16 جىل مەكتەپ ديرەكتورىنىڭ تاربيە ءىسى جونىندەگى ورىنباسارى, 7 جىل وقۋ ءىسى جونىندەگى ورىنباسارى جانە 7 جىل مەكتەپ ديرەكتورى قىزمەتىن اتقارعان گۇلنار ۋاتحانقىزى اۋداندىق, وبلىستىق جانە رەسپۋبليكالىق دەڭگەيدە ءتۇرلى ماراپاتتارعا يە بولعان ەكەن. ءبىلىم سالاسىندا باعىندىرعان بيىكتەرىن راستايتىن ماراپات قاعازدارىنىڭ تۇپنۇسقاسىن بىرگە جولداپتى. ال 2014 جىلدىڭ 17 قاراشاسىندا ء«بىلىم بەرۋ ءىسىنىڭ قۇرمەتتى قىزمەتكەرى» توسبەلگىسىمەن ماراپاتتالادى. الايدا ءدال وسى مەرەيلى كۇننىڭ ەرتەڭىندە, 18 قاراشا كۇنى مەكتەپتىڭ باس ەسەپشىسى م.كوكەنوۆا, اسپاز ب.ورازالينا جانە مۇعالىم گ.ماميدولدانوۆانىڭ جازعان ارىزى نەگىزىندە ونى وبلىستىق تارتىپتىك كەڭەس ديرەكتورلىق قىزمەتتەن بوساتۋ تۋرالى ۇسىنىس جاسايدى. وسى ۇسىنىس نەگىزىندە اۋداندىق ءبىلىم ءبولىمى 2015 جىلدىڭ 25 اقپانىندا گ.احتانوۆانى ديرەكتور قىزمەتىنەن العان. نە ءۇشىن دەگەن زاڭدى ساۋال تۋادى. حات يەسى جولداعان تارتىپتىك كەڭەس شەشىمىنىڭ كوشىرمەسىنە ۇڭىلگەن ەدىك. وندا 2008 جىلدىڭ 30 قىركۇيەگىنەن بەرى اباي اتىنداعى ورتا مەكتەپ ديرەكتورى قىزمەتىن اتقارىپ كەلە جاتقان گ.ۋ.احتانوۆانىڭ ۇستىنەن تارتىپتىك ءىس قوزعالعانى, ياعني مەكتەپتىڭ 3 قىزمەتكەرىنىڭ ديرەكتوردىڭ زاڭسىز ارەكەتى جونىندەگى ارىزىنا سايكەس بيۋدجەت قارجىسىن ماقساتتى پايدالانۋ جانە سىبايلاس جەمقورلىققا قارسى زاڭنامانى, «مەملەكەتتىك ساتىپ الۋ تۋرالى» زاڭدى ساقتاۋ بويىنشا تەكسەرۋ جۇرگىزىلگەنى, ناتيجەسىندە زاڭ بۇزۋشىلىقتار انىقتالعانى جازىلعان. بۇل قانداي زاڭ بۇزۋشىلىقتار؟ تارتىپتىك كەڭەس شەشىمىندە كورسەتىلگەندەي, 2012 جىلى شىلدە ايىندا «ەلحون ستروي» جشس ديرەكتورى ۋ.شاكاەۆ مەكتەپ ديرەكتورى گ.احتانوۆامەن مەكتەپ اۆتوبۋسىن (تىركەۋ نومەرى F 809 DK) قىركۇيەك ايىنا دەيىن جالداۋ جونىندە كەلىسىم جاسايدى. جالداۋ اقىسىنا الىنعان 360 مىڭ تەڭگە مەكتەپتىڭ ەسەپ ايىرىسۋ شوتىنا ەنگىزىلمەگەن. 2012 جىلدان باستاپ مەكتەپ اسحاناسىندا 216 بالا تەگىن ىستىق تاماقپەن قامتاماسىز ەتىلگەن. 2012 جىلدان باستاپ تەكسەرۋ بولعان كۇنگە دەيىن مەكتەپ اسحاناسىندا 216 وقۋشىدان باسقا 10-15 وقۋشىعا كۇندەلىكتى تاماق ساتىپ الىنىپ وتىرعان. سونداي-اق ءار سەنبى سايىن اسحانادا ورتا ەسەپپەن 200-گە جۋىق سامسا ءپىسىرىلىپ, وقۋشىلارعا 35 تەڭگەدەن ساتىلعان. تۇسكەن اقشانى ب.ورازالينا مەكتەپ ديرەكتورى مەن ونىڭ تاربيە ءىسى جونىندەگى ورىنباسارى ل.اۋباكىروۆاعا جانە پسيحولوگ ا.دۇيسەنبەكقىزىنا بەرىپ وتىرعان. بۇدان وزگە 2013 جىلدىڭ قىركۇيەك ايىندا گ.