كەزدەسۋ بارىسىندا شەيح سۋرۋر بين مۇحاممەد ءال-ناحايان وبلىسقا ينۆەستيتسيا سالىپ, ءىس باستاۋعا ءازىر ەكەندىگىن ايتىپ, اقتاۋ قالاسىندا جۇزەگە اسىرىلاتىن جوبالارىن كورسەتتى.
«الداعى ۋاقىتتا اقتاۋ قالاسىنىڭ گۇلدەنۋىنە ءبىز دە ءوز تاراپىمىزدان ۇلەس قوسقىمىز كەلەدى. الدىمەن تەڭىز جاعاسىنداعى ۇڭگىرلەردى ادەمىلەپ, رەتكە كەلتىرۋدى قولعا الامىز. ودان بولەك 35 قاباتتى تۇرعىن ءۇي سالۋ, سوڭعى ۇلگىدەگى مەيرامحانا, ساۋدا ورتالىقتارى مەن الاڭداردى تۇرعىزۋدى دا جوسپارلاپ وتىرمىز. تۋريستەردى ماڭعىستاۋ وبلىسىنا تارتۋ ءۇشىن بارلىق جاعدايدى جاساۋدىڭ جولىن قاراستىرامىز. اتالعان جوبالار قولداۋ تاپسا, كەلەر جىلى قۇرىلىس جۇمىستارى باستالادى. وسىلايشا, الداعى ۋاقىتتا دا ەكى ەل اراسىندا تابىستى ىنتىماقتاستىق قاتىناس نىعايا تۇسەدى دەپ ۇمىتتەنەمىن», – دەدى جيىندا ءسوز العان مۇحاممەد باحۋش.
كەزدەسۋ سوڭىندا ەكى تاراپ ماڭعىستاۋ وبلىسى مەن بىرىككەن اراب امىرلىگىنىڭ ۇيىمداستىرۋىمەن ەكونوميكالىق فورۋم جانە تۇيەلەر جارىسىن وتكىزۋگە ۋاعدالاستى.
گۇلايىم شىنتەمىرقىزى,
«ەگەمەن قازاقستان»
