بۇل ماقالادا سانانى جاڭعىرتۋ, ۇلتتىق بولمىستان, ۇلتتىق كودتان ايىرىلىپ قالماي, ونى الەمدىك قۇندىلىقتارمەن ۇيلەستىرىپ, قازاقستاننىڭ يگىلىگىنە جاراتۋ جولىنداعى ماقسات-مۇددەلەر تۋرالى وزەكتى ماسەلە كوتەرىلىپ وتىر.
اسىرەسە, قازاق ءتىلىن بىرتىندەپ لاتىن گرافيكاسىنا اۋىستىرۋ, «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى, «تۋعان جەر» باعدارلاماسى, «قازاقستاننىڭ قاسيەتتى جەرلەرى», «جاھانداعى زاماناۋي قازاقستاندىق مادەنيەت», «قازاقستانىڭ جاڭا 100 تۇلعاسى» اتتى ەلباسىنىڭ قوعامدىق سانانى جاڭعىرتۋعا قاتىستى ۇسىنعان جوبالارىنىڭ ماڭىزدىلىعى ايىرىقشا.
مەملەكەت باسشىسى رۋحاني جاڭعىرۋعا قاتىستى ۇستانىمدارى اسكەري سالادا دا, ياعني ۇلتتىق ۇلان اسكەرلەرى تاراپىنان ءبىراۋىزدان قولداۋ تاۋىپ, ۇلتتىڭ كەمەلدەنىپ دامۋىنا اسەر ەتۋشى ەڭ ماڭىزدى فاكتور رەتىندە باعالاندى.
ەلباسىمىزدىڭ ءوز ماقالاسىندا ايتىلعانداي «قازاقستانداعى 100 جاڭا ەسىم» جوباسى بۇگىنگى زامانداستارىمىزدىڭ ءتۇرلى سالالارداعى جەتىستىكتەرىن دارىپتەۋدى قامتاماسىز ەتەدى جانە جاستاردى ادامگەرشىلىككە تاربيەلەۋدىڭ جارقىن ۇلگىسى بولادى. بۇل تاپسىرمالار مەملەكەتتىڭ جانە ازاماتتىق قوعامنىڭ بارلىق يدەولوگيالىق جۇمىسىنىڭ ورتا مەرزىمدى پەرسپەكتيۆاداعى نەگىزى بولادى.
وسى ورايدا «قازاقستانداعى 100 جاڭا ەسىم» جوباسى اياسىندا ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆتىڭ باستاماسىمەن ءبىزدىڭ اسكەردە وسىنداي تەكتەس «ۇلتتىق ۇلاننىڭ 100 جاڭا تۇلعاسى» جوباسىن جۇزەگە اسىرۋ تۋرالى شەشىم قابىلداندى.
اتاپ ايتۋ كەرەك, اتالعان جوبا ۇلتتىق ۇلاننىڭ ءار اسكەري ءبولىمىن قامتيدى. اسكەري بولىمشەلەر قولباسشىلىعى, اسكەر ارداگەرلەرى جانە اسكەري قوعامدىق ۇيىمدار وكىلدەرىنەن تۇراتىن كوميسسيا قۇرامى لايىقتى دەگەن ۇمىتكەرلەردى ولاردىڭ سىڭىرگەن ەڭبەكتەرى, قىزمەتتىك-جاۋىنگەرلىك ارەكەتتەگى جەتىستىكتەرى جانە مەملەكەتتىك ناگرادالاردى يەلەنۋىنە قاراي باعالايدى.
سونداي-اق كوشباسشىمىز ءوزىنىڭ اتالمىش تۇعىرناماسىندا «تۋعان جەر» جوباسىنا دا ەرەكشە باسىمدىق بەرىپ وتىر. وتانسۇيگىشتىك سەزىمنىڭ كىندىك قانىڭ تامعان جەرىڭە, وسكەن اۋىلىڭا, قالاڭ مەن وڭىرىڭە, ياعني تۋعان جەرىڭە دەگەن سۇيىسپەنشىلىكتەن باستالاتىنىن قاداپ ايتتى.
