بۇل دەگەنىڭىز, ەكونوميكاسى دامىعان ەلدەردەگى جاعدايمەن سالىستىرار بولساق, البەتتە دابىل قاعارلىقتاي-اق جاعداي. نەگە دەسەڭىز, الگى بولىپ-تولىپ وتىرعان ەلدەردە جاستاردىڭ 60-70 پايىزى سپورتپەن تۇراقتى شۇعىلدانىپ, سالاماتتى ءومىر سالتىن قاتاڭ ۇستانادى ەكەن.
جاسىراتىنى جوق, كەيىنگى ون جىل مۇعدارىندا تۇرعىنداردىڭ, اسىرەسە ستۋدەنت جاستاردىڭ دەنە شىنىقتىرۋ دايارلىعى مەن دەنساۋلىعى اجەپتاۋىر تومەندەپ كەتكەن. جوعارى وقۋ ورىندارىنىڭ كۇندىزگى بولىمىندە وقيتىن تەپسە تەمىر ۇزەدى-اۋ دەگەن جاستاردىڭ 12-15 پايىزى دەنساۋلىعىنا بايلانىستى ارنايى توپقا جاتقىزىلىپتى. ياعني شەتىنەن ءالجۋاز دەگەن ءسوز بۇل. وكىنىشتىسى سول, بۇل ستۋدەنتتەردىڭ كوبى پرەزيدەنتتىك سىنامانى ايتپاعاننىڭ وزىندە, ۇلتتىق دايارلىق دەڭگەيىندەگى قاراپايىم نورماتيۆتەردى تاپسىرا المايدى ەكەن.
ەلىمىزدە بۇقارالىق سپورتتى دامىتۋ جونىندە بىرقاتار جوبا جۇمىس ىستەيدى. بىراق تۇپتەپ كەلگەندە, وسىلاردىڭ تيىمدىلىگى سىن كوتەرمەيتىن جاعدايدا. ماسەلەن قازىرگى ۋاقىتتا ءبىزدىڭ ەلىمىزدە «Street workout» دەگەن سپورت ءتۇرى كەڭىنەن ناسيحاتتالىپ ءجۇر. ءتىپتى تاياۋدا ۇلتتىق وليمپيادا كوميتەتى باسشىسىنىڭ تىكەلەي باستاماسىمەن كوكشەتاۋ, قاراعاندى جانە ورال قالالارىندا وسى سپورت ءتۇرىنىڭ الاڭقايلارى اشىلىپ, سىيعا تارتىلدى.
نەگىزى, street workout – الەم جاستارىنىڭ سۇيىكتى سپورتى. ونىڭ ۇستىنە, سالىستىرمالى تۇردە ايتقاندا, وتە ارزانعا تۇسەتىن سپورت ءتۇرى. اشىق اسپان استىنداعى الاڭقايعا دەنەنىڭ بۇلشىق ەتتەرىن شىنىقتىرۋعا ارنالعان ءتورت-بەس قاراپايىم سپورتتىق قوندىرعىنى ورناتسا بولدى, جەتىپ-اق جاتىر. قولىڭ قالت ەتكەندە كەل دە, بەلتەمىرگە تارتىل, شۆەد قابىرعاسىنا ورمەلە, گيمناستيكالىق قوسسىرىقتا قولتىعىڭدى سوگىپ, قولىڭدى بۇگىپ جاز وتە ىڭعايلى جانە قولجەتىمدى.
بىراق ارزان دۇنيەنىڭ ارتىندا ايتەۋىر ءبىر ماسەلەنىڭ تۇراتىنى بار عوي. ماسەلەن التى اي قىسىمەن اتى شىققان وڭىرلەردە كۇن سۋىتقاندا الگى ۆوركاۋت الاڭقايلارىنا ادامداردىڭ اتتاپ اياق باسپايتىنى ايدان انىق. ساقىلداعان سارى ايازدا مۇزداي تەمىردى ۇستاۋعا كىم قۇلشىنا قويار دەيسىز. ياعني street workout دەگەنىڭىز جاز ايلارىندا بولماسا, اق قار, كوك مۇزدا بۇقارالىق سپورتتىڭ بويىنا قان جۇگىرتە قويمايدى.