احتانوۆا مەكتەپتىڭ 10 تەحنيكالىق قىزمەتكەرىن جەكە كاسىپكەر م.كامالبەكوۆانىڭ كارتوبىن جيناۋعا ءۇش كۇنگە جىبەرگەن. بۇل كومەك ءۇشىن مەكتەپكە 20 قاپ كارتوپ بەرىلگەن. اتالعان كارتوپ تا مەكتەپ اسحاناسى ارقىلى يگەرىلىپ, قارجىسى قالتاعا ءتۇسىپ وتىرعان. سونداي-اق 2014 جىلدىڭ 15-30 شىلدە ارالىعىندا زەرتحاناشى ا.ماحرانوۆانىڭ ورنىنا كەلىسىم بويىنشا قوسىمشا (قىزمەت ۋاقىتىنان تىس) ا.كەكباەۆانىڭ جۇمىس ىستەگەنى, وعان 10 مىڭ تەڭگە تولەنگەنى, بۇل قارجىنىڭ جارتىسىن گ.احتانوۆاعا بەرگەنى ايتىلادى.
مىنە, مەكتەپ ديرەكتورىنىڭ قۇقىق بۇزۋشىلىق ارەكەتتەرى تارتىپتىك كەڭەس شىعارعان شەشىمدە وسىلاي كورسەتىلىپتى.
ال مەكتەپتىڭ بۇرىنعى ديرەكتورى گ.احتانوۆا بۇل ايىپتاۋلارمەن كەلىسپەيدى. ياعني مەكتەپكە اسحانادان تۇسكەن بارلىق قارجى ارناۋلى ەسەپشوتقا ءتۇسىپ وتىرعان. مۇنى راستايتىن بانك تۇبىرتەكتەرى ساقتالعان. ال سامسا ءپىسىرۋ جوسپارى اۋداندىق ءبىلىم بولىمىمەن بەكىتىلىپ, قازىناشىلىقتان وتكەندىگى تۋرالى قۇجاتتارى بار. جانە 2004 جىلدان 2014 جىلعا دەيىن مەكتەپتىڭ ءوز ءونىمىن وتكىزۋى زاڭدى بولىپ تانىلىپ كەلگەن. تۇسكەن قارجىنى كىرىستەۋ, مەكتەپكە كەرەكتى زاتتارعا جۇمساۋ تاربيە ءىسى جونىندەگى ورىنباسارى مەن قامقورلىق كەڭەسىنىڭ مۇشەلەرى ارقىلى جۇرگىزىلگەن. بيۋدجەتتەن بولىنەتىن قارجى مەكتەپتى كۇتىپ ۇستاۋعا, مادەني شارالار ۇيىمداستىرۋعا جەتپەيتىندىكتەن, ءبىلىم ءبولىمى قويعان تالاپتاردى ورىنداۋ ءۇشىن قوسالقى شارۋاشىلىق پەن دەمەۋشىلىكتەن تۇسكەن قارجى ارنايى ەسەپشوت ارقىلى مەكتەپتىڭ مۇقتاجىنا پايدالانىلعان.
اۋداننىڭ باسقا مەكتەپتەرى سياقتى ءبىزدىڭ ۇجىم دا 2003 جىلدان باستاپ قوسالقى شارۋاشىلىقپەن اينالىسىپ, مەكتەپ وقۋشىلارىنا كۇندەلىكتى تەگىن تاماققا بولىنگەن 70 تەڭگەنىڭ ورنىنا 100-120 تەڭگەنىڭ تەگىن تاماعىن بەرىپ كەلدى. 2012-2013 وقۋ جىلىندا تەگىن تاماقتاناتىن 177 بالاعا قوسىمشا ءوز ەسەبىمىزدەن 23 وقۋشىنى تاماقتاندىرىپ, تەگىن تاماقتاناتىن وقۋشى سانىن 200-گە جەتكىزدىك. قوسالقى شارۋاشىلىق ەسەبىنەن بيۋدجەتتىڭ تەگىن تاماققا بولىنگەن قارجىسىنان 2010 جىلى – 150 مىڭ تەڭگە, 2011 جىلى – 398 مىڭ, 2012 جىلى 100 مىڭ تەڭگە قارجى ۇنەمدەلىپ, مەملەكەتكە قايتارىلدى. بارلىق قارجىنىڭ جۇمسالۋى تۋرالى تۇبىرتەكتەرى مەن اكتىلەرى, اسپازدىڭ ەسەبى كاسساتسيالىق سوتقا بەرىلگەن. سوندىقتان مەنى كاسىپكەرلىكپەن اينالىستى دەگەن تارتىپتىك كەڭەستىڭ جەلەۋى زاڭسىز, دەپ جازعان ەكەن حات يەسى.
