اتاۋلى كۇنگە وراي بالالارعا ارنايى كونتسەرتتىك باعدارلاما ۇيىمداستىرىلىپ, تەگىن مۋلتيپليكاتسيالىق فيلم كورسەتىلدى. قايىرىمدىلىق شاراسىنا الماتى قالاسىنداعى ء«ۇمىت» بالالار ءۇيىنىڭ تاربيەلەنۋشىلەرى, № 9 ەستۋ قابىلەتى ناشار بالالار مەكتەپ-ينتەرناتىنىڭ وقۋشىلارى, سونداي-اق الاتاۋ اۋدانىنا قاراستى جالپى ءبىلىم بەرۋ ورىندارى وقۋشىلارى جانە مەكتەپكە دەيىنگى مەكەمەلەردەن 750-دەن اسا تاربيەلەنۋشىلەر قاتىستى.
شارانىڭ ماقساتى – مۇمكىندىگى شەكتەۋلى بالالاردى قوعامدىق ورتاعا تارتىپ, كوپشىلىك نازارىنان تىس قالدىرماي, قولداۋ كورسەتۋ, ۇلتتىق ءداستۇرلى مادەنيەتىمىزدى ناسيحاتتاۋ. شاراعا قازاقستان حالقى اسسامبلەياسى توراعاسىنىڭ ورىنباسارى ابيلفاس حامەدوۆ, قازاقستان حالقى اسسامبلەياسى كەڭەسى مۇشەسى, فيلولوگيا عىلىمدارىنىڭ دوكتورى, پروفەسسور, قر كۇردتەر باربانگ قاۋىمداستىعىنىڭ توراعاسى كنياز ميرزوەۆ, الماتى قالاسى الاتاۋ اۋدانى اكىمىنىڭ ورىنباسارى سايات اعىباەۆ, الماتى قالاسىنىڭ پسيحونەۆرولوگيالىق اۋىتقۋلارى بار مۇگەدەك بالالارعا ارنالعان كۇندىزگى ورتالىعىنىڭ ديرەكتورى نۇرزيا الىمبەكوۆا, «نۇر وتان» پارتياسى الاتاۋ اۋداندىق فيليالى توراعاسىنىڭ ءبىرىنشى ورىنباسارى مۇحانقالي الماساەۆ قاتىستى.
ء«بىز ءبىر جىل كولەمىندە وسى تەاترمەن تىعىز بايلانىستا جۇمىس ىستەپ كەلەمىز. دەمەۋشىلەر تاۋىپ, بالالاردى تەگىن مۋلتفيلم, كينولارىمەن قۋانتىپ جاتىر. سوندىقتان بۇل تەاترعا ءبىزدىڭ العىسىمىز شەكسىز», دەپ اتاپ ءوتتى ءوز سوزىندە الماتى قالاسىنىڭ پسيحونەۆرولوگيالىق اۋىتقۋلارى بار مۇگەدەك بالالارعا ارنالعان كۇندىزگى ورتالىعىنىڭ ديرەكتورى نۇرزيا الىمبەكوۆا.
كەش بارىسىندا ءداستۇرلى جانە ەسترادا انشىلەرى ونەر كورسەتىپ, جەتكىنشەكتەر كينوكونتسەرت زالىنان انيماتسيالىق ءفيلمدى تاماشالادى.
ادىلەت مۇساحاەۆ,
جۋرناليست.
الماتى
