ەلشىنىڭ پايىمداۋىنشا, كەيىنگى ۋاقىتتا يندونەزيادا ەل ورتالىعىن باسقا قالاعا كوشىرۋ ماسەلەسى ءجيى كوتەرىلىپ ءجۇر. وسىعان سايكەس, ەلدە ارنايى كوميسسيا قۇرىلىپ, زەرتتەۋ جۇمىستارىن جۇرگىزۋ تاپسىرىلعان.
«استاناعا كەلگەن ساپارىندا يندونەزيا ۆيتسە-پرەزيدەنتى يۋسۋف كاللا ەلباسى نۇرسۇلتان نازارباەۆتان ەل ورداسىن الماتىدان استاناعا اۋىستىرۋ تاجىريبەسى جونىندە سۇرادى. ويتكەنى, عىلىمي ورتادا, ءباسپاسوز بەتتەرىندە استانانى باسقا شاھارعا نە ارالعا اۋىستىرۋ جونىندە اڭگىمە قوزعالدى. ەل پرەزيدەنتى ۇلتتىق دامۋ اگەنتتىگىنە شەتەلدىك وزىق تاجىريبەلەردى جيناقتاپ, يندونەزيا ەرەكشەلىگىن ەسكەرە وتىرىپ جوبا جاساۋدى تاپسىردى», دەدى ا.ورازباي.
ەلشى يندونەزيانىڭ مۇنداي باتىل قادامعا بارۋىنا قازىرگى استانا دجاكارتانىڭ حالىققا لىق تولۋىمەن بايلانىستىرادى. بۇگىندە يندونەزيا ورتالىعىندا 15 ميلليونعا جۋىق حالىق تۇرادى. وسى ماسەلەلەردى ەسكەرە وتىرىپ ەل استاناسىن كوشىرۋدى جوسپارلاعان يندونەزيا ۇكىمەتى قازاقستاننىڭ 1997 جىلعى قادامىن جوعارى باعالاپ, تاجىريبە الۋعا نيەتتى.
سونىمەن قاتار, ا.ورازباي يندونەزيا ۆيتسە-پرەزيدەنتى يۋسۋف كاللانىڭ استاناعا ساپارى بارىسىندا تالقىلانعان باسقا ماسەلەلەرمەن دە ءبولىستى. ا.ورازباي بۇل ەلدە يسلام بانك جۇيەسى جاقسى دامىعانىن تىلگە تيەك ەتتى. وسىعان سايكەس, قازاقستان تاراپى يندونەزيامەن تاجىريبە الماسۋعا ءازىر ەكەنىن جەتكىزگەن. سونداي-اق, يندونەزيالىق يسلام بانكتەرى استانادا اشىلاتىن حالىقارالىق قارجى ورتالىعىندا جۇمىس ىستەۋگە شاقىرىلىپ وتىر.
ا.ورازباي يندونەزيا كاسىپكەرلەرى قازاقستاندا ءدارى وندىرەتىن فارماتسەۆتيكالىق زاۋىت سالۋعا مۇددەلى ەكەنىن مالىمدەدى. ونىڭ ايتۋىنشا, ەلدەگى ۇلكەن كومپانيالاردىڭ ءبىرى Rama Group باسشىلىعى قازاقستانعا كەلىپ, مۇنداعى نارىقتى زەرتتەپ كەتىپتى.
دەگەنمەن, ەكى ەل اراسىنداعى ساۋدا جانە ەكونوميكالىق قارىم-قاتىناستى دامىتۋعا كولىك-لوگيستيكالىق بايلانىستىڭ ناشارلىعى كەدەرگى بولىپ وتىر. بيىلعى العاشقى جارتى جىلدىقتا يندونەزيا مەن قازاقستان اراسىنداعى تاۋار اينالىمى 15,2 ميلليون دوللاردى قۇراعان. بۇل – بىلتىرعى مەرزىممەن سالىستىرعاندا 65,3 پايىزعا جوعارى.
ا.ورازباي ساۋدا جانە ەكونوميكالىق بايلانىستى نىعايتۋدىڭ ەكى باعىتىن اتاپ كورسەتتى. ونىڭ پىكىرىنشە, قىتايداعى ليانيۋنگان پورتى ارقىلى قازاقستان تاۋارىن يندونەزياعا ەكسپورتتاۋعا مۇمكىندىك بار. ەلشى ەكىنشى باعىت رەتىندە يرانداعى بەندەر-ابباس پورتىن ەسەپتەيدى. ايتسە دە, ازىرگە ساراپتاۋ جۇمىستارى جۇرگىزىلىپ جاتىر.
يندونەزيا حالقى سانى جونىنەن الەمدە 4-ورىندا تۇرعان مەملەكەت. يسلام مەملەكەتتەرى اراسىنداعى ەڭ ۇلكەنى جانە دەموكراتيالى ەل سانالادى. قازاقستان مەن يندونەزيا اراسىنداعى ديپلوماتيالىق كەلىسىم 1993 جىلعى 2 ماۋسىمدا ورناعان.
اباي اسانكەلدى ۇلى,
«ەگەمەن قازاقستان»