ونىڭ ۇستىنە مەكتەپتىڭ 2,7 گەكتاردى قۇرايتىن باقشاسى بار. وعان مەكتەپتىڭ قامتۋ قىزمەتكەرلەرى كوكونىس ەگەدى ءارى شارۋا قوجالىقتارى دا باقشا ونىمدەرىن اقىسىز بەرىپ وتىرادى. اۋدان بيۋدجەتىنەن بولىنەتىن قارجىنىڭ ازدىعىنا بايلانىستى بۇل كوكونىستەر وقۋشىلاردىڭ تاعامىنا قوسىلىپ بەرىلىپ وتىرادى. گ.احتانوۆا الىنعان ءونىمنىڭ كەستەسى مەن قۇجاتتارىنىڭ بارلىعىن حاتقا تىركەپ, بىرگە جولداپتى.
رەداكتسيامىزدان اراشا سۇراپ, ادىلدىك ىزدەگەن گۇلنار ۋاتحانقىزىمەن زايسان اۋدانىنداعى جۇمىس ساپارىمىزدىڭ اياسىندا كەزدەسىپ, مۇڭ-مۇقتاجىن تىڭداعان ەدىك. ايتۋىنشا, 2012 جىلى دا ۇستىنەن ارىز جازىلىپ, تەكسەرۋ بولىپتى. ال 2014 جىلى مينيسترلىكتىڭ توسبەلگىسىمەن ماراپاتتالعان كۇننىڭ ەرتەڭىندە-اق ەكى جىل بۇرىنعى ىسپەتتەس ارىزدىڭ قۇزىرلى ورگاندارعا قايتا ءتۇسۋى ىشكە شىناشاق اينالمايتىن قىزعانىشتىڭ كورىنىسى دەيدى ول. ءوزى اۋداندىق ءماسليحاتتىڭ دەپۋتاتى بولعاندىقتان, توسبەلگىنى ءماسليحات حاتشىسى مەن ءبىلىم ءبولىمى كاسىپوداق ۇيىمىنىڭ توراعاسى ارنايى كەلىپ, ۇجىم الدىندا تابىس ەتكەنىن ايتادى. بۇل كەزدە مەكتەپتىڭ ادىستەمەلىك كەڭەسى ءوتىپ جاتقان بولاتىن. جيىندا ارىزعا قول قويۋشىنىڭ ءبىرى, بۇرىن وقۋ ءىسىنىڭ مەڭگەرۋشىسى بولىپ قىزمەت ىستەگەن گ.ماميدولدانوۆا دا وتىردى. 2012 جىلى جازىلعان ارىزدىڭ يەسى دە ماميدولدانوۆانىڭ تۋىسى ەكەن.
– مەن كەيىن سوت ماتەريالدارىمەن تانىسۋعا مۇمكىندىك الىپ, ارىز جازۋشىنىڭ بەرگەن تۇسىنىگىن كوردىم. وندا گ.ماميدولدانوۆا اسحانادان العان 32 مىڭ تەڭگەنى ديرەكتورعا اپارىپ بەرگەنىن جازادى. تۇبىرتەككە قاراساق, بۇل قارجىنىڭ بانككە قايىرىمدىلىق قورىنىڭ ەسەپشوتىنا سالىنعانىن كورۋگە بولادى, – دەيدى گ.احتانوۆا.
ء«بىلىم بەرۋ تۋرالى» زاڭعا سايكەس, مەكتەپ ۇجىمدارى قوسالقى شارۋاشىلىقپەن اينالىسۋعا قۇقىلى. ونىمنەن تاپقان پايدا مەكتەپتىڭ قاجەتىنە جۇمسالادى. وعان مەكتەپ ۇجىمى, قامقورشىلار كەڭەسىنىڭ مۇشەلەرى قول قويادى. بۇل رەتتە مەكتەپتە اقىلى قىزمەتتىڭ جوسپارى جاسالىپ, ونى اۋداندىق ءبىلىم ءبولىمى بەكىتكەن. گ.احتانوۆا اتالعان اقىلى قىزمەت جوسپارىن مەكتەپتىڭ باس ەسەپشىسى ادەيى جاسىرىپ قويعانىن, تەكسەرۋ كەزىندە بۇل قۇجاتتى تاپپاي قالعانىن ايتادى.
