇلاعىن ۇستاعان شەنەۋنىكتەر بۇزعىزىپ تاستاپتى. ونىڭ ورنىنا 2005 جىلى تۇرعىزىلعان امبۋلاتوريالىق ورتالىقتىڭ قازىرگى جايى ادام ايارلىق حالدە. توبەسى مەن قابىرعالارى وپىرىلىپ, بارماق سىيىپ كەتەتىندەي جارىقشاقتار اجداھانىڭ كوزىندەي ۇڭىرەيىپ تۇر. قازىر قۋانىشتارى سۋ سەپكەندەي باسىلىپ, ساپالى مەديتسينالىق ەم-دوم الماق تۇگىلى قولدانىلۋ مەرزىمى جارتى عاسىرعا لايىقتالعان عيماراتتىڭ ىشىنە كىرۋگە دە جۇرەكسىنەدى. ويدا-جوقتا جالپ ەتىپ, قۇلاپ تۇسە مە دەپ قورقادى.
ءبىر تۇسىنىكسىزى, ءتورت مىڭعا جۋىق ادامعا قىزمەت كورسەتىپ كەلگەن امبۋلاتوريا جابىلىپ, فاپ-قا اينالدىرىلعان. سول سەبەپتى بىرقاتار كابينەتتەر قاڭىراپ بوس قالدى. سىرتقى, ىشكى كەلبەتىنەن كىسى شوشيتىن نىساندى كوكشەتاۋ قالاسىنداعى «مارەدوس» كومپانياسى سالىپ 37 ميلليون تەڭگە جۇمساعان كورىنەدى. قالاي بولسا سولاي تۇرعىزىلعانىنا قاراعاندا ء«اي دەر اجە, قوي دەر قوجا» تابىلماعانعا ۇقسايدى. ونى قابىلداپ العان كوميسسيا ساپاسىنا كوز جۇما قاراعان سەكىلدى. ايتپەسە مەملەكەتتىڭ ميلليونداعان قاراجاتى جەلگە ۇشپاس ەدى.
ء«مۇيىز سۇرايمىن دەپ ءجۇرىپ ساقالىنان ايىرىلعاننىڭ» كەبىن كيگەن تۇرعىندار بولسا ارادا ەكى جىل وتەر-وتپەستەن شاڭىراعى وپىرىلىپ ورتاسىنا تۇسكەلى تۇرعان عيماراتتى پايدالانۋعا ءماجبۇر. ءبىر قىزىعى, نىسان قۇرىلىسىنا ساراپتاما جاسالعانىمەن, اپاتتى دەپ تانىلماعان. كۇردەلى جوندەۋ كەرەكتىگى تۋرالى شەشىم شىعارىلعان. ال شەنەۋنىكتەردىڭ جاڭا باسپانا ىزدەپ, سابىلىپ جۇرگەنى اناۋ! كىمگە سەنەرسىڭ؟
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى,
مامليۋت اۋدانى
