حالىقارالىق مامانداندىرىلعان كورمە اياقتالعاننان كەيىن ەكى اي وتكەننەن سوڭ «استانا ەكسپو-2017» ۇلتتىق كومپانياسى قازىر بولاشاق ەنەرگياسىنىڭ مۇراجايى بولىپ تابىلاتىن «نۇر الەم» پاۆيلونى, الەمدەگى 13 ەلدىڭ جاڭعىرمالى ەنەرگيا كوزدەرى سالاسىنداعى ەڭ ۇزدىك 24 جوباسى ۇسىنىلعان «ۇزدىك تاجىريبەلەر ايماعى», تاقىرىپتىق پاۆيلوندار مەن قازاقستاننىڭ العاش زاماناۋي ونەرىنىڭ ورتالىعى ورنالاسقان ارت-ورتالىعى قامتىلعان تۋريستىك ايماقتى كەلۋشىلەر ءۇشىن رەسمي تۇردە اشقانى تۋرالى ەستەرىڭىزگە سالايىق.
اشىلۋ راسىمىنە قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ قاتىستى.
العاشقى ەكى كۇن كەلۋشىلەر ءۇشىن تەگىن بولدى. بيلەتتەر رەسمي تۇردە 14 قاراشادان باستاپ ساتىلاتىن بولادى. «نۇر الەم» پاۆيلونىن, تاقىرىپتىق پاۆيلونداردى, «ۇزدىك تاجىريبە ايماعىن» جانە ارت-ورتالىعىن قامتيتىن بيلەتتىڭ باعاسى 1500 تەڭگەنى قۇرايدى. ۇوس قاتىسۋشىلارىنا, بارلىق توپتاعى مۇگەدەكتەرگە, جەتىم بالالارعا, كوپ بالالى انالارعا جانە 6 جاسقا دەيىنگى (قوسا العاندا) بالالارعا كىرۋ تەگىن. وقۋشىلار ءۇشىن 500تگ, ستۋدەنتتەر ءۇشىن 800تگ, ال زەينەتكەرلەر ءۇشىن 500تگ.
سونىمەن قاتار, 1 مىڭعا جۋىق اۆتوكولىككە ارنالعان جەر استى تۇراعى قىزمەت ەتۋدە, ونىڭ العاشقى ءۇش ساعاتى تەگىن, ال كەلەسى ساعاتتارى 100 تەڭگەدەن. جەر استى پاركينگكە ت.رىسقۇلوۆ كوشەسىنەن (وڭتۇستىك كىرەبەرىس) كىرۋگە بولادى.