مەملەكەت باسشىسى «تۋعان جەر» باعدارلاماسىنىڭ ءمانىن تۇسىندىرە كەلىپ ءبىلىم بەرۋ سالاسىندا اۋقىمدى ولكەتانۋ جۇمىستارىن جۇرگىزۋدىڭ ماڭىزدىلىعىنا نازار اۋداردى. وسى ورايدا اسكەرىمىزدە, مەملەكەتتىق-قۇقىقتىق ساباعىندا تۋعان جەردىڭ تاريحىن وقىتۋ ىسىنە نازار اۋدارادى.
ولكەتانۋ ارقىلى جاۋىنگەرلەردى, جاستاردى وتانسۇيگىشتىككە تاربيەلەۋدىڭ ءبىر جولى – تۋعان ايماقتىڭ ارحەولوگيالىق ەسكەرتكىشتەرىمەن تانىستىرۋ. ءاربىر جاۋىنگەر ءوزىنىڭ كىشى وتانى – تۋعان ايماعىندا تاريحتان قالعان قانداي جادىگەرلەر بارىن, ولاردىڭ ءمان-ماڭىزىن بىلگەندە عانا تۋعان ولكە تاريحىن بىلۋگە, قۇرمەتتەۋگە دەگەن سەزىمى ويانادى. اسكەري قىزمەتشىلەردى وسىنداي تاريحي-مادەني مۇراجايلارعا اپارىپ, ەل مەن جەر تاريحىنا دەگەن سەزىمدەرىن وياتۋ ماڭىزدى ىستەردىڭ ءبىرى. وسىنداي باعىتتا ءتالىم-تاربيە العان اسكەري كىزمەتشىلەر اسىرەسە جاس ساربازدار ءارى قارايعى ازاماتتىق ومىرىندە ەلى مەن جەرىنىڭ تاريحىن بىلۋدە, ناسيحاتتاۋدا جانە قۇرمەتتەۋدە بەيتاراپ قالمايدى.
ەلباسى تۋعان جەردىڭ تاريحىن تەك مەكتەپتە وقىتۋمەن شەكتەلمەي, «تۋعان جەر» باعدارلاماسىن ىسكە اسىرۋعا مەملەكەتتىك قىزمەتكەرلەردى, كاسىپكەرلەردى, زيالى قاۋىمدى, جاستاردى جۇمىلدىرۋدى تاپسىردى. سونداي-اق, بۇل جۇمىس جەرگىلىكتى بيلىك وكىلدەرىنىڭ مىندەتى ەكەنىن كورسەتىپ بەردى. بۇرىن ولكەتانۋشىلىق جۇمىستار نەگىزىنەن مەكتەپكە جۇكتەلىپ جانە جەكەلەگەن ولكەتانۋشى ادامداردىڭ ۇلەسىنە تيسە ەندى, پرەزيدەنت مۇنداي ماڭىزدى ىسكە بۇكىل ەل, بارلىق قاۋىم بولىپ قاتىسۋعا شاقىرىپ وتىر.
ەندەشە, جارقىن بولاشاققا باعدار رەتىندە «باتىس» وڭىرلىق قولباسشىلىعىنىڭ جەكە قۇرامى, جاس ساربازدارىمىز ەلباسىنىڭ وسى تاپسىرماسىن وزدەرىنىڭ العا قويعان ومىرلىك ماقساتتارىنا ەنگىزە وتىرىپ, ەلىمىزدىڭ رۋحاني تۇرعىدان دامىپ, ينتەللەكتۋالدىق دارەجەسىنىڭ جوعارىلاۋىنا ۇلەسىن قوسادى دەگەن سەنىمدەمىن.ەڭ باستىسى – باعىت-باعدارىمىز انىق, جولىمىز جارقىن.
الىبەك سەراليەۆ,
قازاقستان رەسپۋبليكاسى ۇلتتىق ۇلان اسكەرلەرىنىڭ «باتىس» وڭىرلىك قولباسشىلىعىنىڭ قولباسشىسى, گەنەرال-مايور
ورال
