سونداي حاتتىڭ ءبىرىن جاپونيانىڭ ايچي پرەفەكتۋراسىنىڭ تۇرعىنى, «ەكسپو-اجە» اتانعان توميو يامادا جولداعان.
حات يەسى: «مەن 2005 جىلى ايچي-ەكسپو كورمەسىندە العاش رەت قازاقستان پاۆيلونىن ارالاپ كورىپ, ءسىزدىڭ ەلىڭىز جايلى كوپ نارسەگە قانىقتىم. سودان بەرى قازاقستانعا كەلۋدى ارماندادىم. 2008 جىلى يسپانيانىڭ ساراگوسا قالاسىندا وتكەن ەكسپو كورمەسىندە دە سىزدەردىڭ ۇلتتىق پاۆيلوندارىڭىزدا بولدىم», دەپ جازعان.
توميو يامادا بيىل ەكسپو-2017 كورمەسىنىڭ ەلشىسى اتانعانىن, قازاقستانعا كەلىپ, كوپتەن كۇتكەن ارمانى ورىندالعانىن بايانداعان.
وسى ورايدا ول: «كورمەگە ەكى رەت باردىم. قازاقستاننىڭ ۇلتتىق مۋزەيى مەن قالاداعى ورتالىق ساياباقتى, تۇڭعىش پرەزيدەنت مۋزەيىن ارالاپ كوردىم. ءسىزدىڭ ءوز ەلىڭىزگە دەگەن قامقورلىعىڭىزدى سەزىنە الدىم», دەپ اتاپ وتكەن.
اۆتور استانادان جانە ەكسپو-2017 كورمەسىنەن جاقسى اسەر العانىن ايتىپ, عىلىمي جاڭالىقتاردىڭ ادامزاتتىڭ جارقىن بولاشاعى ءۇشىن پايدالانىلاتىنىنا سەنىم بىلدىرگەن.
حات سوڭىندا توميو يامادا نۇرسۇلتان نازارباەۆقا كورمەنىڭ جوعارى دەڭگەيدە ۇيىمداستىرىلعانى ءۇشىن العىس ايتقان.