2006-2011 جىلدار ارالىعىندا مەكتەپتىڭ وقۋشىلاردى تاسۋعا ارنالعان جەكە اۆتوبۋسىنىڭ قاجەتتىلىگى ءۇشىن بيۋدجەتتەن ەشقانداي قارجى قاراستىرىلماعان. ءتىپتى مەكتەپ مەنشىگىنە الۋ كەزىندە اۋدان اكىمى ورىنباسارىنىڭ بەرگەن انىقتاماسىندا اۆتوبۋستىڭ شيناسى جوق, دۆيگاتەل بلوگىنىڭ سىزاتتى ەكەندىگى جازىلعان. 1991 جىلعى ەسكى كولىك ەكەنىنە قاراماستان, «ەلحون ستروي» جشس اۆتوبۋستى جوندەپ, ۋاقىتشا پايدالانۋعا جانە بەلگىلى جالداۋ اقىسىن تولەۋگە كەلىسەدى.
– فيرمانىڭ ەكى ايعا جالداۋ اقىسىنا تولەگەن 360 مىڭ تەڭگەسىن مەن جانە تاربيە ءىسىنىڭ مەڭگەرۋشىسى, ەسەپشى, حاتشى جانە پسيحولوگ بار, ءبارىمىز ساناپ الدىق. كەيىننەن بۇل قاراجاتتى ەسەپشىنىڭ ارنايى شوتقا ادەيى تۇسىرمەگەنى انىقتالدى. ياعني قايتا-قايتا قوڭىراۋ شالسا دا ەسەپشوتتى دۇرىس ايتپاعان. سوندىقتان فيرما جەتەكشىسى وسكەمەننەن ارنايى كەلىپ, قارجىنى ءوز قولىمەن بەرىپ كەتتى. بۇل قارجى دا مەكتەپتىڭ قاجەتتىلىگىنە جۇمسالدى, دەيدى گ.احتانوۆا.
سونداي-اق زەرتحاناشىنىڭ جۇمىس ىستەۋىنە مۇمكىندىك بەرگەنىمەن, ەڭبەكاقىنىڭ 5 مىڭ تەڭگەنى قۇرايتىن جارتى بولىگىن العانى تارتىپتىك كەڭەس بارىسىندا دالەلىن تاپپادى. دەگەنمەن, تارتىپتىك كەڭەس شەشىمى بويىنشا تاعىلعان ايىپ وزگەرىسسىز قالدى. سول سياقتى قامالبەكوۆانىڭ كارتوبى دا قوسالقى شارۋاشىلىق ءونىمى رەتىندە وقۋشىلاردىڭ تەگىن تاماعىنا جۇمسالعان.
مىنە, ارىزدا كورسەتىلگەن جايتتار دۇرىس دالەلدەنبەگەننەن كەيىن گۇلنار ۋاتقانقىزى تارتىپتىك كەڭەستىڭ شەشىمىمەن كەلىسپەي, اۋداندىق سوتقا جۇگىنەدى. زايسان اۋدانىنىڭ سوتى گ.احتانوۆانىڭ قىزمەتىن قايتا قالپىنا كەلتىرگەنىمەن, اۋدان پروكۋرورى ءىستى اپەللياتسيالىق سوتقا بەرەدى. وعان وسى سوت وتىرىسىندا ارىزعا قول قويعان مەكتەپ ەسەپشىسىنىڭ «سوندا 5 جىل ىشىندە تۇسكەن 710 مىڭ تەڭگەنىڭ قايدا جۇمسالعانى بەلگىسىز بولىپ قالدى» دەگەن ءسوزى نەگىز بولادى. اپەللياتسيالىق سوت پروكۋروردىڭ نارازىلىعىن قاناعاتتاندىردى. بۇل شەشىممەن كەلىسپەگەن گ.احتانوۆا كاسساتسيالىق سوتقا جۇگىنەدى. الايدا كاسساتسيالىق سوت اپەللياتسيالىق سوتتىڭ شەشىمىن وزگەرىسسىز قالدىردى. وسىلايشا, قۇقىق قورعاۋ ورگاندارىنىڭ اراسىندا قاقپاقىل بولىپ, سالى سۋعا كەتكەندە «نۇر وتان» پارتياسى قىزمەتكەرلەرى گ.احتانوۆاعا ق.قوجامجاروۆتىڭ قابىلداۋىنا ونلاين ارقىلى قاتىسۋعا كەڭەس بەرەدى. 2015 جىلدىڭ 2 قىركۇيەگىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى ق.