قازاقستان پرەزيدەنتى استانادا ءوتىپ جاتقان يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءبىرىنشى سامميتىنە قاتىسقانى ءۇشىن يسلام دامۋ بانكىنىڭ پرەزيدەنتىنە ريزاشىلىق ءبىلدىردى.
– يسلام دامۋ بانكىمەن ىنتىماقتاستىعىمىز جىل سايىن نىعايا تۇسۋدە. بۇگىنگى سامميت «ەكسپو-2017» حالىقارالىق كورمەسىنىڭ وتۋىمەن تۇسپا-تۇس كەلىپ وتىر. بۇل كورمەنىڭ تاقىرىبى – جاڭا ەنەرگەتيكا. وندا بارلىق ەلدەردىڭ وسى سالاداعى جەتىستىكتەرى كورسەتىلدى, – دەدى نۇرسۇلتان نازارباەۆ.
مەملەكەت باسشىسى كورمە جۇمىسى اياقتالعان سوڭ ونىڭ ورنىندا حالىقارالىق قارجى ورتالىعى جۇمىس ىستەيتىنىن, ونىڭ قىزمەتى اعىلشىن قۇقىعىنا نەگىزدەلەتىنىن اتاپ ءوتتى.
– ءبىز كوپتەگەن دامىعان ەلدەردىڭ وسى سالاداعى قىزمەتىنە تالداۋ جاساپ, بۇل ورتالىقتىڭ جۇمىسىن دۋبايداعى قارجى ورتالىعىنىڭ ۇلگىسى بويىنشا قالىپتاستىرۋدى ۇيعاردىق. يسلام دامۋ بانكى وسى جۇمىستارعا تىكەلەي اتسالىسادى دەپ ۇمىتتەنەمىن, – دەدى قازاقستان پرەزيدەنتى.
يسلام دامۋ بانكىنىڭ پرەزيدەنتى قوناقجايلىق كورسەتكەنى ءۇشىن مەملەكەت باسشىسىنا جانە قازاقستان حالقىنا العىس ايتتى.
– ءبىز وسىنداي اۋقىمدى ءىس-شاراعا قاتىسقانىمىزعا قۋانىشتىمىز. بۇل – يسلام ىنتىماقتاستىعى ۇيىمىنىڭ عىلىم جانە تەحنولوگيالار سالاسىنداعى العاشقى ءسامميتى. وسى ماڭىزدى سامميتكە قاتىسۋعا مۇمكىندىك جاساعانىڭىز ءۇشىن ريزاشىلىق بىلدىرەمىز, – دەدى باندار بەن مۇحامماد حادجار.
سونداي-اق, يسلام دامۋ بانكىنىڭ پرەزيدەنتى بۇل سامميت نۇرسۇلتان نازارباەۆتىڭ عىلىم مەن جاڭا تەحنولوگيالاردى دامىتۋعا باعىتتالعان قىزمەتىنىڭ ايقىن كورىنىسى ەكەنىن اتاپ ءوتتى.
– بۇل ءسىزدىڭ بولاشاق ۇرپاقتىڭ دامىعان ەلدەرمەن باسەكەلەسۋگە مۇمكىندىگىن ارتتىرۋعا قوسقان ۇلەسىڭىز. يسلام ىنتىماقتاستىعى ۇيىمىنا مۇشە ەلدەردىڭ عىلىم جانە تەحنولوگيالار جونىندەگى قورىن قۇرۋعا قولداۋ كورسەتكەنىڭىز ءۇشىن زور العىسىمدى بىلدىرەمىن, – دەدى باندار بەن مۇحامماد حادجار.