تىعىرىقتان شىعار ءبىر جول بار, ول – دەنە شىنىقتىرۋ-ساۋىقتىرۋ كەشەندەرىن (دشسك) سالۋ. بۇل جوبا وسىدان ءۇش-ءتورت جىل بۇرىن جاقسى قارقىن الىپ, ەلىمىز بويىنشا ەتەك جايىپ كەلە جاتقان ەدى. وكىنىشكە قاراي, قازىرگى ۋاقىتتا ەكپىنى باسەڭدەپ قالدى.
جالپى, دەنە شىنىقتىرۋ-ساۋىقتىرۋ كەشەندەرىنسىز بۇقارالىق سپورتتى دامىتۋدى كوز الدىڭا ەلەستەتۋ وتە قيىن. دەنەمدى شىنىقتىرامىن, سپورتپەن اينالىسامىن دەگەن حالىق ارنايى سپورتتىق كەشەن بولماسا, ايدالاعا بارىپ جۇگىرىپ نەمەسە سەكىرە بەرمەيدى عوي. سپورت زالدارى ارنايى جاتتىعۋ قۇرىلعى-قوندىرعىلارمەن جابدىقتالسا, ءبىر سوزبەن ايتقاندا, قاراپايىم دا بولسا قاجەتتى جاعداي جاسالسا, ءوزىنىڭ دەنساۋلىعىن ويلاعان سانالى ادام ول جەردى اينالىپ وتپەس ەدى-اۋ عوي. مۇنداي دشسك-لەردىڭ شاعىنداۋ ۇلگىلەرى, اسىرەسە الىستاعى اۋىلدا, شالعايداعى اۋداندا كوپتەپ سالىنسا, سالاماتتى ءومىر سۇرگىسى كەلەتىن اعايىن ءۇشىن ايتىپ جەتكىزگىسىز قۋانىش بولار ەدى.
ارينە, كەز كەلگەن كۇردەلى ماسەلەنىڭ ءتۇيىنىن شەشەتىن قۇدىرەت – قارجى. بىراق وسى قارجى دەگەنىڭىز سپورت سالاسىنا از ءبولىنىپ جاتقان جوق. جوعارى جەتىستىكتەر سپورتىنا بولىنەتىن قارجى جاعىنان ءبىزدىڭ ەل كەز كەلگەن سپورتتىق دەرجاۆامەن تەرەزە تەڭەستىرە الادى. ماسەلە – وسى قارجىنىڭ ءتيىمدى ءھام ادىلەتتى تۇردە جۇمسالۋىندا عوي. سپورت سالاسىنداعى سىبايلاس جەمقورلىقتىڭ جالاڭ قاعىپ تۇرعانى سونشالىقتى, كۇن وتكەن سايىن نەبىر زاڭ بۇزۋشىلىقتار مەن قىلمىستىق سيپاتى بار ءىس-ارەكەتتەر اشكەرە بولىپ جاتىر. ماسەلەن, جۋىردا ەل سپورتىنىڭ قارجىلىق قارا قازانى – ۇلتتىق شتاتتىق كوماندالار جانە سپورتتىق رەزەرۆ ديرەكتسياسىنىڭ باسشىسى پارا الىپ جاتقان جەرىندە قولعا ءتۇستى. بۇگىندە ەكى اي مەرزىمگە قامالعان ەكس-ديرەكتوردىڭ ءبىر عانا جاتتىقتىرۋشىدان العان پاراسىنىڭ كولەمى ادامنىڭ جاعاسىن ۇستاتادى – ەۋرو, دوللارىن قوسىپ ەسەپتەگەندە 15 ميلليون تەڭگە!
مۇنداي ارانى اشىلعان جەمقورلاردىڭ سپورت سالاسىنىڭ باسىندا, وبلىستىق باسقارمالاردا, قالا, اۋداندارداعى بولىمدەر مەن مەكتەپتەردە الاقانىن ىسقىلاپ, بۇعىپ وتىرۋى ابدەن مۇمكىن. مىنە, وسىنداي بىلىقتىڭ تامىرىنا بالتا شاپپايىنشا, بۇقارالىق سپورتتى بىلاي قويعاندا, بۇتىندەي سپورتتىڭ كوسەگەسى كوگەرمەيدى.