قوجامجاروۆتىڭ ونلاين-قابىلداۋىندا بولعاننان كەيىن, ازاماتتىق-پروتسەسسۋالدىق كودەكستىڭ 404-بابىنا سۇيەنە وتىرىپ, زاڭدى كۇشىنە ەنگەن سوت شەشىمىن اپەللياتسيالىق سوتتا قايتا قاراۋعا بەرۋىنە تولىق قۇقىلى ەكەندىگى تۋرالى جاۋاپ الادى. بىراق استانادان كەلگەن جاۋاپتا تەكسەرۋ قورىتىندىسى ناقتى, تولىق جازىلماعان دەيدى گ.احتانوۆا. بۇدان كەيىن دە ادىلدىك ىزدەپ, سارسىلعان شاعىمدانۋشى ءار ەسىكتى كۇتۋمەن تابالدىرىق تا توزدىرعانىن, ۋاقىت تا وزدىرعانىن جەتكىزدى. ايتالىق, اگەنتتىك بەرگەن جاۋاپتى نەگىزگە الىپ, اپەللياتسيالىق سوتقا قايتا شاعىمدانعانىمەن, اۋداندىق ءبىلىم ءبولىمىنىڭ مەكەن-جايى كورسەتىلمەگەنى ءۇشىن شاعىم كەرى قايتارىلادى. جانە جاڭا جىلدا زاڭناماعا ءتيىستى وزگەرتۋلەر ەنگىزىلگەننەن سوڭ كاسساتسيالىق سوتقا بەرۋگە بولاتىندىعى تۋرالى كەڭەس بەرىلەدى. ال 2016 جىلى كاسساتسيالىق سوتقا جۇگىنگەن وعان اپەللياتسيالىق سوت شەشىمىنسىز كاسساتسيالىق سوت بولمايتىندىعى ايتىلادى. وسىلايشا, اپەللياتسيالىق سوتقا قايتا ورالعانىمەن, ونداعىلار ءوتىنىش حات جازباعانىن ايتىپ, تاعى كەرى قايتارادى. ءوتىنىش حاتتى اۋداندىق سوتتىڭ ماقۇلداۋىمەن قايتا وتكىزگەنىندە, اپەللياتسيالىق سوت قابىلداپ العانىن راستايتىن بۇرىشتاما سوققانىمەن, كەيىننەن شاعىمدانۋشىعا تاعى دا ءوتىنىش حاتتىڭ بولماعانىن العا تارتادى. ياعني شاعىمدانۋشىنىڭ ءبىر بارعان جەرىنە سان بارۋىنا تۋرا كەلدى. بىلتىر 1 تامىزدا وتكەن اپەللياتسيالىق سوت اۋرە-سارساڭعا سالعان ءىستى اۋداندىق سوت شەشىمىنىڭ كەمشىلىگى دەپ ۇيعارادى.
سوت شەشىمىنىڭ شالاعايلىعى ءۇشىن مەن نەگە جاپا شەگۋىم كەرەك؟ مەنىڭ ساندالىسىم اياقتالا ما, اياقتالماي ما؟ كىمنەن اراشا كۇتەمىن؟ كىم مەنى قورعايدى, دەدى اشىنعان پەداگوگ. بۇدان كەيىن دە سىبايلاس جەمقورلىققا قارسى كۇرەس ۇلتتىق بيۋروسى مەن پروكۋراتۋراعا شاعىمدانعانىمەن, بۇل ءىستىڭ نۇكتەسى ءالى قويىلعان جوق. ويتكەنى تارتىپتىك كەڭەستىڭ وتىرىسىنان كەيىن مەكتەپتىڭ كاسىپوداق ۇيىمنىڭ جيىنى ءوتىپ, ۇجىم مۇشەلەرى باس ەسەپشىنىڭ قىزمەتىن تەكسەرۋ جونىندە ورتاق ۇيعارىم شىعارعان ەكەن. وسى ارقىلى رەۆيزيالىق تەكسەرۋ كەزىندە ەسەپشىنىڭ مەكتەپ ديرەكتورىنىڭ سىرتىنان قول قويىپ, قانشاما قارجىنى جەكە پايداسىنا اسىرعانى, ۇجىم مۇشەلەرىنىڭ زەينەتاقى قورىنا ءتيىستى قارجىنى اۋدارماعانى, ارىپتەستەرىنىڭ ءىسساپار شىعىندارىن بەرمەۋى سياقتى كەلەڭسىزدىكتەرى بەلگىلى بولدى (11.01.2017 ج. وبلىستىق سوت-ساراپتاما ينستيتۋتىنىڭ №94 قورىتىندىسى بويىنشا قويىلعان قولداردىڭ گ.احتانوۆانىكى ەمەس ەكەنى انىقتالدى).
مەكتەپتىڭ كۇردەلى جوندەۋ جۇمىستارىنا بايقاۋ جاريالانعان ساتتە جەكە مۇددەسىن وتكىزۋدى كوزدەگەنى دە ەسەپشىگە ەش زيان تيگىزبەدى. ءۇش مارتە رەۆيزيالىق تەكسەرىس كەزىندە قارجىلىق شالاعايلىقتار انىقتالعانىمەن, ەسەپشى ءوز قىزمەتىن ءالى جالعاستىرىپ كەلەدى, دەيدى ول.
بىزگە جولداعان قۇجاتتاردىڭ اراسىنداعى رەسپۋبليكانىڭ باس پروكۋرورىنا جولداعان حاتقا نازار اۋداردىق. 2014-2015 وقۋ جىلىندا مەكتەپتىڭ تولىق كۇردەلى جوندەۋدەن وتكەنى, ەكى جىلعا جوسپارلانعان جوندەۋ جۇمىستارىنىڭ ەكىنشى جىلعا قالدىرىلماي جاڭا وقۋ جىلىندا مەكتەپتە ساباق باستالعانى, وسى كەزدەن بەرى مەكتەپ ديرەكتورىنا جالا جابىلىپ, بىرجاقتى تەكسەرۋلەر جۇرگىزىلگەنى ايتىلعان ەكەن. كورەالماۋشىلىقتان تۋىنداعان, قيىننان قيىستىرىپ جالا جابۋشىلاردىڭ ءىس-ارەكەتىنە نۇكتە قويىپ, اق-قاراسىن ءادىل شەشىپ بەرۋدى سۇراعان مەكتەپتىڭ كاسىپوداق كوميتەتى مەن پەداگوگيكالىق جانە قامتۋ قۇرامىنىڭ مۇشەلەرى, بارلىعى 60-تان استام ادام قول قويعان. وسى ىسپەتتى حاتتى جوعارعى سوت توراعاسى مەن باس پروكۋرورعا اۋداندىق ءماسليحات اپپاراتى دا جولداعان. 2017 جىلدىڭ 17 قاڭتارىندا سىبايلاس جەمقورلىققا قارسى ءىس-قيمىل ۇلتتىق بيۋروسى شقو بويىنشا دەپارتامەنتىنىڭ باسشىسى س.پوتانين مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ شقو بويىنشا دەپارتامەنتىنىڭ باسشىسى, ادەپ جونىندەگى كەڭەستىڭ توراعاسى ب.كامالوۆقا گ.احتانوۆاعا قاتىستى تارتىپتىك كەڭەس شەشىمىن قايتا قاراۋ تۋرالى ۇسىنىس جاساعانىمەن, شەشىمنەن كەيىن سوت وتىرىسى بولعانىنا بايلانىستى سوت شەشىمىن وزگەرتە المايتىندىعىن العا تارتقان.
ءبىز وسى ورايدا ەكىنشى تاراپقا دا حابارلاسىپ, ولاردىڭ ءۋاجىن تىڭداۋعا ق ۇلىقتى ەكەنىمىزدى جەتكىزىپ, ەلەكتروندى مەكەن-جايىمىزدى دا بەردىك. بىراق ول تاراپتان ەشقانداي تۇسىنىكتەمە بەرىلگەن جوق. سوندىقتان بۇگىنگە دەيىن قۇقىق قورعاۋ ورگاندارىنىڭ ورتاسىندا ءارى-ءسارى كۇي كەشىپ, ادىلدىك تاپپاي كەلە جاتقان گ.احتانوۆانىڭ جايىن جەتكىزگەندى ءجون كوردىك.
دۋمان اناش,
«ەگەمەن قازاقستان»
